प्रकास 16 - चितवनिया थारुपरमेस्वरक खिसक सात गो कचोरा 1 तब मन्दिरवासे याइल एगुडा जबड स्वरमा सात जन स्वरगदुतसभके यसके कहइकि मुइ सुनलहिँ, “तोहरा जाह हसे परमेस्वरक खिसक सात गो कचोरा धरतियामा बरोइह।” 2 तब पहिला स्वरगदुतवा जाके यापन कचोरवा धरतियामा बरोलिय हसे उअ पसुवाक छाप भेलि तके उअ मुरतिया पुजलहरा मन्सावानिमा घिन लगना बथाह घाउ निकडलइ। 3 वकरपाछा दोसरो स्वरगदुतवा यापन कचोरवा समुनदरवाक पनियामा बरोलिय हसे उअ समुनदरवाक पनिया मरल मन्सेक रकत नहिँया भेलइ तके समुनदरवामा भेलि जम्मे जिउति प्रानिसभ मरलइ। 4 तिसरि स्वरगदुतवा यापन कचोरवा लदियाहमा हसे पनियाक म्वाकासभमा बरोलिय तके उअ जम्मे रकत भेलइ। 5 तब पनियाक अधिकार लेलहरवा स्वरगदुतवा मुइ यसके कहइकि सुनलहिँ, “हे पवितर परमेस्वर, यपनहुँ जुने बडहुँ, जुने रहलहुँ, यपनहुँक करल न्याय ठिक बडइ। 6 केहकेकि हुनुका यपनहुँक सेवकसभ हसे अगमवक्तावानिके मारलइ, यपनहुँ हुनुकाके रकतवा पियके देलहुँ। हुनुका पावे परना सजाय पउलइ।” 7 तब वेदियासे यसके कहइकि मुइ सुनलहिँ, “इअ सदि हखइ, परमप्रभु परमेस्वर सरवसक्तिमान, सदि यपनहुँक न्याय ठिक हसे सत्य बडइ।” 8 वकरपाछा चउथि स्वरगदुतवा यापन कचोरवा बेरियावामा बरोलिय हसे बेरियावा मन्सावानिके यागिसे डहावेके सक्ति पउलिय। 9 बेरियावाक चरचरवा घमवासे मन्सावाह डहलइ, इअ दुःख हसे विपति याने सकलाहर परमेस्वरक नाउँके हुनुका धिकारलइ, बाकि हुनुका यापन पापि मनवा हइने बदललइ तके हुनेके महिमा फेनि देलइ। 10 तब पाँचु स्वरगदुतवा यापन कचोरवा पसुवाक सिंहासनमा बरोलिय हसे वकर राज यन्हार भेलइ। मन्सावानिक दुःख-कस्ट भेलेसे यापन-यापन दतवा किटकिटोलइ। 11 हुनुकर घउवाक दुःखवासे हुनुका स्वरगक परमेस्वरके सरापलइ, बाकि यापन करलि पापसे पछताप करेके इन्कार करलइ। 12 छइठो स्वरगदुतवा यापन कचोरवा जबडि लदिया युफ्रेटिसमा बरोलिय हसे वकर पनिया सुखइबे करलइ, तब पुरवेसे यइलि रजवानिक तहिँया पइडा तयार भेलइ। 13 वकरपाछा मुइ यजिगरवाक मुहवासे, पसुवाक मुहवासे हसे झुठा अगमवक्ताक मुहवासे बेङ नहिँया देखार तिन गो असुद्ध-आत्मा निकडइकि देखलहिँ। 14 हुनुका यचम्मक चिन्हा देखोलहर दुस्ट-आत्मासभ हखइ। हुनुका संसारक जम्मे रजवानिक लघिना जेसइ हसे सरवसक्तिमान परमेस्वरक महान दिनवामा लडाइ करेके तहिँया हुनुकाके जामा करसइ। 15 परमप्रभु यसके कहलसि, “सुनह, मुइ चोर नहिँया तोहरा थाह नाहिँ पाके यबहिँ। उअ धन्य हखिय, जुने चेतले रहसिय हसे यापन लुगवा बचाके रखसिय। नत उअ मन्सावा नङटे बुलबिय हसे मन्सावानिक यागा लजियामा परबिय।” 16 वकरपाछा उअ असुद्ध आत्मासभ हिब्रु भासामा आर-मागेड्डोन कहलि ठउरियामा उअ रजवानिके जामा करलइ। 17 तब सातु स्वरगदुतवा यापन कचोरवा बयरवामा बरोलिय हसे मन्दिरवाक सिंहासनसे एगुडा यसनुक जबड स्वर यलइ, “याबे वरेलइ।” 18 तब यकसवामा चिलकइकि हसे गुरगुरभटभटक यवाजसभ यलइ हसे जबड भुइचाल गेलइ। यतुरा जबड भुइचाल गेलइ कि, धरतियामा मन्सावानिक सिरिस्टि हखलिसे यसनुक भुइचाल कबहुँ हइने गेल रहलइ। 19 उअ जबडि सहरवा बेबिलोन तिन भाग बटेलिय हसे देस-देसक सहरवाह भासके नास भेलइ। जबडि सहरवा बेबिलोनक याद परमेस्वरक यलइ तके हुनेक डर लगना खिस उअ सहरवामा यलइ। 20 भुइचाल गेलेसे जम्मे ठिसवा हसे पहडावाह हइने पवेलइ। 21 चालिस-चालिस किलोक पथरा यकसवासे मन्सावानिक वपरा परे लगलइ हसे मन्सावाह पथराक विपतिक कारनसे परमेस्वरके सरापे लगलइ, केहकेकि इअ विपतिया सहे हइने सकना रहलइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.