प्रकास 12 - चितवनिया थारुजनि हसे यजिगर 1 तब स्वरगमा एगुडा जबड चिन्हा देखा परलइ। एगुडा जनियानि बेरियाक लुगा पेहरले रहलिय, वकर टङवातर जोन्ह हसे मुडियामा बारह गो तरगनक मकुट रहलइ। 2 उअ भारदेहि रहलिय हसे हलुकइना बेथा लागके चिल्लाइ रहलिय। 3 वकरपाछा स्वरगमा दोसर एगुडा चिन्हा देखा परलइ। मुइ सात गो मुड, दस गो सिङ भेल एगुडा जबड लाल यजिगर देखलहिँ। वकर सात गो मुडवामा एकहक गो मकुट रहलइ। 4 वकर पुछियासे स्वरगक तिन भागक एक भाग तरगनसभके सोहरके धरतियामा फाँक देलिय। छोकनिया जन्मतेकि वकरेके खाएके तहिँया उअ यजिगरवा बेथा लगलि जनियावाक यागा ठडियलिय। 5 उअ जनियावा जम्मे जतियानिके लोहक लाठिमाहे सासन करलाहर एगुडा बेटा जरमोलिय। वकर बेटवाके उठाके परमेस्वर लघिना हुनेक सिंहासनमा लिगेलइ। 6 उअ जनियावा उराठ-ठउरिवरि भगलिय, जहवाँ एक हजार दु सय साठि दिनलइ वकर पालन-पोसन हखइ कहके परमेस्वर वकर तहिँया ठउरि तयार करले रहलसि। 7 तब स्वरगमा लडाइ भेलइ। मिखाएल हसे वकर याको स्वरगदुतवासभ उअ यजिगरवासाङे लडाइ करलइ। यजिगरवा हसे वकर दुतवाह फेनि लडाइ करलइ। 8 बाकि यजिगरवा हसे वकर दुतवाह हरलइ तके स्वरगमा हिनिकर तहिँया रहना ठउरि हइने भेलइ। 9 उअ जबडि यजिगरवा तर फकेलिय। उअ सुरुक साँप हखिय, उहे इअ धरतियाक मन्सावानिके बहकोसिय। वकर नाउँ दुस्टक राजा कि सइतान हखइ। उअ धरतियामा फकेलिय हसे वकर दुतवाह वकर साङे-साङे फकेलिय। 10 तब मुइ स्वरगमा यसके कहइकि एगुडा जबड स्वर सुनलहिँ, “याबे हमार परमेस्वरक मुक्ति, सक्ति, राज हसे ख्रिस्ट यापन सासन करना अधिकार देखोले बडसि। केहकेकि हमार विस्वासि भयवानिके दोस लगोलहर, जुने हमार परमेस्वरक यागा हुनुकाके दिन-रात दोस लगोलहरा सइतनवा स्वरगसे फकाइल बडिय। 11 हमार विस्वासिसभ पठवाक रकत हसे गवाहिक करनसे सइतनवाके जितले बडइ हसे हुनुका यापन जिवन देवेके फेनि तयार रहलइ। 12 उहेसे तोहरा स्वरगमा रहलहराह, जम्मे जन खुसि हखह, बाकि धरति हसे समुनदरवाके धिकार बडइ! केहकेकि यापन जुनवा वराइ बडइ कहके थाह पाके सइतनवा खाँ खिसियाके तोहार लघिना तर याइल बडिय।” 13 जब उअ यजिगरवा यपनहिँके धरतियामा फकाइल देखलिय, तब यजिगरवा बेटा जरमोलरि जनियावाके खेदलिय। 14 उअ जनियावाके यजिगरवासे बचके उराठ-ठरियामा भेलि यापन रहनवा ठउरियामा उडियाके जायके तहिँया जबड चिलक नहिँया दु गो डयना दियाइल रहलइ। वहवाँ साढे तिन बरसलइ उअ जनियावेके पालन-पोसन करेके तहिँया ठउरि तयार पारल रहलइ। 15 तब उअ जनियावाके बढिया बहोइय कहके यजिगरवा यापन मुहवासे खोला नहिँया पानि निकडोलिय। 16 बाकि धरतिया उअ जनियावाके मदत करेके तहिँया यापन मुहवा खोलके यजिगरवाक मुहवासे निकडोलि पनिया लिललिय। 17 तब यजिगरवा उअ जनियावासे खाँ खिसेलिय हसे उअ वकर दोसरि सन्तानवासाङे लडाइ करे गेलिय। हुनुका परमेस्वरक आग्या पालन करलाहर तके येसुजिक हखहुँ कहके गवाहि देसइ। 18 उअ यजिगरवा समुनदरवाक धरियावामा ठडियलिय। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.