लुका 23 - चितवनिया थारुपिलातस हसे हेरोदक यागा येसुजि ( मति २५:११-२६ ; मरकुस १५:१-१५ ; युहन्ना १८:२८-४० ; १९:१-१६ ) 1 तखनहिँ महासभाक जम्मे जन उठके, येसुजिके रोमि सम्राट पिलातसक लघिना लिगलइ। 2 तब हुनुका येसुजिके दोस लगोते कहे लगलइ, “यकरेके हमार देसवाक मन्सावानिके भडकोइ पउलहुँ। इअ रोमि सरकारके कर झिन तिरिह हसे यपनहिँके ‘मुइ मुक्ति देलाहर ख्रिस्ट राजा हखहि’ कहके कहसिय।” 3 उहेसे पिलातस हुनुकर बतवा सुनके येसुजिके पुछलिय, “कथि तुइ यहुदियानिक राजा हखहि?” येसुजि जवाफ देते कहलसि, “यपनहुँ त वसने कहइ बडहुँ।” 4 तब पिलातस मुख्य पुजेरियाह हसे वहवाँ जामा भेलि मन्सावानिके कहलिय, “मुइ इअ मन्सावामा किहो दोस हइने पउलहिँ।” 5 बाकि हुनुका चिल्ला-चिल्लाके कहे लगलइ, “इअ गालिल जिल्लासे सुरु करके जम्मे यहुदिया हसे यहवाँ फेनि यापन सिछा देके मन्सावानिके भडकोसिय।” 6 पिलातस हुनुकर उअ बतवा सुनके पुछलिय, “कथि इअ मन्सावा गालिलक हखिय?” 7 तब पिलातस येसुजि हेरोदक सासनक छेतरक हखिय कहके थाह पाके येसुजिके हेरोद रजवाक लघिना पठादेलिय, केहकेकि हेरोद फेनि तखनहिँ यरुसलेममा रहलिय। 8 याबे येसुजिके देखके हेरोद रजवा गहनि गग्सलिय, केहकेकि उअ येसुजिक बारेमा सुनले रहलिय हसे बहुत दिनसे येसुजिके देखेके मन करले रहलिय। उअ येसुजिके किहो यचम्मक काम करइकि देखे पउबहि कहके यसरा करले रहलिय। 9 उअ येसुजिके याको बहुत बात पुछलिय, बाकि येसुजि वकरेके किहो फेनि जवाफ हइने देलसि। 10 उहेसे येसुजिके मुख्य पुजेरियाह हसे व्यवस्थाक-गुरुसभ उठके येसुजिक विरोधमा गहनि दोस लगोलइ। 11 वकरपाछा हेरोद यापन सिपहियावानिसाङे येसुजिके खिल्लि उडोते बिजेत करे लगलइ हसे येसुजिके रजवाक पेहराना नहिँया लुगा पेहराके पिलातसक लघिना फेरि पठादेलइ। 12 यकरसे यागा हेरोद हसे पिलातसमा खिसा-खिस रहलइ हसे उअ दिनसे हुनुका सङहतिया भेलइ। 13 तब पिलातस मुख्य पुजेरियाह, यहुदि यगुवासभ हसे याको मन्सावानिके बलाके कहलिय, 14 “यकरेके तोहरा मन्सावानिके भडकोसिय कहके मोर लघिना यनलह। मुइ तोहरे यागा यकरेके पुछभाख करलहिँ, बाकि मुइ यपनहुँसभक लगोलि दोसवाह यकरमा किहो फेनि हइने पउलहिँ। 15 हेरोद फेनि यकरमा किहो दोस हइने पउलेसे हमरे लघिना फिरा देलिय। हेरहुँ! इअ मृत्यु दन्ड पावे जोकर किहो फेनि अपराध करले हइने बडिय। 16 उहेसे मुइ यकरेके कोडा लगाके छाडदेबहिँ।” 17 [तखनहिँ वहवाँक चलन यनुसार पतबरसे निस्तार-पबनियामा पिलातस झ्यालखनवाक एगुडा कइदिके मन्सावानिक तहिँया छाड देवेपरइ।] 18 बाकि जम्मे मन्सावाह चिल्लाके यसके कहे लगलइ, “यकरेके मारहिँ परतइ, बरु बारब्बाके हमार तहिँया छाड देहुँ।” 19 इअ बारब्बाके सहरवामा देस विरोधक काम हसे मन्सेक हत्या करलेसे झ्यालखनवामा थुनले रहलइ। 20 तब पिलातसक येसुजिके छाड देवेके विचार भेलेसे मन्सावानिके फेरि सम्झोलिय। 21 बाकि हुनुका जम्मे जन एकचोटाने चिल्लाके कहलइ, “वकरेके क्रुसवामा टङहुँ, क्रुसवामा टङहुँ!” 22 पिलातस फेरि हुनुकाके तिसरि पारि कहलिय, “केहके? इअ कथि अपराध करले बडिय जे? यकरेके मृत्यु दन्ड देवेके मुइ किहो फेनि दोस हइने पउलहिँ। उहेसे मुइ यकरेके कोडा लगाके छाडदेबहिँ।” 23 बाकि हुनुका झन जबड माहे चिलइते कहे लगलइ, “वकरेके टङहि परतइ!” तब हुनुकरे जित भेलइ। 24 उहेसे पिलातस हुनुकर माङ पुरा करदेलिय। 25 उअ देस विरोधि हसे मन्सेक हत्याक दोसमा झ्यालखनवामा भेलि बरब्बाके छाड देलिय हसे येसुजिके हुनुकरे इछामा सपिदेलिय। येसुजि क्रुसमा टङाइल ( मति २७:३२-४४ ; मरकुस १५:२१-३२ ; युहन्ना १९:१७-२७ ) 26 जब सिपहियावाह येसुजिके क्रुसवामा टाङे जाइ रहलइ, कुरेनि देसवाक सिमोन नाउँक एक जन मन्सेके भेटलइ। उअ गउँवासे सहरवावरि यवइ रहलिय। हुनुका वकरेके पकडके क्रुसवा बोकाके येसुजिक पाछा-पाछा जाए लगोलइ। 27 मन्सावानिक जबड हुल येसुजिक पाछा-पाछा यलइ हसे वहवाँ भेलि जनिनियाह येसुजिक तहिँया छतिया पिटते काने लगलइ। 28 तब येसुजि हुनुकरवरि घुमके यसके कहलसि, “अरि यरुसलेमक बेटियाह, मोर तहिँया झिन कनह, बरु यापन तहिँया हसे यापन बेटवा-बेटियाक तहिँया कनिह! 29 हेरह, यसनुक दिन यतइ, जब मन्सावाह यसके कहतइ, ‘जुने बाचा हइने जरमोले बडइ हसे जाकर दुध पियावे हइने परसइ उअ जनिनियाह धन्यक हखइ।’ 30 तखनहिँक जुनवामा मन्सावाह पहडावाके ‘हमरे वपरा खस’, हसे परवतवाके ‘हमराके पुर’ कहके कहतइ। 31 जब गछवा हरियर हखइकि यसनुक करसइ जउँ, गछवा सुखाइकि झन कथि करतइ त?” 32 सिपहियावाह येसुजिसाङे याको दु जन अपरधियानिके फेनि मारे लिगइ रहलइ। 33 जब हुनुका खोपडि नाउँक ठउरियामा यलइ, हुनुका येसुजिके क्रुसवामा टङलइ हसे उअ दु जन अपरधियानिके फेनि एक जनके येसुजिक दहिनि कल्लहरवा तके दोसरि जनके लबडि कल्लहरवा क्रुसवामा टाङ देलइ। 34 [तब येसुजि कहलसि, “हे पिता! इअ मन्सावानिके छमा देहुँ केहकेकि हिनिका जथि करइ बडइ, उअ हुनुका हइने बुझइ बडइ।”] तखनहिँ, सिपहियावाह येसुजिक लुगवा चिठा घालके बटलइ। 35 जब मन्सावाह येसुजिक लजिके ठडियाके हेरइ रहलइ, तखनहिँ यहुदि यगुवाह येसुजिके खिल्लि उडोते कहे लगलइ, “हेरह, इअ दोसरि जनके बचोलिय, यगर इअ परमेस्वरक छानल मुक्ति देलाहर ख्रिस्ट हखिय जउँ, याबे यपनहिँके फेनि बचाउ।” 36 तब सिपहियावाह फेनि येसुजिक लजिके याके खिल्लि उडोलइ हसे येसुजिके अंङगुरक यामित रस देके यसके कहे लगलइ, 37 “यगर तुइ सदियो यहुदियानिक राजा हखहि जउँ यपनहिँके बचोहि।” 38 हुनुका येसुजिक मुडवासे वपरा “इअ यहुदियानिक राजा हखिय” कहके पेटरियाक खडवामा लिखके टाङ देलइ। 39 तब येसुजिसाङे झुन्डोलि दु जन अपरधियाह मधे एक जन येसुजिके यपमान करते कहलिय, “कथि तुइ मुक्ति देलाहर ख्रिस्ट हखहि? वसके भेले तुइ यपनहिँके हसे हमराके फेनि बचोहि!” 40 बाकि दोसरि अपरधिया वकरेके डटते कहलिय, “कथि तुइ परमेस्वरसे हइने डेरेसहि? तुइ फेनि त हुनेक नहिँया दन्ड भोगइ बडहिँ। 41 हमरा दु जन त हमार कामक यनुसारक दन्ड पवइ बडहुँ, बाकि हेरहि, इअ मन्सावा त किहो फेनि खराब काम हइने करले बडिय।” 42 तखनहिँ उअ येसुजिके कहलिय, “हे येसुजि, यपने यपनहुँक राजमा राजा हखके यवइखुनि मोरके फेनि सम्झबहुँ।” 43 तब येसुजि उअ अपरधियाके कहलसि, “सदियो मुइ तोरके कहइ बडहिँ, यजुहिँ तुइ मोरसाङे स्वरगलोकमा हखबहि।” येसुजिक मृत्यु ( मति २७:४५-५६ ; मरकुस १५:३३-४१ ; युहन्ना १९:२८-३० ) 44 याबे लगभग बारह बजल रहलइ हसे तखनहिँसे तिन बजेलइ जम्मे देसवामा यन्हार भेलइ, 45 केहकेकि बेरियावा इजोर हइने देलिय। मन्दिरवा भितरा टङलि परदावा फाँटके दु चिघा भेलइ। 46 वकरपाछा येसुजि जबड माहे चिल्लाके कहलसि, “हे पिता, मुइ मोर आत्माके यपनहुँक हथवामा सपइ बडहिँ।” यतुरा कहके येसुजि यापन प्रान त्यागलसि। 47 इअ जम्मे घटनावा देखके रोमि सिपहियावानिक कप्तनवा परमेस्वरके बखान करते कहलिय, “सदियो इअ एगुडा धरमि मन्से रहलिय।” 48 इअ घटनावा हेरे यइलि जम्मे मन्सावाह वहवाँ घटलि घटनावा देखके दुःखित भके छाति पिटते घर फिरलइ। 49 बाकि येसुजिके चिनलि-जनलि जम्मे मन्सावाह हसे जनिनियाह जुने येसुजिसाङे गालिल छेतरसे याइल रहलइ, हुनुका तनाउसे ठडियाके इअ जम्मे घटनावाह हेरइ रहलइ। येसुजिक दफन ( मति २७:५७-६१ ; मरकुस १५:४२-४७ ; युहन्ना १९:३८-४२ ) 50 तखनहिँ योसेफ नाउँक एक जन यसल हसे इमान्दार मन्से रहलिय, जुन महासभाक सदस्य फेनि रहलिय। 51 उअ महासभाक याको सदस्यसभसाङे येसुजिके मारेके बारेमा हुनुकर योजनामा सहमत हइने रहलिय। उअ यहुदिया छेतरक अरिमाथिया सहरवाक रहलिय हसे परमेस्वरक राज यावेके इसियाइ रहलिय। 52 उहेसे उअ पिलातस लघिना जाके येसुजिक मरलि देहिया मङलिय। 53 वकरपाछा उअ येसुजिक देहियाके क्रुसवासे तर नभोलिय हसे मलमलक लुगासे घेवटके, सिलवामा खोपके बनावल एगुडा चिन्डियामा धरदेलिय। उअ चिन्डियामा कबहुँ फेनि लास हइने धराइल रहलइ। 54 इअ सुकक दिन रहलइ हसे विसराम दिन सुरु हखे जाइ रहलइ। 55 याबे गालिल छेतरसे येसुजिसाङे यइलि जनिनियाह योसेफक पछ-पछोते चिन्डियामा जाके कस्के येसुजिक देहिया धराइल बडइ देखलइ। 56 वकरपाछा हुनुका वहवाँसे फिरके येसुजिक देहियामा लगावके तहिँया बसान तेल हसे जरिबुटि तयार करलइ तके व्यवस्थाक नियम यनुसार विसरामक दिनवामा हुनुका बिसेलइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.