लुका 6 - चितवनिया थारु

विसराम दिनक प्रभु

¹ येसुजि एक विसरामक दिनवामा गोहुँवाक खेतवा भके जाइरहलसि। हुनेक चेलवाह गोहुँवाक बलिया टुरके हथवामा मिस-मिसवते खाए लगलइ।

² इअ देखके कुनहुँ फरिसियाह येसुजिक चेलवानिके कहलइ, “विसराम दिनमा जथि हइने करे बनसइ तोहरा उहे केहके करइबडह?”

³ येसुजि हुनुकाके जवाफ देते कहलसि, “कथि तोहरा हइने पढल बडह? जब दाउद रजवा हसे वकर सङहतियवासभक भुख लगइकि उअ कथि करले रहलिय?

⁴ उअ कस्‍के परमेस्‍वरक घरवा भितरा पेसके चढोलि रोटिया लेके खेलिय हसे वकरसाङे भेलि दोसरि जनके फेनि देलिय। उअ रोटिया पुजेरियानिके मतरे खाए बनइ।”

⁵ तब येसुजि हुनुकाके कहलसि, “मुइ मन्‍सेक पुतर विसराम दिनक फेनि प्रभु हखहि।”

हथवा सुखाइल मन्‍से डउल भेल

⁶ वसनेकरते फेरि दोसरि विसरामक दिनवामा येसुजि सभाघरवामा जाके सिछा देलसि। तखनहिँ वहवाँ एक जन मन्‍से रहलिय, जाकर दहिनि हथवा सुखाइल रहलइ।

⁷ व्‍यवस्‍थाक-गुरुसभ हसे फरिसियाह येसुजिके दोस लगावेके तहिँया किहो कारन खोजइ रहलइ। उहेसे हुनुका येसुजि हथवा सुखइलि मन्‍सावाके विसरामक दिनवामा डउल बनोबसि कहके हेरइ रहलइ।

⁸ बाकि येसुजि हुनुकर मनवाक बतवा जानके हथवा सुखइलि मन्‍सावाके कहलसि, “उठहि हसे यहवाँ याके ठडियाहि!” उहेसे उअ मन्‍सावा वइघरहिँ उठके ठडियलिय।

⁹ तब येसुजि हुनुकाके कहलसि, “मुइ याबे तोहराके पुछबहिँ, विसरामक दिनवामा डउल काम करेके यसल हखइ कि हइने डउल काम करेके यसल हखइ हसे प्रान बचावेके यसल हखइ कि नास करेके यसल हखइ?”

¹⁰ येसुजि हुनुका जम्‍मे जनके हेरके उअ मन्‍सावाके कहलसि, “तोर हथवा पसरोहि!” उअ पसरोलिय हसे वकर हथवा वइघरहिँ डउल भेलइ।

¹¹ बाकि इअ देखके व्‍यवस्‍थाक-गुरुसभ हसे फरिसियाह खुभे खिसियाके येसुजिके कथि करेके कहके एक-दोसरि जनसाङे छलफल करे लगलइ।

येसुजि बारह जन प्रेरितसभके छानलसि

¹² एक दिन येसुजि पहडावामा जाके रातभर परमेस्‍वरसाङे परथाना करते बितोलसि।

¹³ जब बिहान भेलइ, येसुजि यापन चेलवानिके बलोलसि हसे हुनुकरमधेसे बारह जनके छानके, हुनुकाके प्रेरित कहके नाउँ देलसि।

¹⁴ हिनिकरमधे सिमोन, जकरेके येसुजि पतरुस नाउँ फेनि धरलसि, सिमोनक भाइ अन्‍द्रियास, याकुब, युहन्‍ना, फिलिप, बारथोलोमाइ,

¹⁵ मति, थोमा, अल्‍फयसक बेटा याकुब, देसभक्‍त कहल सिमोन,

¹⁶ याकुबक बेटा यहुदा हसे यहुदा इस्‍कोरियोत, जुने येसुजिके धोखा देलिय।

येसुजि बहुत मन्‍सेसभके डउल बनोलसि

¹⁷ वकरपाछा जब येसुजि चेलवानिसाङे पहडावासे तर नाभके एगुडा सम ठउरिमा यलसि, वहवाँ हुनेक दोसरि चेलवाह हसे याको मन्‍सेसभक जबड भिड रहलइ। यहुदिया छेतरक जम्‍मे वरसे, यरुसलेम सहर हसे समुनदरवाक तिरवामा रहल टुरोस हसे सिदोन सहरवासे फेनि मन्‍सेसभक जबड भिड जामा भेल रहलइ।

¹⁸ हुनुका जम्‍मे जन येसुजिक सिछा सुने हसे यापन-यापन रोगवासे डउल हखेके तहिँया याइल रहलइ। वहवाँ दुस्‍ट-आत्‍मा लागके दुःख पउलहरा फेनि डउल भेलइ।

¹⁹ हुनुका जम्‍मे जन येसुजिके छुए खोजइ रहलइ, केहकेकि येसुजिसे निकडलि सक्‍तिसे जम्‍मे जन डउल हखइ।

यासिरवाद हसे सराप

²⁰ तब येसुजि यापन चेलवानिवरि हेरके यसके कहलसि, “तोहरा धन्यक हखह, जुने गरिब बडह, केहकेकि परमेस्‍वरक राज तोहरे हखइ।

²¹ तोहरा धन्यक हखह, जुने यखना भुखाइल बडह, केहकेकि तोहरा यघेबह। तोहरा धन्‍यक हखह, जुने यखना कनइ बडह केहकेकि तोहरा हसबह।

²² “तोहरा धन्यक हखह, जब मुइ मन्‍सेक पुतरमा विस्‍वास करलेसे मन्‍सावाह हेला करतइ, समाजसे निकडा देतइ हसे दुस्‍ट सोचके तोहार नाउँक बदनाम करतइ,

²³ तखनहिँ खुसि भके नचिह हसे उफरिह, केहकेकि तोहार तहिँया स्‍वरगमा बडके इनाम धराइल बडइ। हुनुकर पुरखावाह फेनि पहिनाक अगमवक्‍तावानिके वसने करके सतउले रहलइ।

²⁴ बाकि तोहराके धिकार बडइ, जुने यखनि धनि बडह! केहकेकि तोहरा यापन सुखक जिवन बिता सकले बडह।

²⁵ तोहराके धिकार बडइ, जुने यखनि यघाइल बडह! केहकेकि तोहरा भुखेबह। तोहराके धिकार बडइ, जुने यखनि हसइ बडह! केहकेकि तोहरा दुःख पउबह हसे कनबह।

²⁶ तोहराके धिकार बडइ, जब जम्‍मे मन्‍सावाह तोहार बखान करतइ! केहकेकि हुनुकर पुरखावाह फेनि झुठा अगमवक्‍तावानिके यसने करइ रहइ।

सतरुवानिके फेनि माया करे परतइ।

²⁷ “बाकि मोर बतवा सुनलहरानिके मुइ कहइ बडहिँ, यापन सतरुवानिके माया करिह हसे तोहराके घिरिना करलहरानिके डउल करिह।

²⁸ सराप देलहरानिके यासिरवाद दिह हसे हइने डउल व्‍यबहार करलहरानिक तहिँया परथाना करिह।

²⁹ यगर कुनहुँ तोरके एगुडा गलवामा थपरोतइ जउँ, दोसरि गलवा फेनि डोगदेसि। यगर कुनहुँ तोर बाहराक होडलि लुगवाह लिगबिय जउँ, वकरेके तोर भितरा पेहरलि झोलियावा फेनि देसि।

³⁰ जुने तोरसे मङतइ वकरेके देसि हसे तोर चिजुवा लिगलहरानिसे फिरता झिन मङसि।

³¹ दोसरि मन्‍सावाह तोहराके जथि करिय कहके इछा करसह, तोहरा फेनि हुनुकाके वसने करिह।

³² “यगर तोहराके माया करलहरानिके मतरे माया करबह जउँ, तोहरा कथि सम्‍मान पउबह त? केहकेकि पपियाह फेनि वसने करसइ।

³³ यगर तोहराके डउल करलहरानिके मतरे डउल करबह जउँ, तोहरा कथि सम्‍मान करलह त? केहकेकि पपियाह फेनि वसने करसइ।

³⁴ “यगर तोहरा ककरहुँके फिरता पावेके यसरामा रिन देबह जउँ, तोहरा कथि सम्‍मान पउबह त? केहकेकि पपियाह फेनि वसने करसइ।

³⁵ “बाकि यापन सतरुवानिके माया करिह हसे हुनुकाके डउल करिह। फिरताक यसरा नाहिँ राखके रिन दिह, वसने करबह जउँ तोहरा जबड इनाम पउबह हसे सबसे महान परमेस्‍वरक बेटा-बेटि हखबह, केहकेकि परमेस्‍वर बइगुनि हसे दुस्‍टवानिके फेनि दाया करससि।

³⁶ जसने परमेस्‍वर पिता मइगर बडसि, तोहरा फेनि वसने मइगर हखिह।

दोसरि जनके दोस झिन लगोइह

³⁷ “दोसरि जनके झिन करिह हसे परमेस्‍वर फेनि तोहराके न्याय नाहिँ करबसि। दोसरि जनके दोस झिन लगोइह हसे परमेस्‍वर फेनि तोहराके दोस नाहिँ लगोबसि। दोसरि जनके छमा देबह जउँ, परमेस्‍वर फेनि तोहराके छमा देबसि।

³⁸ जब तोहरा दोसरि जनके देबह, तब परमेस्‍वर फेनि तोहराके खान-खानके, डिङा-डिङाके हसे हरकइलइ पुरा नापमा देबसि, केहकेकि जुन नापसे तोहरा देबह, उहे नापमा तोहरा फेनि पउबह।”

³⁹ वसनेकरते येसुजि हुनुकाके एगुडा उदाहरन देते कहलसि, “कथि यन्‍हरा यन्‍हराके डोर्‍यावे सकतइ? हुनुका दुन्‍हुँ जन गडहामा नाहिँ परतइ त?

⁴⁰ कुनहुँ चेला फेनि यापन गुरुसे जबड नाहिँ हतइ, बाकि उअ सिखसकलेपर यापन गुरु नहिँया हखबिय।

⁴¹ “यापन भयवाक यखियामा भेलि घुजिया तुइ देखइ बडहिँ? बाकि यपने यखियामा भेलि मुङडावा केहके हइने देखसहि।

⁴² यगर यपने यखियामा भेलि मुङडावा हइने देखसहि जउँ, यापन भयवाके ‘अरे भयवा, मुइ तोर यखियामा भेलि घुजिया निकडादेबहि’ कहके कस्‍के कहबहिँ त? अरे कपटि, पहिला यपने यखियामा भेलि मुङडावा त निकडोहि, तब तुइ यापन भयवाक यखियामा भेलि घुजिया निकडावेके तहिँया खाँ डउलसे देखे सकबहि।

गाछ हसे वकर फर

⁴³ “एगुडा डउल गाछमा कबहुँ फेनि हइने डउल फर हइने फरसइ, न त हइने डउल गाछमा डउल फर फरे सकतइ।

⁴⁴ एगुडा गाछ वकर फरवासे मतरे चिनेसइ। कुनहुँ फेनि काँटक झाँङसे कोइलार हइने टुरसइ, न त काँटक झाँङसे अंङगुर टुरसइ।

⁴⁵ डउल मन्‍से यापन मनवा भितरासे डउले बात निकडोसइ हसे दुस्‍ट मन्‍से यापन मनवा भितरासे हइने डउल बात निकडोसइ, केहकेकि जुन बतवा मन्‍सावाक मनवा भितरा रहसइ, उहे बतवा मन्‍सावाक मुहँवासे निकडोसइ।

दु खलिक जग

⁴⁶ “यगर मोर कहलि बतवा हइने मनसह जउँ, तोहरा मोरके केहके ‘प्रभु, प्रभु’ कहसह?

⁴⁷ जुने मोर लघिना याके मोर बतवा सुनतइ हसे मोर कहलि बतवा मनतइ, उअ मन्‍सावा कस्‍नुक हखिय मुइ तोहराके कहबहिँ,

⁴⁸ उअ मन्‍सावा एगुडा घर बनोलहर मन्‍से नहिँया हखबिय, जुने गहिर जग खेनके सिलवा वपरा घर बनोलिय। उअ घरवा डउलसे बनोलेसे पनियाक बढिया याके ठोकइले फेनि घरवाके भसकावे हइने सकलिय।

⁴⁹ बाकि जुने मोर बतवा सुनके हइने मनसइ, उअ जग हइने खेनके घर बनोलहर मन्‍से नहिँया हसइ। जब पनियाक बढिया याके ठोकेलइ, तब उअ घरवा जम्‍मे नास हतइ।”