फिलेमोन 1 - चितवनिया थारु1 येसु ख्रिस्टक बारेमा खुसिक समाद परचार करके झ्यालखानामा परल मुइ पावल, हमार विस्वासि भाइ तिमोथिसाङे मिलके हमार सोगावल सङहतिया हसे सहकरमि फिलेमोनके हसे 2 वकर घरवामा जामा भेलि मन्डलियाके इअ चिठिया लिखइ बडहुँ। इअ चिठिया हमार विस्वासि बहिनिया अप्फिया हसे हमार सहकरमि सिपाहि अरखिप्पसक तहिँया फेनि हखइ। 3 हमार परमेस्वर पिता हसे प्रभु येसु ख्रिस्ट तोहराके अनुग्रह हसे सान्ति दिय। धन्यवाद ग्यापन हसे परथाना 4 मुइ परथाना करइकि तोरके समझके मोर परमेस्वरके सबदिन धन्यवाद देसहिँ। 5 केहकेकि प्रभु येसुमा तोर करल विस्वास हसे परमेस्वरक पवितर जनसभके तोर करल प्रेमक बारेमा मुइ सुनइ बडहिँ। 6 तुइ यापन विस्वासक बारेमा याको जनसाङे सुनोइकि, हुनुका फेनि ख्रिस्ट हमराके देलि जम्मे आसिसक बारेमा थाह पवइ कहके मुइ परथाना करइ बडहिँ। 7 मोर भयवा, तोर प्रेमसे मुइ खाँ आनन्द हसे सान्त्वना पउले बडहिँ, केहकेकि तोर कारनसे परमेस्वरक जनसभक हृदय आनन्दित भेल बडइ। ओनेसिमसक तहिँया पावलक बिन्ति 8 तुइ कथि करे परतइ कहके तोरके आग्या देवेके ख्रिस्टमा मोर सहास भेले ताफेनि, 9 प्रेमक खातिर मुइ तोरके बिन्ति करे चाहबहिँ। मुइ बुढ मन्से हसे यखनि येसु ख्रिस्टक तहिँया झ्यालखनवामा परल पावल, 10 मोर बेटा ओनेसिमसक तहिँया तोरके बिन्ति करइ बडहिँ। जुने ख्रिस्टमा मोर बेटा हखिय, केहकेकि मुइ झ्यालखनवामा रहइकि वकर तहिँया आत्मिकि बाबा नहिँया भेल बडहिँ। 11 उअ तोर तहिँया पहिला काम हइने लगइ रहलिय, बाकि यखनि उअ तोर हसे मोर तहिँया काम लगना मन्से भेल बडिय। 12 मुइ ओनेसिमसके, जुने मोर हृदयक खाडा हखिय वकरेके फेरि तोर लघिना पठोइ बडहिँ। 13 वकरेके मुइ यापनसाङे राखे पउतहिँ त खुसि हतहिँ, केहकेकि सुसमाचारक तहिँया मुइ झ्यालखनवामा रहइकि तोर सटहा उअ मोरके मदत करे सकतिय। 14 बाकि तोरके नाहिँ पुछके यसके करेके यसल हइने लगलइ, केहकेकि तुइ करकापसे हइने, बाकि तोर यपने स्वइछासे मदत करहि कहके मुइ चाहसहिँ। 15 सायद उअ सबदिनक तहिँया तोरसाङे रहे सकिय कहके किहो समयक तहिँया उअ तोरसे यलग भेल रहलिय। 16 याबे उअ कमारा हइने, बाकि कमारासे फेनि बढता सोगावल विस्वासि भाइ हखिय। मुइ वकरेके खाँ प्रेम करसहिँ, बाकि याबे तुइ वकरेके एगुडा मन्सेक रुपमा हसे एगुडा विस्वासि भाइ भेलेसे झन प्रेम करसि। 17 उहेसे तुइ मोरके यापनसाङे काम करलाहर सझिया सम्झबहि जउँ, तुइ मोरके स्वागत करले नहिँया वकरेके फेनि स्वागत करसि। 18 यगर उअ तोर किहो खराबि करले बडिय कि तोरके किहो तिरेके भेले फेनि, उअ मोर नाउँमा लिख देसि। 19 मुइ पावल, यपने हथवासे इअ लिखइ बडहिँ, उअ रिनवा मुइ यपनहिँ तिरदेबहि। तुइ मोर कारनसे आत्मिक जिवन पउले बडहि कहके कहइकि रहे नाहिँ परतइ। 20 उहेसे मोर भयवा, प्रभुक खातिर इअ मोर तहिँया कर देसि हसे मोर हृदय ख्रिस्टमा आनन्दित हखइ। 21 तुइ मोर कहलि बतवासे याको बढता करबहिँ कहके जानके मुइ तोरके इअ चिठिया लिखइ बडहिँ। 22 दोसर बात इअ बडइ कि, मोर तहिँया एगुडा रहना कोठा तयार पारदिह, केहकेकि तोर परथानाक कारनसे मुइ फेनि तोर लघिना यावेके यासा करले बडहिँ। 23 येसु ख्रिस्टक तहिँया मोरसाङे झ्यालखनवामा परल इपाफ्रास तोरके अभिवादन पठोले बडिय। 24 वसने करके मोरसाङे काम करलाहर मरकुस, अरिस्ताखरस, डेमास हसे लुका फेनि अभिवादन पठोले बडइ। 25 प्रभु येसु ख्रिस्टक अनुग्रह तोहार जम्मे जनक आत्मासाङे रहइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.