मरकुस 14 - चितवनिया थारु

येसुजिके मारे खोजइ

¹ याबे निस्‍तार-पाबनि हसे अखमिरि रोटि खइना पाबनि यावेके दु दिन बाँकि रहलइ। तखनहिँ मुख्‍य पुजेरियाह हसे व्‍यवस्‍थाक-गुरुसभ येसुजिके कस्‍के चुपे-चुपे पकडके मारे सकबहुँ कहके दाउ खोजइ रहलइ।

² बाकि “पबनियाक दिनवामा हमरा इअ कमवा नाहिँ करु, केहकेकि इअ जुनवामा मन्‍सावाह हुलदाङा करे सकतइ” कहके हुनुका विचार करलइ।

बेथानियामा येसुजिके अभिसेक करल

³ एक दिन येसुजि बेथानिया गउँवामा सिमोनक घरवामा रहलसि। जकरेके पहिला बडकि दुःखवा रोग लागल रहलइ। जब हुने जेउना करे लगलसि, तब एक जन जनियानि सिङगमरमरक सिसियामा बहुत महङ जटामसियाक बसान तेल लेले यलिय हसे सिसिया फुटाके उअ बसानि तेलवा येसुजिक मुडियामा खन्‍यादेलिय।

⁴ बाकि वहवाँ भेलि कतेक जन खिसियाके एक-दोसरि जनके यसके कहे लगलइ, “इअ जनियावा यतुरा महङ बसान तेलके वसहिँ केहके बरबाद करलिय?

⁵ बरु इअ बसानि तेलवा तिन सय चाँनिक सिक्‍कासे फेनि बहुत मोलमा बेचके उअ पइसावा गरिबवानिके देवे सकेतिय।” यसने कहके हुनुका वकरेके खाँ घोघटलइ।

⁶ बाकि येसुजि कहलसि, “वकरेके छाडदेह, तोहरा केहके यकरेके दुःख देइ बडह? इअ त मोर तहिँया बहुत यसल काम करले बडिय।

⁷ केहकेकि गरिब मन्‍सावाह त तोहारसाङे सबदिन रहतइ हसे तोहार इछा लगलि जुनवामा हुनुकर भलाइ करे सकबह, बाकि मुइ त तोहारसाङे सबदिन नाहिँ रहबहिँ।

⁸ इअ जनियावा मोर तहिँया जथि करे सकलिय, उहे करलिय। उअ मोर देहिया गाडेके तहिँया यगाहेसे बसानि तेलवा लगाके तयार पारले बडिय।

⁹ मुइ सदियो तोहराके कहबहिँ, संसार भर जहवाँ-जहवाँ सुसमाचार परचार करेतइ, वहवाँ फेनि यकर सम्‍झानामा वकर करलि कमवाक बारेमा परचार करेतइ।”

येसुजिके पकडावेके योजना

¹⁰ वकरपाछा येसुजिक बारह जन चेलवानिमधे यहुदा इस्‍कोरियोत कहल एक जन चेलवा येसुजिके पकडादेवेके तहिँया मुख्‍य पुजेरियानिक लघिना गेलिय।

¹¹ वकर बतवा सुनके मुख्‍य पुजेरियाह गहनि खुसि भेलइ हसे वकरेके पइसा देवेके राजि भेलइ। उहेसे उअ येसुजिके पकडादेवेके तहिँया मउका खोजे लगलिय।

येसुजि चेलवानिसाङे वराट भोज खेलसि

¹² तखनहिँ अखमिरि रोटि खइना निस्‍तार-पाबनिक पहिला दिन यलइ। उअ दिनवामा इस्राएलक मन्‍सावाह भेडाक पाठा भोग चढावेके चलन रहलइ। उहे दिन येसुजिक चेलवाह हुनेके पुछलइ, “हमरा कहवाँ जाके यपनहुँक तहिँया निस्‍तार-पाबनिक भोज तयार करु कहके यपनहुँक इछा बडइ?”

¹³ उहेसे येसुजि यापन दु जन चेलवानिके यसके कहके पठोलसि, “तोहरा सहरवामा जाह हसे वहवाँ घइलामा पानि बोकके गेलहर एक जन मरदाना मन्‍से तोहराके भेटबिय। तोहरा वकरपाछा लगिह।

¹⁴ उअ मन्‍सावा जुन घरवामा पेसबिय, उहे घरवाक मलिकवाके यसके कहिह, ‘हमार गुरुजि पुछले बडसि, पहुनाक खोक कहवाँ बडइ हसे मुइ कहवाँ यापन चेलवानिसाङे निस्‍तार-पाबनिक भोज खाए सकबहि?’

¹⁵ तब उअ मन्‍सावा तोहराके वपराक तलवामा खाँ डउलसे सजावल एगुडा जबड खोक देखोबिय। तोहरा वहवाँहिँ भोज तयार करिह।”

¹⁶ वकरपाछा चेलवाह सहरवामा गेलइ हसे जसने येसुजि कहके पठोले रहलसि, वसने पउलइ हसे वहवाँहिँ हुनुका निस्‍तार-पाबनिक भोज तयार करलइ।

¹⁷ साँझ भेलेपर येसुजि यापन बारह जन चेलवानिसाङे यलसि।

¹⁸ जब हुनुका बइठके जेउना करइ रहलइ, तब येसुजि कहलसि, “मुइ सदियो तोहराके कहबहिँ, तोहार मधेमा मोरसाङे खेलहरवा एक जन मोरके धोखा देबिय।”

¹⁹ इअ बतवा सुनके चेलवाह दुःखित भेलइ हसे पलहा-पलहि करके “कथि उअ मुइ हखहि” कहके येसुजिके पुछलइ?

²⁰ तब येसुजि कहलसि, “तोहरा बारह जनमधे, जुने यखनि मोरसाङे कचोरवामा रोटिया डुबोइ बडिय, उअ मोरके धोखा देबिय।

²¹ केहकेकि मन्‍सेक पुतर त धरमसास्‍तरवामा लिखइलि नहिँया मरहिँ परतइ, बाकि उअ मन्‍सावाके धिकार बडइ, जुने मन्‍सेक पुतरके धोखा देबिय! बरु उअ मन्‍सावा नाहिँ जरमल रहतिय त वकर तहिँया यसल हतिय।”

²² जब हुनुका खाइ रहलइ, तब येसुजि रोटिया लेके परमेस्‍वरके धन्यवाद देलसि। वकरपाछा रोटियाके खाडा-खाडा बनाके चेलवानिके देते यसके कहलसि, “इअ लेह, इअ मोर देहि हखइ।”

²³ वकरपाछा येसुजि एक कचोरा अंङगुरक रस लेके परमेस्‍वरके धन्‍यवाद देलसि हसे चेलवानिके बाट देलसि। तब हुनुका जम्‍मे जन उहे कचोरवासे पिलइ।

²⁴ तखनहिँ येसुजि हुनुकाके कहलसि, “इअ परमेस्‍वर हसे मन्‍सावानिक बिचाक वाचाक रकत हखइ, जुन बहुत जनक तहिँया बहावल बडइ।

²⁵ मुइ सदियो तोहराके कहबहिँ, परमेस्‍वरक राजमा लउठा करके नाहिँ पियइलइ मुइ यखनिसे अंङगुरक रस फेरि नाहिँ पियबहिँ।”

²⁶ वकरपाछा हुनुका एगुडा भजन गाके जइतुन पहडावामा गेलइ।

येसुजि पतरुसके सम्‍झोलसि

²⁷ वहवाँसे जाइखुनि येसुजि यापन चेलवानिके कहलसि, “तोहरा जम्‍मे जन मोरके छाडके जेबह, केहकेकि यसके लिखाइल बडइ, ‘मुइ भेडहरवाके मारबहिँ हसे भेडवाह छाहरछिता हतइ।’

²⁸ “बाकि मुइ मरलिसे फेरि जिउते भके तोहारसे यागा गालिलमा जेबहिँ।”

²⁹ तब पतरुस येसुजिके कहलिय, “जम्‍मे जन छाडके गेले फेनि मुइ कबहुँ फेनि यपनहुँके नाहिँ छडबहिँ।”

³⁰ बाकि येसुजि पतरुसके कहलसि, “मुइ सदियो तोरके कहबहिँ, याजु राति चिङनावा दु पारि बसलिसे यागा तुइ मोरके तिन पारि इन्‍कार करबहि।”

³¹ तब पतरुस याको जोड देके कहलिय, “यगर यपनहुँसाङे मरे परतइ फेनि मुइ मरबहि, बाकि यपनहुँके कबहुँ फेनि इन्‍कार नाहिँ करबहिँ।” तखनहिँ याको जम्‍मे चेलवाह फेनि वसने कहलइ।

गेतसमनि बगिचवामा येसुजिक परथाना

³² वकरपाछा हुनुका गेतसमनि नाउँक एगुडा ठउरिमा गेलइ। वहवाँ पुगके येसुजि यापन चेलवानिके कहलसि, “मुइ परथाना करइलइ तोहरा यहवहिँ बइठल रहिह।”

³³ तब हुने पतरुस, याकुब हसे युहन्‍नाके यापनसाङे लिगलसि। तखनहिँ हुने व्‍याकुल भके छटपटेलसि,

³⁴ हसे हुनुकाके कहलसि, “मोर आत्‍मा दुःखित भके मरे जोकर भेल बडइ। तोहरा यहवाँ रहके मोरसाङे जगले रहिह।”

³⁵ वकरपाछा हुने इचिका वताहुँ जाके भुयवामा घोप्‍टे परके यसके परथाना करलसि, “हखे सकतइ जउँ मोर वपरा यवेलगइकि दुःखवा मोरसे होटा देहुँ।”

³⁶ हुने कहलसि, “हे अब्‍बा, हे पिता, यपनहुँ जम्‍मे चिजु करे सकसहुँ, यपनहुँ इअ दुःखवाक कचोरवा मोरसे होटा देहुँ। मोर इछा हइने, बरु यपनहुँक इछा पुरा हखइ।”

³⁷ जब येसुजि फेरि फिरके यलसि, हुने तिन जन चेलवानिके सुतल देखके पतरुसके कहलसि, “सिमोन, कथि तुइ निनेलहि? कथि तुइ एक घन्‍टा फेनि जगले रहे हइने सकलहि?

³⁸ तोहरा परिछामा नाहिँ परेके तहिँया जगले रहके परथाना करिह। आत्‍मा त तयार बडइ, बाकि देहिया कमजोर बडइ।”

³⁹ तब येसुजि हुनुकाके वहवाँ छाडके गेलसि हसे फेरि दोहराके उहे परथाना करलसि।

⁴⁰ जब येसुजि फेरि चेलवाह भेलि ठउरियामा यलसि, हुने चेलवानिके निनाइल देखलसि, केहकेकि हुनुका निनसे यखिया खोले हइने सकलेसे हुनेके जवाफ देवे फेनि हइने जनलइ।

⁴¹ यसने येसुजि तिसरि पारि फिर याके यापन चेलवानिके कहलसि, “कथि तोहरा याको निनाके आराम करइबडह? याबे भेलइ। हेरह! मुइ मन्‍सेक पुतरके धोखा देके पापि मन्‍सावानिक हथवामा सपेके जुन यासकल बडइ।

⁴² उठह, याबे हमरा जाउँ! हेरह! मोरके पकडा देलहरवा यहवाँ यासकल बडिय।”

येसुजिक पक्राउ

⁴³ जब येसुजि बात करते रहलसि, तब हुनेक बारह जन चेलवाहमधे यहुदा कहल एक जन वइघरहिँ वहवाँ यलिय। तखनहिँ वकरसाङे डाङ हसे तरवार लेल मन्‍सेसभक भिड रहलइ। हुनुकाके मुख्‍य पुजेरियाह, व्‍यवस्‍थाक-गुरुसभ हसे समाजक बडकि मन्‍सावाह पठोले रहलइ।

⁴⁴ तब येसुजिके पकडा देलहरवा यहुदा हुनुकाके यसनुक कहके इसारा देले रहलिय, “जकरेके मुइ चुमबहि, उहे येसु हखिय। वकरेके पकडिह हसे पहरा देते लिगिह।”

⁴⁵ तखनहिँ यहुदा वहवाँ यइतेकि येसुजि लघिना जाके, “हे रब्‍बि!” कहते हुनेके चुमलिय।

⁴⁶ वकरपाछा हुनुका येसुजिके पकडलइ।

⁴⁷ तखनहिँ येसुजिक लजिके ठडियलि मन्‍सावानिमधे एक जन तरवरवा निकडाके प्रधान पुजेरियाक बहरियावाक कनवा चट्टे काटदेलिय।

⁴⁸ तब येसुजि हुनुकाके कहलसि, “कथि तोहरा मुइ डाँकु हखहि कहके डाङ हसे तरवार लेके मोरके पकडे याइल बडह?

⁴⁹ मुइ सबदिन मन्‍दिरवामा सिछा देइखुनि तोहरेसाङे रहलहि, ताफेनि तोहरा मोरके हइने पकडलह। बाकि धरमसास्‍तर पुरा हखइ कहके यसके हखे परतइ।”

⁵⁰ तखनहिँ जम्‍मे चेलवाह येसुजिके छाडके भगलइ।

⁵¹ तखनहिँ वहवाँ एक जन ढोठनिया मन्‍से येसुजिक पाछा-पाछा जाइ रहलिय हसे उअ यापन देहियामा एगुडा मलमलक लुगा मतरे होडले रहलिय। हुनुका वकरके फेनि पकडलइ।

⁵² बाकि उअ यापन लुगवा छाडके नङहटे भगलिय।

महासभाक यागा येसुजि

⁵³ वकरपाछा हुनुका येसुजिके प्रधान पुजेरियाक घरवामा लिगलइ हसे मुख्‍य पुजेरिया, समाजक बडकि यगुवासभ हसे व्‍यवस्‍थाक-गुरुसभ वहवाँ जामा भेलइ।

⁵⁴ तखनहिँ पतरुस तनाउसे येसुजिके पछियोते प्रधान पुजेरियाक घरवाक यङनावामा गेलिय हसे वहवाँ मन्‍दिरवाक परहरियावानिसाङे यागि तापे लगलिय।

⁵⁵ तब मुख्‍य पुजेरिया हसे सभाक याको जम्‍मे सदस्‍यसभ येसुजिके मारेके तहिँया किहो परमान खोजे लगलइ, बाकि हुनुका हइने पउलइ।

⁵⁶ केहकेकि येसुजिक विरोधमा बहुत जन झुठा साछि देलइ, बाकि ककरो बतवा फेनि हइने मिललइ।

⁵⁷ वकरपाछा कतेक जन उठके येसुजिक विरोधमा इअ झुठा दोस लगोलइ,

⁵⁸ “मुइ मन्‍सावाक हथवासे बनोलि इअ मन्‍दिरवाके भसकाके मन्‍सावाक हथवासे हइने बनोलि मन्‍दिरवा तिन दिनमा बनोबहिँ कहके कहलि बतवा हमरा यपनहिँ सुनलहुँ।”

⁵⁹ बाकि हुनुकर कहलि बतवा फेनि हइने मिललइ।

⁶⁰ तब प्रधान पुजेरिया जम्‍मे जनक यागा ठडियाके येसुजिके पुछलिय, “तुइ यखनि फेनि केहके जवाफ हइने देलहि? कह त, तोर विरोधमा इअ मन्‍सावाह कथिक दोस लगोइ बडइ?”

⁶¹ बाकि येसुजि चुप लगलसि हसे कथियो जवाफ फेनि हइने देलसि। तब प्रधान पुजेरियाह फेरि हुनेके पुछलिय, “कथि तुइ परम धन्यक पुतर ख्रिस्‍ट हखहि?”

⁶² तब येसुजि कहलसि, “हँ मुइ हखहि हसे एक दिन यपनहुँसभ मुइ मन्‍सेक पुतरके सरवसक्‍तिमानक दहिनिकलहरवा बइठल हसे स्‍वरगसे यकसवाक बदरियामा यवइकि देखबह!”

⁶³ इअ सुनके प्रधान पुजेरिया यापन लुगवा फारलिय हसे कहलिय, “याबे हमराके याको कथि परमान चाहिँ बडइ त?

⁶⁴ तोहरा यकर करलि परमेस्‍वरक निना सुनले बडह। लो याबे कहह ता, तोहार कथि विचार बडइ?” तब हुनुका जम्‍मे जन, “इअ अपराधि हखिय हसे मृत्‍यु दन्‍ड पावेके लाइक बडिय” कहके कहलइ।

⁶⁵ तखनहिँ, हुनुकरमधेसे कतेक जन हुनेके थुके लगलइ हसे हुनेक यखिया झापके धुसते कहलइ, “अरे अगमवक्‍तावा लो कह त, तोरके कुने धुसलइ?” तब मन्‍दिरवाक परहरियावाह हुनेके मुकियोते लिगलइ।

पतरुस येसुजिके इन्‍कार करलिय

⁶⁶ जब पतरुस तर यङनावामा बइठल रहलिय, तखनहिँ प्रधान पुजेरियाक एगुडि बहरिनिया वहवाँ यलिय।

⁶⁷ उअ पतरुसके धुनिया तपइकि देखके वकरेके निङाहारके हेरलिय हसे यसके कहलिय, “तुइ फेनि त नासरतक येसुसाङे रहलहि।”

⁶⁸ तब पतरुस जवाफ देते कहलिय, “हइने, तुइ कस्‍नुक बात करइ बडहिँ, मुइ त किहो फेनि हइने बुझलहि।” वकरपाछा पतरुस यङनावाक केवरियावरि गेलिय हसे तखनहिँ चिङनावा बसलिय।

⁶⁹ जब उअ बहरिनिया पतरुसके वहवाँ देखलिय, तब वहवाँ भेलि मन्‍सावानिके फेरि कहलिय, “इअ मन्‍सावा फेनि त हिनिकरमधेक एक जन हखिय!”

⁷⁰ बाकि पतरुस फेरि इन्‍कार करलिय। तब किहो समय पाछा वहवाँ ठडियइलि मन्‍सावाह फेनि पतरुसके कहलइ, “तुइ सदियो हुनुकरमधेसे एक जन हखहि, केहकेकि तुइ फेनि गालिलिक मन्‍से हखहि।”

⁷¹ तब पतरुस फेरि इन्‍कार करके यपनहिँके सरपलिय हसे किरिया खइते कहलिय, “मुइ यपनहुँक कहलि इअ मन्‍सावाके हइने चिनसहिँ।”

⁷² तखनहिँ, दोसरि पारि चिङनावा बसलिय हसे “चिङनावा दु पारि बसलिसे यागा तुइ मोरके तिन पारि हइने चिनसहिँ कहके इन्‍कार करबहिँ” कहलि येसुजिक बतवा पतरुस सम्‍झलिय। तब पतरुस डोढा-डोढाके काने लगलिय।