मरकुस 8 - चितवनिया थारुयेसुजि चार हजार जनके खियोलसि ( मति १५:३२-३९ ) 1 उहे समयमा, मन्सेक एगुडा जबड भिड फेरि येसुजि लघिना याके जामा भेलइ हसे हुनुकरसाङे किहो खइना चिजु हइने भेलेसे हुने यापन चेलवानिके बलाके यसके कहलसि, 2 “इअ मन्सावानिके देखके मोर गहनि सोग लगइ बडइ। केहकेकि हिनिका मोरसाङे रहइकि याजु तिन दिन भेलइ हसे हिनिकरसाङे किहो खइना चिजु फेनि हइने बडइ। 3 यगर मुइ हिनिकाके भुखले घर पठोबहि जउँ हिनिका पइडावामा बेहोस हतइ, केहकेकि हिनिकरमधे कुनहुँ-कुनहुँ त जबड तनाउसे फेनि याइल बडइ।” 4 बाकि चेलवाह हुनेके कहलइ, “इअ उराठ-ठउरियामा यतेक मन्सेसभके कस्के रोटि खियावे सकबहुँ?” 5 तब येसुजि हुनुकाके पुछलसि, “तोहारसाङे कतेक गो रोटि बडइ?” हुनुका कहलइ, “सात गो रोटि बडइ।” 6 तब येसुजि मन्सावानिके जमरवामा बइठे लगोलसि। वकरपाछा हुने सात गो रोटिया लेके परमेस्वरके धन्यवाद देलसि। हुने रोटिया खाडा-खाडा बनाके चेलवानिके देके बाँटे लगोलसि हसे हुनुका मन्सावानिके बाँट देलइ। 7 हुनुकरसाङे इचिका झिन-झिन माछरि फेनि रहलइ। हुने मछरियाक तहिँया फेनि परमेस्वरके धन्यवाद देके मन्सावानिके बाँटे लगोलसि। 8 हुनुका जम्मे जन यघाइलइ खेलइ हसे उबरलि खडवा बटियोइखुनि सात ढकिया भेलइ। 9 तखनहिँ, वहवाँ चार हजार जतुरा मन्से रहलइ। येसुजि हुनुकाके बिदाबारि देलसि हसे 10 वइघरहिँ चेलवानिसाङे डोङवामा चढके दलमनुथा छेतरवरि गेलसि। फरिसियाह येसुजिसाङे स्वरगसे चिन्हा मङलइ ( मति १६:१-४ ) 11 कतेक जन फरिसियाह येसुजि लघिना याके ठोरा-बोलि करे लगलइ। हुनुका येसुजिके जाँच करेके तहिँया स्वरगसे एगुडा चिन्हा मङलइ। 12 इअ सुनके येसुजि आत्मामा नमहर सास फेरते कहलसि, “इअ पुस्ताक मन्सावाह केहके चिन्हा खोजसइ? सदियो मुइ तोहराके कहसहि, इअ पुस्ताक मन्सावानिके कथियो फेनि चिन्हा नाहिँ दियतइ।” 13 तब येसुजि हुनुकाके वहवाँ छाडके फेरि डोङवामा चढके वाहिपार गेलसि। फरिसियानि हसे हेरोदक खमिर ( मति १६:५-१२ ) 14 तखनहिँ चेलवाह रोटिया यानेके विसरोले रहलइ। हुनुकरसाङे डोङवामा एगुडा मतरे रोटि रहलइ। 15 तब येसुजि चेलवानिके चेतवनि देते यसके कहलसि, “तोहरा फरिसियाह हसे हेरोदक खमिरसे बचके रहिय।” 16 इअ सुनके हुनुका “हमारसाङे रोटि हइने भेलेसे येसुजि इअ कहइ बडसि” कहके एक-दोसरि जनसाङे कहे लगलइ, 17 तब येसुजि इअ थाह पाके हुनुकाके यसके कहलसि, “तोहारसाङे रोटि हइने बडइ कहके केहके छलफल करइबडह? मुइ कुने हखहि कहके यखनिलइ तोहरा बुझले हइने बडह! कथि तोहार मनवा कठोर भेल बडइ? 18 याखि भके फेनि तोहरा हइने देखसह? कान भके फेनि तोहरा हइने सुनसह? 19 जब मुइ पाँच गो रोटिया खडाके पाँच हजार जनके खियोलहिँ, कथि तोहरा विसरोलह? कहह त, कतेक ढकिया उबरलि रोटियाक खडवा तोहरा उठोलह?” “हमरा बारह ढकिया उठोलहुँ” कहके हुनुका कहलइ, 20 येसुजि फेरि हुनुकाके पुछलसि, “जब मुइ सात गो रोटिसे चार हजार जनके खियोलहिँ, कहह त, कतेक ढकिया उबरलि रोटियाक खडवा तोहरा उठोलह?” “हमरा सात ढकिया उठोलहुँ” कहके हुनुका कहलइ। 21 तब येसुजि फेरि हुनुकाके कहलसि, “कथि तोहरा यखनिलइ हइने बुझलह?” येसुजि एक जन यान्हर मन्सेके डउल बनोलसि 22 वकरपाछा येसुजि यापन चेलवानिसाङे बेथसेदा सहरवामा यलसि। तखनहिँ कतेक जन मन्सेसभ एक जन यान्हर मन्सेके हुनेक लघिना यानके “यकरेके छुदेहुँ” कहके बिन्ति करलइ। 23 तब येसुजि उअ यन्हरि मन्सावाक हथवा पकडके डोर्योते गउँवासे बाहरा यनलसि। वकरपाछा हुने वकर यखियामा थुकके वकर वपरा यापन हथवा धरके पुछलसि, “कथि तुइ किहो देखइ बडहिँ?” 24 उअ वपरावरि हेरके कहलिय, “मुइ मन्सावानिके गाछ नहिँया बुलइकि देखइ बडहिँ।” 25 तब येसुजि फेरि वकर यखियामा यापन हथवा धरलसि हसे उअ मन्सावा टक लगाके हेरइकि जम्मे चिजु डउलसे देखे सकलिय। 26 वकरपाछा येसुजि उअ मन्सावाके गउँवावरि झिन जइसि कहके कहलसि हसे वकरेके सरेसराउ घर पठादेलसि। येसुजि मुक्ति देलाहर ख्रिस्ट ( मति १६:१३-२० ; लुका ९:१८-२१ ) 27 वकरपाछा, येसुजि यापन चेलवानिसाङे कइसरिया फिलिप्पि सहरवाक चारिवरि गउँवामा गेलसि। जब हुनुका पइडावामा जाइ रहलइ, तब हुने यापन चेलवानिके यसके पुछलसि, “मुइ कुने हखहि कहके मन्सावाह कहसइ?” 28 तब चेलवाह हुनेके कहलइ, “कुनहुँ बप्तिस्मा देलाहर युहन्ना, कुनहुँ एलिया हसे कतेक जन कुनहुँ एक जन पुरान अगमवक्ता हखिय कहसइ।” 29 तब येसुजि हुनुकाके पुछलसि, “बाकि तोहरा मुइ कुने हखहि कहके कहसह त?” तखनहिँ पतरुस जवाफ देते कहलिय, “यपनहुँ त परमेस्वरक पठावल मुक्ति देलाहर ख्रिस्ट हखहुँ।” 30 तब येसुजि हुनुकाके, “इअ बतवा ककरहुँके फेनि झिन कहिह” कहके काडा आग्या देलसि। येसुजि यापन मृत्युक बारेमा कहलसि ( मति १६:२१-२३ ; लुका ९:२२ ) 31 चेलवानिके यापन बारेमा यसके कहलसि, “मुइ मन्सेक पुतरक बहुत दुःख भोगे परतइ। समाजक बडके यगुवाह, मुख्य पुजेरियाह हसे व्यवस्थाक-गुरुसभ मोरके बहिस्कार करतइ तके मारतइ। बाकि तिसरि दिनवामा मुइ फेरि जिएके उठबहिँ।” 32 यसने येसुजि यापन चेलवानिके इअ बतवा डउलसे कहलसि। इअ सुनके पतरुस हुनेके एकवरि लिगाके घोघटलिय। 33 बाकि येसुजि पाछवरि घुमलसि हसे यापन चेलवानिवरि हेरके पतरुसके डाटके कहलसि, “अरे सइतनवा, मोरसे तनाउ जाहि! केहकेकि तोर विचार परमेस्वर नहिँया हइने, बाकि मन्से नहिँया हखइ।” चेलवानिक करे परना त्याग ( मति १६:२४-२८ ; लुका ९:२३-२७ ) 34 वकरपाछा येसुजि यापन चेलवाह हसे वहवाँ भेलि मन्सावानिके बलाके यसके कहलसि, “हेरह, यगर कुनहुँ मोर चेला हखे खोजबह जउँ, उअ यपनहिँके इन्कार करिय हसे सबदिन यापन क्रुस बोकके मोर पाछा यइय। 35 केहकेकि जुने यापन प्रान बचावे खोजतइ उअ सदि जिवन गुमोतइ, बाकि जुने यापन प्रान मोर हसे सुसमाचारक तहिँया गुमोतइ, उअ सदि जिवन पउबिय। 36 जब एक जन मन्से जम्मे संसारके हाथ पारके फेनि यापन प्रानके नास पारबिय जउँ, वकर कथि फाइदा हतइ त? 37 मन्सावा यापन प्रानक सटहामा कथि देवे सकतइ? 38 इअ धुचुड हसे पापि पुस्तामा जुने मोरसे हसे मोर वचनसे लजेतइ, मुइ मन्सेक पुतर यापन पिताक महिमामा पवितर स्वरगदुतवानिसाङे यवइकि वकरसे फेनि लजेबहिँ।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.