फिलिप्पि 4 - चितवनिया थारु1 उहेसे मोर प्रियसभ, मुइ तोहराके प्रेम करसहिँ हसे तोहराके भेटेके इछा करसहिँ। तोहराहिँ मोरके आनन्द देले बडह हसे तोहराहिँ मोर कामक इनाम हखह। मोर प्रियसभ, तोहरा प्रभुमा डटके रहिह। 2 मुइ इयोदिया हसे सन्तुखेके प्रभुमा एक मनक हखिह कहके तोहराके बिन्ति करइ बडहिँ। 3 मोर विस्वासयोग्य सहकरमि, मुइ तोहराके बिन्ति करइ बडहिँ कि, इअ दु जन जनिनियानिके मदत करिह, केहकेकि हुनुका मोरसाङे सुसमाचार सुनावेके काममा क्लेमेससाङे हसे मोर याको बाँकि रहलि सहकरमिसभसाङे मेहनत करले बडइ, उअ जम्मे मन्सावानिक नाउँ परमेस्वर यापन कितबवामा लिखले बडसि, जुने सबदिन जियतइ। 4 तोहार प्रभुसाङे सम्बन्ध भेलेसे सबदिन आनन्द मनोइह! मुइ फेरि कहइ बडहिँ, आनन्द मनोइह! 5 तोहरा डउल व्यबहार करसह कहके जम्मे मन्सावाह जनइ। प्रभु हलहालि यबसि। 6 किहो चिजुक फेनि चिन्ता झिन करिह, बाकि तोहराके चाहि लगना चिजु परथानामा परमेस्वरके कहिह हसे हुनेक करलि जम्मे चिजुक तहिँया धन्यवाद दिह। 7 परमेस्वर तोहार मनवामा सान्ति देबसि, केहकेकि येसु ख्रिस्टमा तोहरा एक भेल बडह। इअ सान्ति तोहार बुझे सकलिसे जबड बडइ। इअ तोहार हृदय हसे मनवाके चिन्तासे बचोबिय। 8 याखिरमा प्रियसभ, जथि सत्य बडइ, जथि महत्वपुरन बडइ, जथि ठिक बडइ, जथि न्यायसङगत बडइ, जथि सुद्ध बडइ, जथि प्रेम योग्य बडइ, जथि यादरनिय हसे प्रसंसाक योग्य बडइ इहे चिजुवामा मन लगोइह। 9 तोहरा मोरसे सिखले बडह हसे जथि मुइ सिखोले बडहिँ उअ स्विकार करले बडह। तोहरा मोर कहलि सुनलह हसे मोर व्यबहार देखले बडह। तोहरा मोरसे पउलि सिछा पालन करिह हसे सान्ति देलाहर परमेस्वर तोहारसाङे रहबसि। भेटिक तहिँया धन्यवाद 10 प्रभुमा मुइ खाँ आनन्दित बडहिँ कि, याबे बहुत दिन पाछा तोहरा मोर वास्ता फेरि करइबडह। यकर मतलब तोहरा मोरके वास्ता हइने करलह कहके हइने हखइ, बाकि तोहरा पइसा पठाके मोरके मदत करेके मउका हइने पउलह। 11 मोर खाँचो परलइ कहके मुइ लिखइ हइने हखहि, केहकेकि जसनुक अवस्थामा भेले फेनि वकरमा सन्तुस्ट रहेके मुइ सिखले बडहिँ। 12 खाँचो परले ताफेनि हसे प्रसस्त भेले ताफेनि कस्के जिवन चलावेके कहके मुइ जनले बडहिँ। मुइ यघइले फेनि हसे भुखइले फेनि, बहुत कि इचिके हखइ, जम्मे परिस्थिमा सन्तोख भके जिएके सिखले बडहिँ। 13 ख्रिस्टक देलि सक्तिमा मुइ इअ जम्मे चिजु करे सकबहि। 14 ताफेनि मुइ कस्टमा परइकि मदत करके तोहरा यसल करलह। 15 तोहरा फिलिप्पिक मोर सङहतिवानिक थाह बडइ कि, पहिला मुइ तोहराके सुसमाचार परचार करलहिँ, वकरपाछा माकेडोनिया छेतर छाडके जाइकि मोरके मदत करलाहर मन्डलि तोहरा मतरे रहलह। मोरसाङे लेनदेन करलाहर तोहरा मतरे रहलह। इअ बतवा तोहरा फिलिप्पिक मन्सावासभक थाह बडइ। 16 मुइ थेसलोनिके सहरवामा रहइकि मोर खाँचो परइकि तोहरा मोरके एक-दु पारि मदत करलह। 17 मुइ तोहारसे भेटि पउबहि कहके हइने, बाकि तोहरा मदत करलेसे परमेस्वर तोहराके आसिस दिय कहके मुइ इछा करसहिँ। 18 मुइ पावे परनासे फेनि बढि पउले बडहिँ। इपाफ्रोडिटसक हथवासे तोहार पठादेलि भेटिसभ पउलेसे मोर चाहि लगना जम्मे चिजु मुइ पउले बडहि। इअ मोर तहिँया बहुत हखइ। उअ परमेस्वरक मन परना सवाद बसान भेटि हखइ। हुने इअ गरहन करससि हसे हुने बहुत खुसि हखससि। 19 जुन परमेस्वरक सेवा मुइ करसहिँ, हुने तोहार जम्मे खाँचो पुरा करदेबसि। हुनेक प्रसस्त धन-सम्पतिसे तोहार चाहि लगना जम्मे चिजु देबसि, केहकेकि तोहरा येसु ख्रिस्टक हखह। 20 हमार परमेस्वर हसे पिताके सबदिन महिमा हखइ। आमेन। याखिर अभिवादन 21 येसु ख्रिस्टमा भेलि जम्मे परमेस्वरक जनके मोर अभिवादन बडइ। यहवाँ मोरसाङे रहलहरा जम्मे भयवाह तोहराके अभिवादन पठोले बडइ। 22 जम्मे परमेस्वरक जन, बिसेस करके रोमि रजवाक दरबरवामा रहलहरा तोहराके अभिवादन पठोले बडइ। 23 प्रभु येसु ख्रिस्टक अनुग्रह तोहार आत्मासाङे रहइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.