प्रकास 1 - चितवनिया थारुभुमिका 1 इअ कितबवामा भेलि बतवा येसु ख्रिस्ट परकट करले हखसि। परमेस्वर हलहालि हखना घटनाक बारेमा यापन सेवकसभ बुझइ कहके येसुजिके इअ थाह देले बडसि। येसुजि इअ बतवा फदकेके तहिँया एगुडा स्वरगदुतके यापन सेवक युहन्ना लघिना पठोलसि। 2 मुइ युहन्ना परमेस्वरक वचन हसे येसु ख्रिस्टक बारेमा समाद तके उअ सङहि मोर देखलि हसे सुनलि जम्मे बतवाक गवाहि देइ बडहिँ। 3 उअ धन्यक हखिय, जुने अगमवाडिक इअ वचनसभ जबड स्वरमा पढसिय हसे सुन्नसइ तके वकरमा लिखलि बतवा पालन करसइ, केहकेकि इअ बतवा पुरा हखेके जुन लजिके बडइ। सात गो मन्डलिके युहन्नाक अभिवादन 4 एसिया छेतरमा भेलि सात गो मन्डलियानिके मुइ युहन्नाक अभिवादन: परमेस्वर जुने बडसि, जुने रहलसि हसे जुने यबसि तके हुनेक सिंहासनक यागा रहलाहर सात गो परमेस्वरक आत्मासे तोहराके अनुग्रह हसे सान्ति हखइ। 5 विस्वासयोग्य साछि हसे मरलिसे जिउतलहरमा पहिला हखलाहर धरतियाक राजासभक राजा हमार प्रभु येसु ख्रिस्टवरिसे तोहराके अनुग्रह हसे सान्ति मिलइ। हुने हमराके प्रेम करससि हसे यापन रकतसे हमार पापसे छुटकारा देले बडसि। 6 हुने हमराके यापन राजक परजा बनोले बडसि हसे यापन पिता, परमेस्वरक सेवा करेके तहिँया पुजेरि बनोले बडसि। येसु ख्रिस्टक महिमा हसे अधिकार सबदिन रहइ। आमेन। 7 हेरह, हुने बदरियामा यवइ बडसि। हुनेके छिदलहरा हसे याको जम्मे जन फेनि हुनेके देखतइ। धरतियामा भेलि जम्मे जतियाक मन्सावाह हुनेक तहिँया सोक करतइ। सदियो यसने हतइ। आमेन। 8 “अल्फा हसे ओमेगा मोहिँ हखहि,” कहके सरवसक्तिमान परमप्रभु परमेस्वर कहससि। हुने बडसि, हुने रहलसि हसे हुने यबसि। प्रभु येसु ख्रिस्टक दर्सन 9 मुइ युहन्ना, ख्रिस्टमा तोहार ददेर हखहि। येसुमा विस्वास करलेसे मुइ तोहारसाङे सहसान भके दुःख सहले बडहिँ, जुन दुःख हुनेक राजमा हखलहराहमा फेनि यतइ। मुइ परमेस्वरक वचन हसे येसुक बारेमा गवाहि देलेसे मन्सावाह मोरके पत्मोस कहल ठिसवामा रखले रहलइ। 10 एक दिन प्रभुक आराधना करना दिनवामा मुइ पवितर-आत्मासे भरल रहलहिँ हसे मोर पाछावरिसे एगुडा धुतुहा नहिँया जबड स्वरमा मुइ यसके कहइकि सुनलहिँ। 11 उअ स्वरवा यसके कहलिय, “तुइ यापन सुनलि बतवा एगुडा किताबमा लिखके इअ सातु सहरवाक मन्डलियानिके पठोसि: एफिसस, स्मुरना, परगामम, थियाटिरा, सारडिस, फिलाडेल्फिया हसे लाउडिकिया।” 12 मोरसाङे फदकेलहरा कुने हखिय कहके मुइ पाछावरि घुमके हेरलहिँ। मुइ डिबरि धरना सात गो सोनक डिबरि धरना देखलहिँ। 13 मुइ डिबरिया धरनावाक बिचा मन्सेक पुतर नहिँया टङवालइ नमहर लुगा पेहरल हसे छतियामा सोनक पेटि बान्हल एक जन मन्से देखलहिँ। 14 हुनेक मुडवा हसे केसवा उन तके हिउँ नहिँया गोरहर रहलइ हुनेक यखिया यागिक धिधोर नहिँया रहलइ। 15 हुनेक टङवा यागिक भठिमा खारके टल्कावल कासक नहिँया रहलइ हसे हुनेक स्वर जबड लदिक पानिक मचाल नहिँया रहलइ। 16 हुने दहिनि हथवामा सात गो तरगनसभ पकडले रहलसि हसे हुनेक मुहवासे तधार दु गो धार भेल तरवार निकडल रहलइ। हुनेक मोहडवा दिनाक बेरिया नहिँया चहकार रहलइ। 17 हुनेके देखके मुइ मरल नहिँया भेलहिँ हसे हुनेक पाउमा परलहिँ, तब हुने मोरमा यापन दहिनि हथवा रखते यसके कहलसि, “झिन डेराहि, सुरु हसे यन्त मोहिँ हखहि। 18 जिउते रहलाहर मोहिँ हखहि। मुइ मरल रहलहिँ, बाकि याबे सबदिनक तहिँया जिउते बडहिँ, मृत्यु हसे पतालक चाभि मोर हथवामा बडइ। 19 उहेसे तुइ यापन देखलि बतवा लिखसि। यखनि हसे पाछे हखना जम्मे घटनावा लिखसि। 20 मोर दहिनि हथवामा तोर देखलि इअ सात गो तरगनसभ हसे सोनक इअ सात गो डिबरि धरनाक रहस्य इअ हखइ: सात गो तरगनसभ सात गो मन्डलिसभक हेरचाह करलाहर स्वरगदुतसभ हसे सात गो डिबरि धरना कहले सात गो मन्डलिसभ हखइ।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.