लुका 1 - चितवनिया थारु1 माननिय थियोफिलस जि, बहुत जन हमार बिचा घटलि घटनावाक बयान लिखेके काम करले बडइ। 2 इअ घटनावाक बारेमा सुरुहिँसे यपने यखियासे देख्लाहर हसे यकरे बारेमा सुसमाचार परचार करलहरा हमराके कहले बडइ। 3 उहेसे मुइ फेनि यकर बारेमा सुरुहिँसे डउलसे खोजि करलहिँ हसे यपनहुँके इअ बिसयमा पाहि-पाहिसे लिखेके डउल हतइ कहके लिखइ बडहिँ। 4 ताकि इअ कितबवा पढके यपनहुँके सिखोलि बतवाह सदियो हखइ कहके थाह पउहुँ। बप्तिस्मा देलाहर युहन्नाक जनमक बारेमा भविस्यवाडि 5 यहुदिया छेतरक रजवा हेरोदक जुनवामा जकरिया नाउँक एक जन पुजेरि रहलिय। उअ अबिया पुजेरि दाफाक मन्से रहलिय। वकर जनियावाक नाउँ एलिसिबा रहलइ हसे उअ हारुन-कुलक पुजेरिक बेटि रहलिय। 6 हुनुका दुन्हुँ जन प्रभु परमेस्वरक जम्मे आग्या हसे नियम मानके हुनेक लजरियामा धरमि जिन्गि बितोइ रहलइ। 7 हुनुकर सन्तान हइने रहलइ, केहकेकि एलिसिबा बाँझि रहलिय हसे हुनुका दुन्हुँ जन फेनि गहनि बुढाइल रहलइ। 8 एक दिन जब जकरिया यापन दफवाक पलहा यनुसार मन्दिरवामा परमेस्वरक यागा पुजेरिक काम करते रहलिय, 9 तब पुजेरियाक चलन यनुसार वेदियामा धुप बारेके तहिँया चिठा घलइकि जकरियाक नाउँमा परलइ। 10 जब जकरिया धुप बारइ रहलिय, तखनहिँ मन्सावानिक भिड बाहरा जामा भके परथाना करइ रहलइ। 11 तब जकरियाक लघिना प्रभु परमेस्वरक एगुडा स्वरगदुत धुप बारनावा वेदियाक दहिनिवरि परकट भेलसि। 12 स्वरगदुतवाके देखके जकरिया खुभे डेरेलिय। 13 बाकि स्वरगदुतवा वकरेके कहलिय, “अरे जकरिया, झिन डेराहि, परमेस्वर तोर बिन्ति सुनले बडसि। तोर जनियावा एलिसिबा एगुडा बेटा जरमोबिय हसे तुइ वकर नाउँ युहन्ना धरसि। 14 तखनहिँ तुइ खुसि भके गग्गसबहि हसे मन्सावाह फेनि वकर जनममा गग्सतइ, 15 केहकेकि उअ प्रभु परमेस्वरक लजरियामा महान मन्से हखबिय। उअ अंङगुरक मोद कि किहो याको मोद फेनि नाहिँ पियबिय। उअ दाओक पेटवासे पवितर-आत्माक सक्तिसे भरेबिय। 16 उअ बहुत इस्राएलि मन्सेसभके यापन प्रभु परमेस्वरवरि फिरोबिय। 17 उअ आत्मा हसे सक्तिसे एलिया अगमवक्ताक नहिँया भके प्रभुक यागा याके मन्सावानिक हृदय तयार पारबिय। उअ बाबा हसे बेटवा-बेटियानिक बिचा मिलाप यनबिय हसे हइलठि मन्सावानिके परमेस्वरक ग्यान भेलि धरमि मन्सावानिवरि डोर्योबिय।” 18 तब जकरिया स्वरगदुतवाके कहलिय, “इअ बतवा सदियो पुरा हतइ कहके मुइ कस्के जनबहिँ? मुइ त बुढ हखसकलहि हसे मोर जनियावा फेनि बुढि हखसकलिय।” 19 स्वरगदुतवा जकरियाके कहलिय, “मुइ परमेस्वरक यागा रहलाहर गब्रिएल हखहि। परमेस्वर मोरके तोरसाङे बात करे हसे इअ खुसिक समाद सुनावेके तहिँया पठोले बडसि। 20 मोर कहलि बतवा यापन जुनवामा पुरा हतइ। बाकि सुनहि, तुइ मोर कहलि बतवामा विस्वास हइने करलेसे बचवाक जरमलि जुनवालइ तुइ बागड भके फदके नाहिँ सकबहि।” 21 तखनहिँ मन्सावाह जकरियाके मन्दिरवाक बाहरा इसियाइ रहलइ, बाकि उअ देरि करलेसे जम्मे जन यचम्म मनलइ। 22 जब जकरिया बाहरा यलिय, उअ मन्सावानिसाङे फदके हइने सकलिय। उहेसे मन्सावाह उअ दर्सन पउलिय कहके जनलइ। बाकि उअ फदके हइने सकलेसे बाहरा इसियाइ रहलि मन्सावानिक हथवाक इसारासे मतरे बतलोलिय। 23 जब जकरियाक मन्दिरवामा पुजा करेके पलहा वेरेलइ, उअ यापन घर फिरलिय। 24 तब इचिका दिन पाछा वकर जनियावा एलिसिबा भारदेहि भेलिय हसे उअ पाँच महिनालइ घरवासे बाहरा हइने निकडलिय। 25 उहेसे एलिसिबा यसके कहलिय, “इअ काम प्रभु परमेस्वर मोर तहिँया करले बडसि हसे हुने दाया करके मोरके मन्सावानिक यपमानसे बचोलसि।” येसुजिक जनमक बारेमा भविस्यवाडि 26 एलिसिबा भारदेहि भके छ महिना पुगइकि परमेस्वर गब्रिएल स्वरगदुतवाके गालिलि जिल्लाक नासरत सहरवामा एगुडा कुवारि छउडिक लघिना पठोलसि। 27 वकर नाउँ मरियम रहलइ हसे दाउद रजवाक खानदानमा जरमल योसेफ नाउँ मन्सेसाङे वकर बियाहक बात पाका भेल रहलइ। 28 स्वरगदुतवा उअ छउडिया लघिना याके कहलिय, “तोरके सेवा-ढोग बडइ! प्रभु परमेस्वर तोरके बहुत दाया करले बडसि हसे हुने तोरसाङे बडसि।” 29 बाकि मरियम स्वरगदुतवाक कहलि बतवामा गहनि यलमलेलिय हसे बुझे हइने सकके, इअ कस्नुक सेवा-सलाम कहके मनवामा सोचे लगलिय। 30 तब स्वरगदुतवा कहलिय, “मरियम, तुइ झिन डेराहि, परमेस्वर तोरके खुभे दाया करले बडसि। 31 याबे सुनहि, तुइ भारदेहि हखबहि हसे एगुडा बेटा जरमोबहि। तुइ वकर नाउँ येसु धरसि। 32 हुने महान हखबसि हसे हुनेके महान परमेस्वरक पुतर कहतइ। प्रभु परमेस्वर हुनेके यापन पुरखा दाउद नहिँया राजा बनोबसि। 33 हुने याकुबक खानदान वपरा राज करबसि हसे हुनेक राज कबहुँ नाहिँ वरेतइ।” 34 इअ सुनके मरियम स्वरगदुतवाके कहलिय, “इअ कस्के हखे सकतइ त? केहकेकि मुइ एक कुवारि छउडि बडहिँ।” 35 तब स्वरगदुतवा मरियमके कहलिय, “परमेस्वरक आत्मा तोर वपरा यबसि हसे महान परमेस्वरक सक्तिक छाहरि तोरके झपबिय। उहेसे तोरसे जरमेवाला बेटवा पवितर हखबसि हसे परमेस्वरक पुतर कहेबसि। 36 याबे सुनहि, तोर नातेदार एलिसिबा, जकरेके मन्सावाह बाँझि कहइ रहइ, उअ बुढि भके फेनि भारदेहि बडिय हसे वकर पेटवामा यखनि छ महिनाक बेटा बडइ। 37 केहकेकि परमेस्वरक तहिँया जम्मे सम्भव बडइ।” 38 तब मरियम कहलिय, “हेरहुँ, मुइ प्रभु परमेस्वरक दासि हखहि, याबे यपनहुँक कहलि नहिँया हखइ।” वकरपाछा स्वरगदुतवा वहवाँसे बिदा भके गेलिय। मरियम एलिसिबाके भेटलिय 39 इचिका दिन पाछा मरियम यकुतइले यहुदिया छेतरक पहडावावरिक एगुडा गाउँमा गेलिय। 40 वहवाँ उअ जकरियाक घरवामा पेसके एलिसिबाके सेवा-सलाम करलिय। 41 जब एलिसिबा मरियमक सेवा-सलाम सुनलिय, तखनहिँ एलिसिबाक पेटवामा भेलि बचवा वइघरहिँ हुरचुलेलिय हसे एलिसिबा परमेस्वरक आत्मासे भराके, 42 जबड माहे चिल्लाके कहलिय, “तुइ जम्मे जनिनियाह मधे धन्यक हखहि हसे तोरसे जरमलि छोकनि धन्यक हखिय। 43 मुइ कुन हखहि जे तुइ मोर प्रभुजिक दाओ भके फेनि मोरके भेटे यलहिँ? 44 जब तुइ सेवा-सलाम करलहि, तब मोर पेटवामा भेलि बचवा गग्गसके हुरचेलेलिय। 45 “प्रभु परमेस्वर तोरके कहलि बतवा पुरा हतइ कहके विस्वास करलेसे तुइ धन्यक बडहिँ!” मरियमक परमेस्वरक तहिँया बखानक गित 46 तब मरियम कहलिय, “मोर हृदयसे प्रभु परमेस्वरक बखान करइ बडहिँ, 47 हसे मोर आत्मा मोर मुक्तिदाता परमेस्वरमा गग्गसइ बडिय। 48 केहकेकि परमेस्वर मोर नहिँया तुच्छ दासिके फेनि दाया देखोलसि, हेरह, याबेसे जम्मे मन्सावाह मोरके धन्यक कहतइ। 49 केहकेकि सक्तिसालि परमेस्वर मोर तहिँया महान कामसभ करले बडसि, परमेस्वर पवितर बडसि। 50 इज्जत मान करलहरानिक वपरा हुने पुस्ता-पुस्तालइ दाया करबसि। 51 परमेस्वर यापन सक्तिसे महान कामसभ करले बडसि हसे यपनहिँके महान कहके सोचलाहरा जम्मे घमन्डियानिके छाहरछिता पारदेले बडसि। 52 हुने सक्तिसालि रजवानिके यापन राजगद्विसे तर होटा देले बडसि, बाकि नम्र हृदय भेलिनके वपरा उठाके इज्जत देले बडसि। 53 हुने भुखइलिनके यसल चिजुसभसे एघोले बडसि, बाकि धनिसभके छुछले हाथ फिरा देले बडसि। 54-55 परमेस्वर हमार पुरखावानिक तहिँया करलि प्रतिग्या पुरा करके, यापन दास हमरा इस्राएलिसभके मदत करले बडसि। हुने हमार पिता अब्राहम हसे वकर सन्तनवानिके सबदिन दाया करले बडसि।” 56 तखनहिँ, मरियम तिन महिनालइ एलिसिबासाङे रहके यापन घर फिरके यलिय। बप्तिस्मा देलाहर युहन्नाक जनम 57 याबे एलिसिबाक हलुकाएके जुन पुगलइ हसे उअ एगुडा बेटा जरमोलिय। 58 प्रभु वकरेके बहुत दाया करले देखके वकर हितनतवाह हसे ओरसिया-पोरसियाह फेनि वकरसाङे बहुत गग्गसलइ। 59 जब बचवा आठ दिनक भेलिय हसे वकर खतना करेके तहिँया जम्मे जन जामा भेलइ, हुनुका वकर बाबाक नाउँ नहिँया बचवाक नाउँ जकरिया धरे खोजइ रहलइ। 60 बाकि वकर दाओ कहलिय, “हइने, यकर नाउँ युहन्ना धरे परतइ।” 61 हुनुका एलिसिबाके कहलइ, “बाकि तोर हितनतवामा त यसनुक नाउँ भेल कुनहुँ फेनि हइने बडइ!” 62 उहेसे हुनुका जकरियाक बेटवाक नाउँ कथि धरेके कहके हथवा बतलाके पुछलइ। 63 तब जकरिया लिखनावा पटिया मङलिय हसे “यकर नाउँ युहन्ना हखहि परतइ,” कहके पटियामा लिख देलिय। इअ देखके हुनुका जम्मे जन छक परलइ। 64 तखनहिँ जकरिया फदके सकलिय हसे उअ परमेस्वरक बखान करे लगलिय। 65 इअ जम्मे बतवा देखके हुनुकर ओरसिया-पोरसियाह फेनि छक परते परमेस्वरक डर मनलइ हसे इअ बतवाक चरचा यहुदिया जिल्लाक जम्मे पहडावाभर फइललइ। 66 इअ बतवा सुनलहरा जम्मे जन मने-मने यसके सोचे लगलइ, “इअ बचवा बढके पाछे कस्नुक हखबिय त?” केहकेकि प्रभुक सक्ति वकरसाङे रहलइ। जकरियाक अगमवाडि 67 तब उअ बचवाक बाबा जकरिया पवितर-आत्मासे भरके अगमवाडि कहे लगलिय, 68 “इस्राएलिसभक प्रभु परमेस्वरक बखान हखइ, केहकेकि हुने यापन मन्सावानिके मदत करले बडसि हसे छुटकारा देले बडसि। 69 परमेस्वर यापन दास दाउदक खानदानसे एगुडा सक्तिसालि मुक्तिदाता देले बडसि। 70 जसने परमप्रभु बहुत बरस यागा यापन पवितर अगमवक्तावानिसे वाचा करले रहलसि कि, 71 हमार सतरुवानिसे हसे हमराके घिन करलहरानिक सक्तिसे हमराके बचोबसि। 72 प्रभु परमेस्वर हमार पिता-पुरखावानिसाङे करलि पवितर वाचा समझके, हमार पुरखावानिके दाया करले बडसि। 73 हुने हमार पुरखावा अब्राहमसाङे वाचा करले रहलसि कि, 74 हमराके हमार सतरुवानिक हथवासे छुटकारा देबसि, 75 ताकि हमरा नाहिँ डेराके प्रभुक यागा पवितर हसे धरमि भके, जिन्गिभर हुनेक सेवा करे सकबहुँ। 76 अरे मोर बेटवा, तुइ त महान परमेस्वरक अगमवक्ता कहके चिनेबहि हसे तुइ प्रभुक तहिँया पइडा बनावेके प्रभुक यागा-यागा जेबहिँ, 77 हसे तुइ हुनेक मन्सावानिके ‘पापसे छमा पाके मुक्ति पउबह’ कहके सिखोबहि। 78 केहकेकि हमार परमेस्वरक दाया हसे अनुग्रह बिहनाक ज्योति नहिँया स्वरगसे हमार वपरा परतइ, 79 हसे यन्हारिमा रहलाहर हसे मृत्युक लजिक भेलहरवानिके ज्योति देबसि। उहे ज्योतिया हमराके सान्तिक पइडावामा डोर्योबिय।” 80 तब युहन्ना देहिया हसे आत्मिक रुपमा बरियार भके बढते गेलिय हसे इस्राएलिसभक यागा खुल्ला रुपसे यवइलइ उराठ-ठउरियामा रहलिय। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.