फिलिप्पि 1 - चितवनिया थारु1 येसु ख्रिस्टक दास पावल हसे तिमोथिवरिसे, फिलिप्पि सहरवामा रहलहरा परमेस्वरक उअ पवितर जनसभ जुने येसु ख्रिस्टमा एक भेल बडइ, मन्डलिक बिसपसभ हसे डिकनसभके इअ चिठिया लिखइ बडहुँ। 2 हमार परमेस्वर पिता हसे प्रभु येसु ख्रिस्ट तोहराके अनुग्रह हसे सान्ति दिय। धन्यवाद ग्यापन हसे परथाना 3 जखनि मुइ तोहराके सम्झसहिँ, मुइ परमेस्वरके सबदिन धन्यवाद देसहिँ जकरेके मुइ आराधना करसहिँ। 4 तोहार जम्मे जनक तहिँया परथाना करइकि मुइ आनन्दसे सबदिन परथाना करसहिँ। 5 केहकेकि तोहरा सुरुसे यखनिलइ सुसमाचारक काममा सझिया बडह। 6 मुइ निस्चित बडहिँ कि, परमेस्वर विस्वासयोग्य बडसि। तोहारमा जथि यसल काम हुने सुरु करले बडसि, हुनेहिँ येसु ख्रिस्ट यइना दिनवामा उअ पुरा करबसि। 7 मुइ झ्यालखनवामा हसे बाहरा रहइकि तोहरा जम्मे जन मोरसाङे सुसमाचार फइलावेके काममा सहभागि भेल बडह। इअ काम परमेस्वर दाया करके देले हखसि। उहेसे मुइ तोहरा जम्मे जनके यापन हृदयमा रखले बडहिँ। इअ करेके तहिँया मोर ठिक लगलइ। 8 इअ बिसयमा परमेस्वर मोर साछि बडसि कि, तोहरा जम्मे जनके फेरि देखेके खाँ इछा रहलइ, केहकेकि मुइ तोहराके प्रेम करसहिँ, जसने येसु ख्रिस्ट प्रेम करससि। 9 मोर परथाना इअ बडइ कि, तोहरा प्रेम हसे ठिक-बेठिक छुटियावेके बुद्धिमा झन-झन बढते जइह। 10 ताकि तोहरा सबसे यसल कथि हखइ उअ छुटियावे सकह हसे ख्रिस्ट यइवकि तोहरा सुद्ध तके निरदोस हखे सकह। 11 येसु ख्रिस्ट तोहराके सक्ति देलेसे सबदिन यसल चरितर देखावे सकह, केहकेकि ख्रिस्टमा तोहरा एक भेल बडह। यसनेकरके मन्सावाह तोहार जिवनमा यसल काम देखतइ हसे हुनुका परमेस्वरक यादर तके प्रसंसा करतइ। सुसमाचार फइलते गेलइ 12 अरे भयवाह, तोहरा इअ जनह कहके मुइ चाहसहिँ कि, जथि खराब चिजु मोरमा यहवाँ घटलइ, वकरसे बहुत मन्सेसभके ख्रिस्टक बारेमा यसल समाद सुनेके मदत पुगल बडइ। 13 मुइ ख्रिस्टक बारेमा परचार करलेसे झ्यालखनवामा परल बडहिँ कहके दरबारवाक जम्मे सिपहियवानिके हसे याको जनक थाह बडइ। 14 मुइ झ्यालखनवामा परलेसे बहुत भाइसभ यखनि प्रभुमा झन भरोसा करलइ। यखनि हुनुका परमेस्वरक वचन परचार करेके झन सहास पउले बडइ। 15 हखेके त कुनहुँ-कुनहुँ डाह करके याको जनसे बढता करलहिँ कहके देखावेके तहिँया ख्रिस्टक बारेमा परचार करसइ, बाकि कतेक जन यसल विचारसे परचार करसइ। 16 मुइ सुसमाचारक सुरछाक तहिँया यहवाँ झ्यालखनवामा बडहिँ कहके जनलहरा इअ कमवा हुनुका प्रेमसे करसइ। 17 याको जन सोझ मनसे हइने बाकि मोरके झ्यालखनवामा झन दुःख देवेके तहिँया स्वारथि मनसे ख्रिस्टक बारेमा परचार करसइ। 18 जथि हखइ, चाहे यसल मनसे, चाहे हइने डउल मनसे, जसके भेले फेनि ख्रिस्टक बारेमा परचार हखइ रहइ। यकरेमा मुइ आनन्दित बडहिँ हसे आनन्दित हखते रहबहिँ। 19 केहकेकि मोर थाह बडइ कि, तोहार परथानासे हसे येसु ख्रिस्टक आत्माक मदतसे मुइ छुटकारा पउबहि। 20 मोर खाँ इछा हसे यासा इअ बडइ कि, मुइ कबहुँ नाहिँ लजेबहिँ, बाकि जखनि फेनि, बिसेस करके यखनि, मोरमा प्रसस्त सहास हतइ। मुइ मरले फेनि, बचले फेनि मोर जिवनसे सबदिन ख्रिस्टक यादर हतइ। 21 केहकेकि मुइ जियले फेनि ख्रिस्टक तहिँया जियबहिँ, बाकि मुइ मरेले फेनि मोर तहिँया यसल हतइ। 22 यगर मुइ जियइ रहबहिँ जउँ, ख्रिस्टक तहिँया झन यसल काम करे सकबहि। बाकि मुइ कथि छानेके मोर हइने थाह बडइ। 23 मोर इअ दुन्हुक बिचा निरनय करेके गारह भेलइ। इअ संसारसे बिदा लेके ख्रिस्टसाङे रहेके इछा बडइ, केहकेकि इअ मोर तहिँया खाँ यसल बडइ। 24 बाकि तोहार तहिँया मुइ इअ धरतियामा बचइ रहेके झन आवस्यक बडइ। 25 मोर इअ पाका थाह बडइ। तोहार विस्वास हसे आनन्द याको बढावेके मुइ जियबहिँ हसे तोहार जम्मे जनसाङे रहबहिँ। 26 मुइ तोहार लघिना फेरि यवइकि, मोर कारनसे तोहरा येसु ख्रिस्टमा याको गरव करेके प्रसस्त कारन हखइ। 27 मुख्य बात इअ हखइ कि, तोहार जिवन ख्रिस्टक सुसमाचारक तहिँया योग्यक हखइ। उहेसे मुइ तोहराके भेटले फेनि, हइने भेटले फेनि तोहरा एगुडा उदेस्य लेके डटके बडह हसे एके मन भके सुसमाचारक विस्वासक तहिँया परिसरम करइबडह कहके मुइ सुने पाउ। 28 तोहरा यापन विरोधियानिसाङे झिन डेरइह। इअ हुनुका विनास हतइ कहके एगुडा चिन्हा हखइ, बाकि तोहार उद्धार हतइ। इअ परमेस्वरसे हतइ। 29 केहकेकि परमेस्वर ख्रिस्टमा विस्वास करेके हसे दुःख भोगेके तहिँया दुन्हुँ मउका हुने तोहराके देले बडसि। 30 तोहरा उहे दुःख-कस्ट पवइ बडह। जुने सुसमाचारक विरोध करसइ, हमरा दुन्हु जन फेनि विरोध करहि परतइ। पहिला तोहरा मोरके इअ करइ देखलह हसे मुइ यखनि उअ करइ बडहिँ कहके सुनइ बडह। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.