मतिक लिखल सुसमाचार 5 - चितवनिया थारु

येसुजि पहडावामा उपदेस देलसि

¹ येसुजि भिडवा देखके एगुडा पहाड वपरा गेलसि हसे जब हुने वहवाँ बेठलसि, तब चेलवाह हुनेक लघिना यलइ।

² तखनहिँ येसुजि हुनुकाके सिछा देवे लगलसि:

³ “आत्‍मिक रुपमा यपनेके गरिब सम्‍झलहरा आसिस पाउल मन्‍सेसभ हखइ, केहकेकि स्‍वरगक राज हुनुकर हखइ।

⁴ सोक करलहरा आसिस पाउल मन्‍सेसभ हखइ, केहकेकि हुनुका सान्‍त्‍वना पउतइ।

⁵ नम्र मन्‍सावाह आसिस पाउल मन्‍सेसभ हखइ, केहकेकि हुनुका धरतियामा अधिकार करे पउतइ।

⁶ धारमिकताक तहिँया भुखाइल हसे पियासल मन्‍सेसभ आसिस पाउल मन्‍सेसभ हखइ, केहकेकि हुनुका तृप्‍त हतइ।

⁷ दाया करलहराह आसिस पाउल मन्‍सेसभ हखइ, केहकेकि हुनुका दाया पउतइ।

⁸ सुद्ध हृदय भेलहरवाह आसिस पाउल मन्‍सेसभ हखइ, केहकेकि हुनुका परमेस्‍वरके देखतइ।

⁹ मेलमिलाप करोलहराह आसिस पाउल मन्‍सेसभ हखइ, केहकेकि हुनुका परमेस्‍वरक बेटा-बेटिसभ कहेतइ।

¹⁰ धारमिकताक तहिँया सतावट पउलहराह आसिस पाउल मन्‍सेसभ हखइ, केहकेकि स्‍वरगक राज हुनुकरे हखइ।

¹¹ “जब मन्‍सावाह मोरके विस्‍वास करलेसे तोहराके दुःख देतइ, सतोतइ हसे तोहार विरोधमा जम्‍मे खलिक झुठा बात फदकतइ, तब तोहरा आसिस पाउल मन्‍सेसभ हखह।

¹² तखनहिँ तोहरा खुसि हसे आनन्‍दित हखिह, केहकेकि तोहार तहिँया स्‍वरगमा जबड इनाम धराइल बडइ। पहिलाक अगमवक्‍तावानिके फेनि मन्‍सावाह वसने सतोइ रहलइ।

नुन हसे ज्‍योति

¹³ “तोहरा त धरतियाक नुन हखह, बाकि यगर नुनवाक सवादि जेतइ जउँ वकरेके कथिसे फेरि नुनाइ बनोबह त? जब नुनवा काम नाहिँ लगना हतइ, तब वकरेके बाहरा फकतइ हसे मन्‍सावाह टङवासे धङतइ।

¹⁴ “तोहरा संसारक ज्‍योति हखह। पहडावामा बनावल सहर लोकाए नाहिँ सकतइ।

¹⁵ कुनहुँ फेनि दिवा बारके भडियासे नाहिँ झपतइ, बरु घरवा भितरा हखलहराह इजोर देखइ कहके उँच ठउरिमा धरतइ।

¹⁶ वसने तोहारमा भेलि इजोरवा मन्‍सावानिक यागा चम्‍कइ, ताकि हुनुका तोहार करलि यसल काम देखइ हसे स्‍वरगमा रहलाहर तोहार पिताक महिमा करइ।

व्‍यवस्‍था पालन करेके बारेमा सिछा

¹⁷ “मुइ मोसा हसे अगमवक्‍तावानिक फदकलि बतवा रद्‍द करे याइल बडहिँ कहके तोहरा झिन सोचिह, बरु उअ पुरा करे याइल हखहि।

¹⁸ मुइ तोहराके सदियो कहइ बडहिँ, जखनिलइ यकसवा हसे धरतिया बितके नाहिँ जेतइ, तखनिलइ परमेस्‍वरक व्‍यवस्‍थामा भेलि एगुडा अछर कि मतराक झिनिक थोप्‍ला फेनि कबहुँ नाहिँ बिलेतइ।

¹⁹ उहेसे यगर कुनहुँ व्‍यवस्‍थाक सबसे झिनिक आग्यासभमधे नाहिँ मानके मन्‍सावानिके फेनि वसने सिखोबिय जउँ, स्‍वरगक राजमा उअ सबसे झिनमिन हखबिय। बाकि जुने यपनहिँ आग्‍यासभ पालन करके मन्‍सावानिके फेनि वसने सिखोबिय, स्‍वरगक राजमा उअ महान हखबिय।

²⁰ उहेसे मुइ तोहराके कहबहिँ, यगर तोहरा परमेस्‍वरक आग्‍याके व्‍यवस्‍थाक-गुरुसभ हसे फरिसियानिसे फेनि डउलसे पालन नाहिँ करबह जउँ, तोहरा कबहुँ फेनि स्‍वरगक राजमा पेसे नाहिँ सकबह।

खिसक बारेमा सिछा

²¹ “यगतिक मन्‍सावाह यसके कहइकि तोहरा सुनले बडह, ‘तुइ हत्‍या झिन करसि हसे जुने हत्‍या करबिय उअ दन्‍डक लाइक हखबिय।’

²² बाकि मुइ तोहराके कहबहिँ, जुने यापन भयवासाङे खिसेबिय, उअ दन्‍डक योग्‍य हखबिय। जुने यापन भयवाके ‘काम हइने लगना’ कहके यपमान करबिय, उअ यहुदि महासभामा जवाफ देहि हखबिय हसे जुने यापन भयवाके ‘मुरुख’ कहबिय, उअ नरकक यगियामा जेबिय।

²³ “उहेसे जब तुइ वेदियामा भेटिया चढोलिसे यागा तोर भयवा तोहारसाङे खिसियाइल बडिय कहके थाह पउबहि जउँ,

²⁴ तुइ यापन भेटिया वेदियाक यागा छाडके जइसि हसे पहिला यापन भयवासाङे मिलाप करसि। वकरपाछा याके यापन भेटिया चढोसि।

²⁵ “जब तुइ यापन विरोधियासाङे अदालतमा जाइरहबहिँ, तब पइडवामा वकरसाङे मिलाप करसि, नत उअ विरोधिया तोरके न्‍यायधिसवाक हथवामा सोपदेबिय। वकरपाछा न्‍यायधिसवा पुलिसवाक हथवामा सोपदेबिय हसे तुइ झ्‍यालखनवामा परबहि।

²⁶ मुइ तोरके सदियो कहइ बडहिँ, तखनहिँ कदरहिक एकहक पइसा नाहिँ तिरइलइ तुइ वहवाँसे छुटे नाहिँ सकबहि।

धुचुडक बारेमा सिछा

²⁷ “तोहरा यसके कहइकि सुनले बडह, ‘तोहरा दोसरे जनक जनिसाङे झिन सुतिह।’

²⁸ बाकि मुइ तोहराके कहबहिँ, यगर कुनहुँ मन्‍से एगुडा जनियानिके खराब विचारसे हेरबिय जउँ, उअ यापन मनवामा यगाहेसे धुचुड करसकले रहसिय।

²⁹ यगर तोर दहिनि यखिया तोरके पाप करे लगोबिय जउँ, वकरेके निकडाके फाँकदेसि। केहकेकि तोर जम्‍मे देहिया नरकमा फकइलिसे बरु तोर तहिँया देहियाक एगुडा यङ नाहिँ भेले डउल हतइ।

³⁰ यगर तोर दहिनि हथवा तोरके पाप करे लगोबिय जउँ, वकरेके काटके फाँकदेसि। केहकेकि तोर जम्‍मे देहिया नरकमा फकइलिसे बरु तोर तहिँया एगुडा हथवा नाहिँ भेले डउल हतइ।

छोडपतरक बारेमा सिछा

³¹ “यसके फेनि कहाइल बडइ, ‘जुन मन्‍सावा यापन जनियावाके छडबिय, उअ यापन जनियावाके छोडपतर दिय।’

³² बाकि मुइ तोहराके कहबहिँ, जुने यापन जनियावाके धुचुडक कारन बाहेक दोसरे कारनसे छडबिय जउँ, उअ यापन जनियावाके धुचुड करे लगोसिय हसे जुने उअ जनियावासाङे बियाह करबिय, उअ फेनि धुचुड करबिय।

किरिया खाएके बारेमा सिछा

³³ “यगतिक मन्‍सावानिके यसके कहइकि तोहरा सुनले बडह, ‘तुइ झुठा किरिया झिन खइसि, बाकि परमप्रभुक नाउँमा खइलि किरिया पुरा करसि।’

³⁴ बाकि मुइ तोहराके कहइ बडहिँ, कबहुँ फेनि किरिया खइबे झिन करिह। स्‍वरगक नाउँमा किरिया झिन खइह, केहकेकि इअ परमेस्‍वरक सिंहासन हखइ।

³⁵ धरतियाक नाउँ लेके फेरि किरिया झिन खइह, केहकेकि उअ परमेस्‍वरक पाउदान हखइ। यरुसलेमक नाउँमा फेनि किरिया झिन खइह, केहकेकि उअ त महाराजाक सहर हखइ।

³⁶ वसने करके तुइ यापन मुडवा छुके फेनि किरिया झिन खइसि, केहकेकि तुइ यापन मुडियाक एगुडा केस गोरहर कि करिया फेनि बनावे नाहिँ सकबहि।

³⁷ तोहार बतवा ‘हँ’ कहले ‘हँ’ हखइ कि ‘हइने’ कहले ‘हइने’ हखइ, केहकेकि यकरसे बढता सइतनवावरसे हखइ।

बदला लेवेके बारेमा सिछा

³⁸ “तोहरा यसके कहइकि सुनले बडह, ‘यखियाक बदला यखिया हसे दाँतक बदला दाँत।’

³⁹ बाकि मुइ तोहराके कहइ बडहिँ, खराब मन्‍सेक विरोध झिन करिह। बाकि यगर कुनहुँ तोर दहिनि गलवामा थपरोबिय जउँ, तोर दोसरि गलवा फेनि डोगदेसि।

⁴⁰ यगर कुनहुँ मुदा चलाके तोर भितराक झोलियावा लिगबिय जउँ, वकरेके तोर बाहरा होडलि लुगवा फेनि देसि।

⁴¹ यगर कुनहुँ तोरके एक कोस लिगे खोजतइ जउँ, वकरसाङे तुइ दु कोस जादेसि।

⁴² तोरसे मङलहरानिके देसि हसे जुने तोरसाङे रिन मङतइ वकरेके नाहिँ झिन कहसि।

सतरुवाके प्रेम करिह

⁴³ “तोहरा यसके कहइकि सुनले बडह, ‘तुइ यापन पोरसियावाके प्रेम करसि हसे तोर सतरुवाके घिना करसि।’

⁴⁴ बाकि मुइ तोहराके कहइ बडहिँ, यापन सतरुवानिके माया करिह हसे तोहराके सतोलहरानिक तहिँया परथाना करिह।

⁴⁵ वसने करबह जउँ तोहरा स्‍वरगमा रहलाहर परमेस्‍वर पिताक बेटा-बेटिसभ हखबह। केहकेकि हुने दुस्‍ट हसे सजन दुन्‍हुके घाम लगादेससि तके धरमि हसे अधरमि दुन्‍हुक तहिँया पानि पारदेससि।

⁴⁶ यगर तोहराके माया करलहरानिके मतरे माया करबह जउँ, तोहरा कथि इनाम पउबह त? केहकेकि कर उठोलहराह फेनि वसने करसइ।

⁴⁷ केहकेकि यगर तोहरा यापन ददेर-भाइके मतरे नमस्‍कार करबह जउँ, याको जनसे कथि जबड काम करलह त? अयहुदियाह वसने करसइ।

⁴⁸ उहेसे, जसने स्‍वरगमा रहलाहर तोहार पिता सिद्ध बडसि, तोहरा फेनि वसने सिद्ध हखे परतइ।”