फिलिप्पि 2 - चितवनिया थारु1 तोहरा ख्रिस्टमा एक भेलेसे उत्साह पउले बडह कहके तोहार थाह बडइ, हुनेक प्रेमसे तोहरा सान्त्वना पउले बडह हसे पवितर-आत्मासाङे सङगति पउले बडह। तोहारसाङे एक-दोसरि जनक तहिँया प्रेम हसे दाया फेनि बडइ। 2 केहकेकि इअ जम्मे चिजुसभ सत्य बडइ, उहेसे मुइ तोहराके एक-दोसरि जनसाङे सहमति हखिह कहके बिन्ति करबहिँ, एक-दोसरि जनके प्रेम करिह हसे एक चित भके सङहि काम करिह। यगर यसके करबह जउँ मोर आनन्द पुरा हतइ। 3 दोसरे जनसे यपनहिँके जबड बनावेके कोसिस कबहुँ झिन करिह हसे घमन्डसे फुलके किहो झिन करिह, बाकि नम्र हखिह हसे याको जनके यापनसे यसल सम्झिह। 4 तोहरा हरेक जन यापन मतरे भलाइ झिन खोजिह, बाकि दोसरे जनक भलाइक तहिँया फेनि ध्यान दिह। 5 तोहार यसनुक स्वभाव हखइ, जसने येसु ख्रिस्टक रहलइ। 6 हुने वास्तवमा परमेस्वर रहलसि, बाकि परमेस्वरक बराबर यापन अधिकार बनोबहिँ कहके बलजफति हइने करलसि। 7 हुने परमेस्वरसाङे बराबर हखना जम्मे चिजु त्यागलसि हसे कमाराक रुप धारन करलसि। हुने मन्से भके जरमलसि। 8 वसने मन्सेक रुप धारन करके हुने यपनहिँके नम्र बनोलसि, हसे मृत्युलइ मतरे हइने, क्रुसक मृत्युलइ आग्याकारि भेलसि। 9 उहेसे परमेस्वर हुनेके सबसे उँच ठउरिमा राखके महान बनोलसि हसे हुनेके उअ नाउँ देलसि, जुन हरेक नाउँसे सबसे महान हखइ। 10 कि, स्वरगमा, धरतिया वपरा हसे धरतिया तर भेलि जम्मे जन येसुजिक नाउँमा ठेहुनाय परतइ। 11 हरेक जन परमेस्वर पिताक महिमाक तहिँया येसु ख्रिस्टके प्रभु कहके स्विकार करे परतइ। संसारमा भेल ज्योतिसभ 12 उहेसे मोर प्रिय भयवाह, मुइ तोहारसाङे रहइकि तोहरा मोर बतवा सबदिन मनलह, याबे मोर उपस्थितिमा मतरे हइने, बाकि तोहरा परमेस्वरक झन बढता यादर हसे डर मनते, तोहरा मुक्ति पउले बडह कहके देखावेके तहिँया खाँ डउलसे मेहनत करिह, जुन तोहार विस्वासक प्रतिफल हखइ। 13 केहकेकि परमेस्वर तोहारमा काम करइ बडसि। हुने तोहराके हुनेक यसल उदेस्यक काम पुरा करेके इछा हसे सक्ति दुन्हु देबसि। 14 जम्मे कमवा गनगन हसे ठोरा-बोलि नाहिँ करके करिह। 15 उहेसे तोहरा बइमान हसे दुस्ट पुस्ताक बिचा दाग हइने भेल परमेस्वरक सन्तान नहिँया निरदोस हसे सुद्ध हखिह। जसने तरगनवा यकसवामा चमकसइ, वसने तोहरा फेनि इअ संसारमा हुनुकर बिचा चमके परतइ। 16 तोहरा अनन्त जिवन देना खुसिक समाद मन्सावानिके सुनोइह। यसके करबह जउँ, मोर दुःख सहते करलि कमवा वसहि हइने गेलइ कहके ख्रिस्ट यवइकि मुइ गरव करे सकबहि। 17 तोहार चढोलि विस्वासक भोगवामा मुइ यापन रकत भोगक रुपमा बहावे परले, ताफेनि मुइ यकरमा खुसि बडहिँ हसे मोर खुसिमा तोहरा फेनि सहभागि हखिह। 18 वसने तोहरा फेनि खुसि हखिह हसे मोरसाङे आनन्द मनावे सकह। तिमोथि हसे इपाफ्रोडिटस 19 यगर प्रभु येसुजिक इछा बडइ जउँ, मुइ तोहार लघिना तिमोथिके हलहालि पठावेके यासा करइ बडहिँ, ताकि तोहार हालखबर पाके मुइ फेनि खुसि हखे सकुँ। 20 तिमोथि नहिँया तोहार वास्ता करलाहर यसल मन्से त मोरसाङे याको कुनहुँ हइने बडइ। 21 याको जम्मे भयवाह त यपने भलाइ मतरे खोजसइ, येसु ख्रिस्ट कथि कहइ बडसि उअ बतवाक बारेमा कुनहुँ फेनि वास्ता हइने करसइ। 22 तिमोथिक व्यबहार यसल बडइ कहके तोहार थाह बडइ, सुसमाचार परचारक काम उअ मोरके कस्के साथ देलिय कहके तोहरा देखले बडह, जसने बेटवा यापन बाबाके साथ देसइ। 23 उहेसे मुइ यासा करइ बडहिँ कि, यापन बारेमा थाह पउतेकि मुइ तिमोथिके तोहार लघिना पठादेबहिँ। 24 मोर प्रभुमा पुरा भरोसा बडइ कि, मुइ तोहार लघिना यपनहिँ हलहालि यबहिँ। 25 इपाफ्रोडिटस भयवाके मुइ तोहार लघिना पठावेके आवस्यक देखलहिँ। हमरा दुन्हुँ जन सङहि काम करलहुँ हसे सुसमाचार सुनावेके काममा सिपाहि नहिँया दुःख भोगलहुँ। उअ तोहार दुत हखिय, जकरेके मोर मदतक तहिँया तोहरा पठोले रहलह। 26 तोहरा जम्मे जनके भेटेके वकर खाँ इछा बडइ। उअ मनियाइल बडिय कहलि बतवा तोहरा सुनले बडह कहके उअ चिन्ता करइ बडिय। 27 सदि उअ खाँ मनियाइल रहलिय हसे मरहिँ खोजइ रहलिय, बाकि परमेस्वर वकरेके दाया करलसि। वकरेके मतरे हइने, बाकि मोर दुःखवा वपरा दुःख झिन थपाइ कहके मोरके फेनि दाया करलसि। 28 उहेसे वकरेके तोहार लघिना पठावेके मुइ खाँ इछा करले बडहिँ, ताकि वकरेके फेरि देखके तोहरा खुसि हखबह हसे मोर चिन्ता फेनि कम हतइ। 29 प्रभुमा वकरेके विस्वासि भाइ समझके मन खोलके स्वागत करिह हसे यसने मन्सेसभके यादर करिह। 30 केहकेकि ख्रिस्टक कामक तहिँया उअ धन्नेसे मरे चहलिय। तोहार सटहामा मोरके मदत करेके तहिँया उअ यापन जिवन खतरामा धरलिय, केहकेकि तोहरा तनाउ रहलह। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.