प्रकास 14 - चितवनिया थारुपाठा हसे हुनेक जनसभ 1 तब मुइ हेरलहिँ हसे सियोन पहडावामा पाठा ठडियाइल देखलहिँ। हुनेसाङे एक लाख चवालिस हजार जन रहलइ, जाकर लिलरावामा हुनेक नाउँ हसे हुनेक पिताक नाउँ लिखाइल रहलइ। 2 मुइ जबड लदिक पानिक मचालक यवाज नहिँया स्वरगसे गुरगुरभटभट यवाज सुनलहिँ। उअ यवाज विडा बजोलहरानि बजोइकि बहुत विडाक यवाज नहिँया रहलइ। 3 उअ एक लाख चवालिस हजार जन मन्सावाह सिंहासनक यागा हसे उअ चार गो जिउते प्रानियानिक तके यगुवासभक यागा एगुडा लउठा गित गवइ रहलइ। धरतियासे बचलि एक लाख चवालिस हजार जन मतरे उअ गितवा गावे जनले रहलइ, याको कुनहुँ फेनि हइने जनइ। 4 हुनुका जनियानिसाङे लसपस हइने भेल रहलइ हसे यपनहिँके सुद्ध रखले रहलइ। पठवा जहवाँ जिसिय वकरपाछा लगलाहर हिनिकहिँ हखइ। संसारक मन्सावानिसे बचल हिनिकहिँ हखइ हसे परमेस्वर तके पठवाक तहिँया सबसे पहिलोठिया चढावल फर नहिँया हखइ। 5 हुनुकर मुहवामा किहो झुठा बात हइने पवलइ, हुनुका निरदोस रहलइ। तिन जन स्वरगदुतसभ 6 तब मुइ यकसवाक बिचा उडियाइकि दोसरे एगुडा स्वरगदुत देखलहिँ। धरतियामा रहलहरा जम्मे जाति, कुल, भासा हसे जम्मे देसवाक मन्सावानिके सुनावेके उअ कबहुँ हइने अन्त हखना खुसिक समाद लेके यवइ रहलिय। 7 उअ जबड स्वरमा कहलिय, “परमेस्वरसे डेराह हसे हुनेक प्रसंसा करह, केहकेकि हुनेक मन्से जातिक न्याय करेके जुन यासकल बडइ। स्वरग, धरति, समुनदर हसे पानिक म्वाका बनोलहर परमेस्वरके सम्मान करह।” 8 तब पहिला स्वरगदुतवाक पाछा दोसरि स्वरगदुतवा यसके कहते पाछा लगलिय, “पतन भेलइ! महान बेबिलोन सहरवा धुचुड जनि नहिँया हखिय। उअ जाति-जतिक मन्सावानिके यापन खराब इछा लागल चिजु करके परमेस्वरके आराधनाके रोकसिय।” 9 वकरपाछा तिसरि स्वरगदुतवा जबड स्वरसे यसके कहते हुनुकर पाछा लगलिय, “यगर कुनहुँ मन्से उअ पसुवा हसे वकर मुरतियाके पुजा करबिय तके लिलरावामा कि हथवामा वकर छाप लगोबिय जउँ, 10 हुनुका परमेस्वरक जबड दन्ड सहे परतइ हसे हुने दाया बिना हुनुकाके सजाय देबसि। परमेस्वर हुनुकाके पवितर स्वरगदुतसभ हसे पाठाक यागा यागि तके गन्धकक भठियामा फाँकदेबसि। 11 हुनुकाके डहोना यागिक धुववा सबदिन वपरावरि उडियाके जाइरहतइ। उअ पसुवा हसे वकर मुरतियाके पुजा करलहरा तके वकर नाउँक छाप लगोलहराह दिन-रात कबहुँ फेनि बिसाए नाहिँ पउतइ।” 12 उहेसे परमेस्वरक आग्यासभ पालन करलहरा हसे येसुमा विस्वास करलहरा परमेस्वरक जनसभमा सहेके सक्ति हखे परतइ। 13 तब स्वरगसे यसके कहइकि स्वर मुइ सुनलहिँ, “इअ लिखहि: याबेसे जतेक जन विस्वास करके प्रभुक सेवा करइकि मरतइ, हुनुका धन्यक हखइ।” पवितर-आत्मा यसके कहससि, “इअ सत्य हखइ, हुनुका यापन-यापन दुःखक परिसरमसे बिसाए पउतइ, केहकेकि हुनुकर करलि असल कामक इनाम हुनुका पउतइ।” धरतियामा यन्न कटनिक जुन 14 तब मुइ फेरि हेरलहिँ, एगुडा गोरहर बादर हसे वकर वपरा बेठल मन्सेक पुतर नहिँया एक जनके देखलहिँ, जाकर मुडवामा सोनक मकुट रहलइ तके हथवामा तधार हसुवा रहलइ। 15 एगुडा दोसरे स्वरगदुत परमेस्वरक मन्दिरवासे बाहरा यलिय हसे बदरिया वपरा बेठलाहर जबड स्वरमा यसके कहलिय, “यपनहुँक हसुवा लेहुँ तके कटनि करहुँ, केहकेकि कटनिक जुन यासकल बडइ। धरतियाक बलिया पाकसकल बडइ।” 16 यसने बदरिया वपरा बेठलहरा यापन हसुवा बोकके धरतियाक यन्न कटलसि। 17 स्वरगमा भेलि परमेस्वरक मन्दिरवासे एगुडा दोसरे स्वरगदुत बाहरा यलिय। वकर हथवामा फेनि एगुडा तधार हसुवा रहलइ। 18 तब वेदियासे दोसरे स्वरगदुत यलिय, जाकर यगिया वपरा अधिकार रहलइ। तधारि हसुवा लेलहरवाके जबड स्वरमा उअ यसके कहलिय, “तोर तधारि हसुवावा चलोहि हसे धरतियाक अंङगुरवाक झ्वाखवासभ जामा करहि, केहकेकि धरतियाक अंङगुरवा पाकसकल बडइ।” 19 उअ स्वरगदुतवा यापन हसुइया धरतियामा चलोलिय हसे धरतियाक अंङगुरवाक झ्वाखवासभ जामा करलिय तके अंङगुर पेलना कोल्हमा घाललइ, इअ मन्सावानिके परमेस्वरक डर लगना दन्ड देना बात हखइ कहके बुझोसिय। 20 सहरवाक बाहरा भेलि कोल्हवामा उअ अंङगुरवा पेलेलइ हसे कोल्हवासे रकत निकडके बहलइ। उअ रकतवा घोडवाक घेन्टियालइ पुगे जोकर गहिर रहलइ हसे तिन सय किलोमिटरलइ बहलइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.