फिलिप्पि 3 - चितवनिया थारुदेहियामा भरोसा झिन रखिह 1 याखिरमा मोर प्रियसभ, प्रभुमा आनन्दित हखिह। तोहराके उहे बतवा घर-घराहे लिखेके मोर झन्झट हइने लगसइ हसे इअ बतवा तोहार सुरछाक तहिँया हखइ। 2 दुस्ट मन्सावानिसे हुसियार रहिह जुने कुकुरसभ हखइ, केहकेकि मन्सावा खतना नाहिँ करबिय जउँ, उअ उद्धार नाहिँ पउबिय कहके हुनुका जोड देसइ। 3 केहकेकि परमेस्वर एकपल्टा हमराके सदि खतना भेल मन्सेसभ नहिँया मनले रहलसि, केहकेकि हमरा परमेस्वरक आत्माक मदतसे हुनेक आराधना करसहुँ हसे येसु ख्रिस्टमा गरव करसहुँ। हमरा मन्सेसभक बनावल रितिथितिमा भरोसा करे परतइ कहलि हइने मनसहुँ। परमेस्वरक गरहनयोग्य हखेके तहिँया हमरा उअ रितिथितिसभमा भरोसा हइने करसहुँ। 4 जथि भेले फेनि, यगर ककरोसाङे रितिथितिसभमा भरोसा करेके कारन बडइ जउँ, मोरसाङे भरोसा रखना कारन बडइ। सदियो, हुनुकरसे मोरसाङे झन बहुत भरोसा रखना कारन बडइ। 5 जरमलिक याठ दिनमा मोर खतना भेल हखइ। मुइ इस्राएलक जाति, बेन्यामिन कुलक, हिब्रुसे जरमल हिब्रु हखहि। व्यवस्थाक बिसयमा कहले जउँ, मुइ एगुडा फरिसि हखहि। 6 मुइ यहुदि व्यवस्थामा यतुरा उत्साहित रहलहिँ कि, जुने ख्रिस्टमा विस्वास करले रहलइ हुनुकाके मुइ खाँ सतोलहिँ। यगर कुनहुँ गल्ति नाहिँ करके पुरा रुपमा आग्या पालन करतइ जउँ, मुइ निरदोस रहलहिँ। 7 बाकि जथि बात मोर तहिँया फाइदाक रहलइ, उअ त ख्रिस्टक खातिर हानि ठानलहिँ। 8 सदियो कहले येसु ख्रिस्ट मोर प्रभु हखसि कहके चिने पावेके बहुमुल्य बातक तुलनामा मुइ जम्मे चिजुके बेकामक ठानसहिँ। हुनेके पावे सकहि कहके मुइ जम्मे चिजु त्याग देले बडहिँ हसे उअ जम्मे चिजु घुर नहिँया सम्झसहिँ, 9 ताकि मुइ हुनेमा एक हखे सकुँ। व्यवस्था मानके परमेस्वरक यागा मुइ धरमि हखे नाहिँ सकबहि, बाकि ख्रिस्टमा विस्वास करके मतरे परमेस्वर मोरके धरमि कहबसि। 10 मुइ ख्रिस्टके हसे हुनेक पुनरुत्थानक सक्तिके डउलसे जाने सकुँ हसे हुनेक मृत्युमा हुने नहिँया भके हुनेक दुःखवामा सहभागि हखे सकुँ। 11 कसहुँकरके मरलहरानि मधेसे मुइ पुनरुत्थान हखे सकुँ। लछयवरि यागा बढिह 12 मुइ जम्मे यगाहे चिजु करसकलहि कि, मुइ सिद्ध भेसकलहि कहके हइने कहइ बडहिँ, बाकि मुइ उअ चिजुवा पकडेके तहिँया यागा बढइ बडहिँ, जुन चिजुक तहिँया ख्रिस्ट मोरके छानलसि। मुइ हुनेक नहिँया हखे सकहि कहके छानलसि। 13 प्रियसभ, मुइ इअ चिजुसभ पुरा करसकलेसे मुइ ख्रिस्ट नहिँया भेलहिँ कहके हइने ठानसहिँ, बाकि मुइ एगुडा काम करबहिँ कि, पाछाक बात बिसराके यागा भेलि चिजुवा पावेके कोसिस करसहिँ। 14 मुइ लछयवरि मेहनत करके दगुरइ बडहिँ, केहकेकि येसु ख्रिस्ट मोर तहिँया उअ पुरस्कार पावेके जथि करले बडसि, उअ परमेस्वरक स्वरगिय बोलावटमा हखइ। 15 हमरा जतेक जन आत्मिकि रुपमा पाका बडहुँ वसने विचार करहि परतइ हसे कुनहुँ यकरसे फरक विचार करबह जउँ, तोहार तहिँया कथि ठिक बडइ परमेस्वर उअ फेनि तोहराके परकट करदेबसि। 16 बात जथि भेले फेनि, परमेस्वरसे हमरा जथि सदि सिछा पउले बडहुँ, उहे यनुसार जिवन बिताउ। 17 भयवाह, मुइ जथि करसहिँ तोहरा उहे करिह। हमरा तोहार तहिँया यसल उदाहरन भेल बडहुँ। उहे यनुसार चललाहरा मन्सावानिके तोहरा ध्यान दिह। 18 मुइ तोहराके पहिला घर-घराहे कहले रहलहिँ, यखनि फेनि कनते कहइ बडहिँ कि, बहुत जन मन्सेसभ ख्रिस्टक क्रुसक सतरु नहिँया जिवन बितोइ बडइ। 19 विनास हुनुकर यन्त हखइ, हुनुकर पेटवा हुनुकर देउता हखइ, लाज माने परना बातमा हुनुका घमन्ड करसइ। हुनुका यापन मनवा धरतियाक चिजुमा लगोले बडइ। 20 बाकि हमरा त स्वरगक नागरिक हखहुँ, वहवाँसे यलहर मुक्तिदाता हमार प्रभु येसु ख्रिस्टक पइडा हमरा हेरइ बडहुँ। 21 हुने यापन सक्तिसे जम्मे चिजुके अदलमा याने सकबसि। हुनेक इहे सक्तिसे हमार मरनसिल देहियाके यपने महिमाक देहि नहिँया बदल देबसि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.