लुका 2 - चितवनिया थारुयेसुजिक जनम ( मति १:१८-२५ ) 1 उहे जुनवामा रोमक महाराजा अगस्तस वकर जम्मे रोम राजमा जन गडना लेवेके हुकुम देलिय। 2 तखनहिँ कुरेनियस सिरिया परदेसक सासक रहइकि वकर जुनवाक इअ पहिला जन गडना रहलइ। 3 तब जम्मे मन्सावाह नाउँ लिखावेके तहिँया यापन-यापन पुरखावानिक सहरवामा गेलइ। 4 उहेसे योसेफ फेनि नाउँ लिखावेके तहिँया गालिल जिल्लाक नासरत सहरवासे यहुदियाक दाउदक सहर बेथलेहेममा गेलिय, केहकेकि उअ दाउदक घरानक रहलिय। 5 तब योसेफक मरियमसे बियाहक बात पाका भेलेसे वकरेके फेनि सङहि लेले गेलिय, तखनहिँ मरियम भारदेहि रहलिय। 6 हुनुका बेथलेहेममा रहतहिँ मरियमक बाचा जरमावेके जुन भेलइ। 7 तब मरियम वकर बडकि बेटवाके जरमोलिय हसे वकरेके लुगवामा गुटमुटाके डोङियामा सुतोलिय, केहकेकि हुनुकर तहिँया धरमसलवामा रहके ठउरि हइने रहलइ। भेडहार हसे स्वरगदुतसभ 8 उहे राति बेथलेहेम सहरवाक लजिकेक जमरवामा भेडहरवाह यापन भेडियानिके वगरइ रहलइ। 9 तब प्रभुक एगुडा स्वरगदुत यरमरका हुनुकर लघिना देखा परलिय हसे प्रभु परमेस्वरक इजोर हुनुकर चारिवर चम्कलइ। इअ देखके भेडहरवाह डरेसे दुलदुलाए लगलइ। 10 बाकि स्वरगदुतवा हुनुकाके कहलिय, “झिन डेराह! केहकेकि मुइ जम्मे मन्सावानिक तहिँया सुसमाचार लेके याइल बडहिँ। 11 सुनह, दाउद रजवा जरमलि सहरवामा तोहार तहिँया याजु एक जन मुक्तिदाताक जनम भेल बडइ। हुने ख्रिस्ट प्रभु हखसि। 12 तोहरा एगुडा बाचाके लुगवामा गुटमुटाके डोङियामा सुतावल देखबह हसे यकरहिँसे तोहरा प्रभुके चिनबह।” 13 तखनहिँ याको बहुत स्वरगदुतसभ वहवाँ देखा परलइ हसे परमेस्वरक बखान करते, हुनुका यसके कहे लगलइ, 14 “सबसे वपरा स्वरगमा रहलाहर परमेस्वरक जयजयकार हखइ हसे धरतियामा जुन मन्सावानिसाङे प्रभु खुसि हखबसि, हुनुकर सान्ति हखइ।” 15 जब स्वरगदुतवाह स्वरगवरि गेलइ भेडहरवाह एक-दोसरिसे कहलइ, “यउह, जुन घटनावाक बारेमा प्रभु परमेस्वर हमराके कहलसि उअ हेरे बेथलेहेममा जाउँ।” 16 तब हुनुका हतफदाके गेलइ। वहवाँ हुनुका मरियम, योसेफ हसे बचवाके डोङियामा सुतावल देखलइ। 17 भेडहरवाह बचवाक बारेमा स्वरगदुतवाक कहलि जम्मे बतवा सुनादेलइ। 18 हुनुकर बतवा सुनलहराह जम्मे जन छक परलइ। 19 बाकि मरियम इअ जम्मे बतवा सोचते यापन मनवामा धरलिय। 20 तब भेडहरवाह स्वरगदुतवाक कहलि नहिँया जम्मे बतवा सुने हसे देखे पउलेसे परमेस्वरक महिमा हसे बखान करते फिरलइ। मन्दिरवामा येसुजिक यरपन 21 बचवा जरमलिक याठ दिनमा, जब मोसाक व्यवस्था यनुसार बचवाक खतना भेलइ, हुनेक नाउँ येसु धरेलइ, जुन नाउँ हुने यापन दाओक गरभमा यइलिसे यागा स्वरगदुतवा धरेके कहले रहलिय। 22 याबे मोसाक देलि व्यवस्था यनुसार हुनुकर उठोनिक जुन पुरा भेलेपर, येसुजिक दाओ-बाबा हुनेके यरुसलेमक मन्दिरवामा परमेस्वरक यागा यरपन करे यनलइ, 23 जसने प्रभु परमेस्वरक व्यवस्थामा लिखाइल बडइ, “पहिलोठिया जरमलि बेटवाह परमेस्वरक तहिँया यरपन करे परतइ” 24 हसे प्रभु परमेस्वरक व्यवस्था कहलि नहिँया “एक जोरि घुटुरि कि कबतुरक दु गो बचरा” भोग चढावे परतइ। 25 उहे जुनवामा सिमियोन नाउँक एक जन मन्से यरुसलेममा रहलिय। उअ एक धारमिक हसे परमेस्वरक भक्ति करलाहर मन्से रहलिय। उअ इस्राएलि मन्सावानिक उद्धारक यसरामा रहलिय हसे पवितर-आत्मा वकरसाङे रहलसि। 26 “परमप्रभुक ख्रिस्टके नाहिँ देखइलइ तुइ नाहिँ मरबहि” कहके पवितर-आत्मा वकरेके यगाहेसे कहले रहलसि। 27 जब योसेफ हसे मरियम व्यवस्थाक नियम पुरा करेके तहिँया येसुजिके मन्दिरवामा यनलइ, सिमियोन फेनि पवितर-आत्माक यगुवाइ पाके मन्दिरवा भितरा गेलिय 28 सिमियोन येसुजिके यापन कोरवामा लेके परमेस्वरक बखान करते कहलिय, 29 “हे परमप्रभु, यपनहुँ यापन वाचा पुरा करले बडहुँ, याबे मुइ सान्तिसे मरे सकबहि। 30 केहकेकि यपनहुँक पठोलि मुक्तिदाताके मुइ यपने यखियासे देखे पउलहिँ, 31 जुन यपनहुँ जम्मे जतियाक मन्सावानिक उद्धारक तहिँया पठोले बडहुँ। 32 हुने अयहुदि मन्सावानिके पइडा देखोलहर ज्योति हखबसि हसे जम्मे इस्राएलि मन्सावानिक तहिँया इज्जत यनबसि।” 33 येसुजिक बारेमा सिमियोनक कहलि बतवा सुनके हुनेक दाओ-बाबा छक परलइ। 34 तब सिमियोन हुनुकाके यासिरवाद देलिय हसे येसुजिक दाओ मरियमके यसके कहलिय, “सुनह, इअ बचवा इस्राएलक बहुत जनक उद्धार हसे बहुत जनक नासक तहिँया परमेस्वरक छनाइल चिन्हा हखिय। बाकि वकरेके बहुत जन विरोध करके यापन लोकाइल विचार परकट करतइ। 35 तब तोर हृदयमा फेनि गहनि दुःखसे छिदकार तरवारसे छिदल नहिँया लगतइ।” 36 तखनहिँ हन्ना नाउँक एक जन बुढि अगमवादिनि मन्दिरवामा रहलिय। उअ आसेर कुलक फनुएलक बेटि रहलिय। बियाहक सात बरस पाछा वकर मरदावा मरलेसे उअ विधुवा भेलिय। 37 उअ विधुवा भेल चउरासि बरस पुगल रहलइ। उअ कबहुँ फेनि मन्दिरवा हइने छडिय, बाकि उपास हसे परथानाक साथ दिन-रात परमेस्वरक आराधना करइ रहिय। 38 तखनहिँ उअ फेनि मरियम हसे योसेफक लघिना याके परमेस्वरके धन्यवाद चढोलिय हसे यरुसलेमक उद्धारक पइडा हेरलहरानिके येसुजिक बारेमा कहलिय। 39 योसेफ हसे मरियम परमेस्वरक व्यवस्था यनुसार जम्मे कमवा करके बचवा येसुजिके लेके गालिलक यपने सहर नासरतमा फिरलइ। 40 बचवा येसुजि बोल, ग्यान-बुद्धिसे भरइते बढलसि हसे परमेस्वरक अनुग्रह हुनेक वपरा रहलइ। मन्दिरवामा बचवा येसुजि 41 येसुजिक दाओ-बाबा पत बरस निस्तार-पाबनि मनावे यरुसलेममा जाइ रहइ। 42 जब येसुजि बारह बरस पुगलसि, हुनुका येसुजिके सङहि लेके पाबनि मनावेके तहिँया यरुसलेममा गेलइ। 43 पबनिया वरलेपर हुनुका घर फिरलइ। बाकि बचवा येसु यरुसलेममा रहलसि। इअ बतवा हुनेक दाओ-बाबाक थाह हइने पउलइ। 44 हुनुका बचवा येसुके दोसरि दफवासाङे बडसि कहके दिन भर बुललइ। साँझ परलेपर हुनुका हुनेके सङहतियवानिक बिचा खोजे लगलइ। 45 जब हुनुका येसुके कहहुँ फेनि हइने पउलइ, तब हुनेके खोजते यरुसलेमवरि फिरलइ। 46 तिन दिन पाछा हुनुका बचवा येसुके मन्दिरवामा यहुदि धरम-गुरुसभसाङे बइठके हुनुकर बात सुनते प्रस्न पुछइ पउलइ। 47 येसुजिक समझ सक्ति हसे हुनेक देलि उतरवा सुनके जम्मे जन गहनि छक परलइ। 48 जब हुनेक दाओ-बाबा येसुजिके देखलइ, तब गहनि छक परलइ हसे हुनेक दाओ कहलिय, “बबुवा, तुइ इअ कथि करलहि त? हेरहि, तोर बाबा हसे मुइ यतियाके तोरके खोजइ रहलहुँ!” 49 बाकि येसुजि हुनुकाके कहलसि, “तोहरा मोरके केहके खोजइ रहलह त? मुइ यापन पिताक घरवामा रहे परतइ कहके कथि तोहार हइने थाह रहलइ?” 50 बाकि येसुजिक कहलि बतवा मरियम हसे योसेफ बुझहि हइने सकलइ। 51 वकरपाछा येसुजि यापन दाओ-बाबासाङे नासरत फिरलसि हसे हुनुकर कहलि बतवा मानके रहलसि। येसुजिक दाओ मरियम इअ जम्मे बतवा यापन मनवामा धरलिय। 52 येसुजि परमेस्वर हसे मन्सावानिक अनुग्रहमा देहिया हसे बुद्धिमा बढते गेलसि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.