लुका 19 - चितवनिया थारुजखायसक मुक्ति 1 जब येसुजि यरिहो सहरवामा पेसके जाइरहलसि, 2 उहे सहरवामा जखायस नाउँक एक जन मन्से रहलिय। उअ कर उठलोहरानिक बडके हाकिम हसे धनि फेनि रहलिय। 3 येसुजि कुने हखसि कहके उअ हेरे खोजइ रहलिय, बाकि मन्सावानिक भिडवामा येसुजिके देखे हइने सकलिय, केहकेकि उअ यपनहिँ ठिसर रहलिय। 4 उहेसे उअ येसुजिके हेरेके तहिँया यागा-यागा दगुरके एगुडा कोइलारक गाछमा चढलिय, केहकेकि हुने उहे पइडावा माहे यवइ रहलसि। 5 जब येसुजि जखायसक चढलि गछवाक लघिना पुगलसि, तब हुने गछवाक वपरावरि हेरके कहलसि, अरे जखायस! तुइ हालि नाभके तर याउ, याजु मुइ तोर घरवामा रहेके बडइ। 6 उहेसे जखायस हलहालि गछवासे तर नाभके यलिय हसे येसुजिके गग्सते यापन घरवामा लिगाके, डउलसे यादर-भाव करलिय। 7 जब मन्सावाह येसुजिके जखायसक घरवामा गेल देखलइ, तब जम्मे जन बरबरइते यसके कहे लगलइ, “इअ मन्सावा त पपियानिक घरवामा फेनि पहुना भके रहे जाइ बडसि।” 8 तखनहिँ जखायस ठडियाके प्रभुजिके कहलिय, “प्रभुजि, सुनहुँ, मुइ याबे यापन सम्पतियाक याधा गरिबवानिके देबहिँ हसे यगर मुइ ककरहुँसे ठगके किहो लेले हखबहिँ जउँ, लेलिक चार गुना फिरा देबहिँ।” 9 तब येसुजि जखायसके कहलसि, “याजु जखायस हसे वकर परिवारमा मुक्ति याइल बडइ, केहकेकि इअ फेनि अब्राहमक सन्तान हखिय। 10 मुइ मन्सेक पुतर भुलइलि मन्सावानिके खोजे हसे बचावेके तहिँया याइल बडहिँ।” सोनक पइसाक दृस्टान्त ( मति २५:१४-३० ) 11 जब मन्सावाह येसुजिक बतवा सुनइ रहलइ, तखनहिँ येसुजि यरुसलेम सहरवाक लजिके रहलसि। मन्सावाह येसुजि यरुसलेम पुगतेकि परमेस्वरक राज यतइ कहके सोचइ रहलइ। उहे बतवा थाह पाके येसुजि हुनुकाके एगुडा दृस्टान्त कहलसि। 12 “एक जन बडके घरानाक मन्से राजाक अधिकार लेके यावेके तहिँया तनाउक देस गेलिय। 13 उअ मन्सावा गेलिसे यागा यापन दस जन बहरियावानिके बलाके एकहक गो सोनक पइसा देके कहलिय, ‘मुइ नाहिँ यवइलइ तोहरा यकरसे व्यपार करिह।’ 14 बाकि वकर देसवाक मन्सावाह वकरेके हइने रुचइ रहलइ। तब उअ गेलिपाछा मन्सावाह यापन प्रतिनिधियानिके इअ कहके रजवाके समाद पठोलइ, ‘इअ मन्सावा हमार राजा झिन हखिय।’ 15 “जब उअ बडकि मन्सावा राजाक अधिकार पाके फिरके यलिय, तब जतेक जन बहरियासभके सोनक पइसा देले रहलिय, हुनुकाके यापन लघिना बलाके पुछलिय, ‘तोहरा व्यपार करके कतेक-कतेक नाफा करलह?’ 16 तब पहिला बहरियावा याके यसके कहलिय, ‘मलिकवा, यपनहुँक देलि सोनवाक पइसावासे मुइ दस गो बढि बनोले बडहिँ।’ 17 उअ बतवा सुनके मलिकवा बहरियावाके च्याबास कहलिय। ‘तुइ इचिके चिजुवामा इमान्दार भेलेसे, जाके दस गो सहर वपरा सासन करसि।’ 18 वकरपाछा दोसरि बहरियावा मलिकवाक लघिना याके कहलिय, ‘मलिकवा, यपनहुँक देलि सोनवाक पइसावासे मुइ पाँच गो बढि बनोले बडहिँ।’ 19 तब मलिकवा वकरेके कहलिय, ‘तुइ फेनि पाँच सहरमा सासन करसि’।” 20 वसने करके तिसरि बहरियावा याके कहलिय, “मलिकवा हेरहुँ, यपनहुँक देलि पइसावा यहवाँहिँ बडइ। मुइ लुगवामा पोकराके डउलसे दब्कोले रहलहि। 21 यपनहुँ निरगुनिया मन्से भेलेसे मोर डर लगलइ, केहकेकि यपनहुँ जाहि चिजुवा हइने लगानि करले रहसहुँ, उहे चिजुवा लेसहुँ हसे जथि हइने बउले रहसहुँ वकर कटनि करसहुँ।” 22 मलिकवा वकरेके कहलिय, “अरे खचड बहरिया, तोरे फदकावा यनुसार मुइ याबे तोरके दन्ड देबहिँ। मुइ निरगुनिया मन्से रहलहिँ हसे जहवाँ लगानि हइने करले रहसहिँ वहवाँसे लेसहिँ तके जथि हइने बउले रहसहिँ वकर कटनि करसहिँ जउँ, 23 तुइ मोर पइसावा केहके ब्याजमा हइने लगोलहि त? मुइ फिरके यवइखुनि किहो नाहिँ भेले फेनि वकर ब्याज त पउतहिँ।” 24 तब मलिकवा लजिके ठडियलि बहरियावानिके कहलिय, “वकरसाङे भेलि पइसावा लेके जाकरसाङे दस गो पइसा बडइ वकरहिँके देह।” 25 बाकि हुनुका कहलइ, “मलिकवा, वकरसाङे त पहिनहिसे दस गो पइसा बडइ।” 26 तब मलिकवा कहलिय, “मुइ तोहराके कहइ बडहिँ, जाकरसाङे बडइ वकरेके याको दियतइ, बाकि जाकरसाङे हइने बडइ, वकरसाङे भेलि फेनि जम्मे निछुरेतइ।” 27 याबे, जुने मोरके राजा बनबिय कहके मन हइने परोसइ, उअ जम्मे दुस्मनवानिके मोरे यागा यानके मारह। यरुसलेममा येसुजिके राजाक यादर ( मति २१:१-११ ; मरकुस ११:१-११ ; युहन्ना १२:१२-१५ ) 28 येसुजि इअ दृस्टान्त कहके हुनुकर यागा-यागा यरुसलेम सहरवरि गेलसि। 29 जब येसुजि जइतुन पहडावाक लजिके भेलि बेथफागे हसे बेथानिया गउँवाक लजिके यापुगलसि, तब यापन दु जन चेलवानिके यसके कहके पठोलसि, 30 “तोहरा उअ गउँवामा जाह हसे जाकर वपरा कुनहुँ फेनि कबहुँ हइने चढल एगुडा गदहाक बाचा बान्हल देखबह, वकरेके फोके मोर लघिना यनिह। 31 यगर कुनहुँ तोहराके इअ गदहावाक बचवाके केहके फवइ बडह कहके पुछतइ जउँ, तोहरा ‘इअ प्रभुजिक तहिँया चाहिँ बडइ’ कहके कहिह।” 32 तब दु जन चेलवाह गउँवामा गेलइ हसे प्रभुजिक कहलि नहिँया गदहावाक बाचा पउलइ। 33 जब हुनुका गदहावाक बचवाके फवइ रहलइ, तब वकर मालिकवासभ चेलवानिके “यकरेके केहके फवइ बडह कहके” पुछलइ? 34 तब हुनुका गदहावाक मलिकावानिके कहलइ, “इअ प्रभुजिके चाहिँ बडइ।” 35 वकरपाछा उअ गदहवाक बचवाके येसुजि लघिना यानके वकर पिठियामा यापन-यापन होडलि लुगवाह बिछादेलइ हसे येसुजिके वकर वपरा चढोलइ। 36 जब येसुजि गदहावा वपरा बइठके जाइरहलसि, तब मन्सावाह यादर करेके तहिँया यापन-यापन बाहराक होडलि लुगवाह पइडावामा बिछावे लगलइ। 37 जब येसुजि यरुसलेम सहरवाक लजिक जइतुन पहडावाक ओल्हइयामा पुगलसि, तखनहिँ जम्मे चेलवाह येसुजिक सक्तिसालि कमवाह करलि देखलेसे गग्सते जबड स्वरसे यसके कहते परमेस्वरक जयजयकार करे लगलइ। 38 “प्रभु परमेस्वरक नउँवामा यइलि रजवा धन्य हखिय। स्वरगमा सान्ति हसे परमेस्वरक महिमा हखइ।” 39 तखनहिँ मन्सावानिक भिडवासे कतेक फरिसियाह येसुजिके कहलइ, “गुरुजि यापन चेलवानिके चुप रहेके कहहुँ।” 40 हुनुकर बतवा सुनके येसुजि जवाफ देते कहलसि, “मुइ तोहराके कहबहिँ, हिनिका चुप रहतइ जउँ, पत्थरावाह फदके लगतइ।” येसुजि यरुसलेमक तहिँया कनलसि 41 जब यरुसलेम सहरवाक लजिके पुगलसि येसुजि उअ सहरवाके देखके कनलसि, 42 “अरे यरुसलेमक मन्सावाह! तोहरा यजुहिँ कस्के सान्ति पउबह कहके जनले रहतह त डउल हतिय। बाकि यखनि तोहरा इअ बतवा हइने बुझलह। 43 तोहार वपरा यसनुक दुःखक दिन यावेके बडइ, जब तोहार दुस्मनवाह चारिवरिसे तोहराके बेरहा बनाके बाहरा नाहिँ जाए सके जोकर घेरतइ, 44 तखनहिँ तोहार दुस्मनवाह तोहार सहरवाके भसकाके मटियामा मिलादेतइ हसे तोहराके फेनि नास करदेतइ। तब एगुडा पत्थरा वपरा दोसरि पत्थरावा फेनि नाहिँ रहतइ, केहकेकि परमेस्वर तोहराके बचावे यइलि जुनवा तोहरा बुझे हइने सकलह।” येसुजि मन्दिरवा भितरासे व्यपारिसभके निकडा देलसि ( मति २१:१२-१७ ; मरकुस ११:१५-१९ ; युहन्ना २:१३-२२ ) 45 वकरपाछा, येसुजि मन्दिरवा भितराक यङनवामा पेसलसि हसे वहवाँ व्यपार करलहरानिके इअ कहके बाहरा निकडा देलसि, 46 “परमेस्वरक वचनमा यसके लिखाइल बडइ, ‘मोर घरवा परथानाक घर हखे परतइ’, बाकि तोहरा त यकरेके ‘डकुवानिक यडडा’ बनादेलह।” 47 तब येसुजि सबदिन मन्दिरवामा मन्सावानिके परमेस्वरक बारेमा सिछा देइ रहलसि, बाकि मुख्य पुजेरियाह, व्यवस्थाक-गुरुसभ हसे समाजक कतेक बडके मन्सावाह येसुजिके मारे खोजइ रहलइ। 48 बाकि हुनुका दाउ हइने पउलइ, केहकेकि जम्मे मन्सावाह हुनेक सिछा मनचोप लगाके सुनइ रहलइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.