युहन्‍ना 10 - चितवनिया थारु

येसुजि यसल भेडहार

¹ येसुजि कहलसि, “मुइ तोहराके सदियो कहइ बडहिँ, जुन मन्‍से भेडवा पेसनवा दुवरियामाहे नाहिँ पेसबिय, बाकि दोसरिकरवामाहे चढके पेसबिय, उअ चोर हसे डाँकु हखिय।

² जुने भेडवा पेसनवा दुवरियामाहे पेसबिय उअ भेडहार हखिय।

³ वकर तहिँया दुवरिया वगरलहरा दुवरिया खोल देबिय हसे भेडवाह वकर स्‍वरवा सुनतइ। उअ यापन भेडवानिक नाउँ लेके बलोबिय हसे हुनुकाके डोर्‍योते बाहरा निकडोबिय।

⁴ जब उअ यापन जम्‍मे भेडवानिके बाहरा निकडा सकबिय, उअ हुनुकर यागा-यागा जेबिय हसे भेडवाह वकर पाछा-पाछा लगतइ, केहकेकि हुनुका वकर स्‍वरवा चिनतइ।

⁵ बाकि हुनुका हइने चिनल मन्‍सेक पाछा नाहिँ लगतइ, बरु भगतइ, केहकेकि वकर स्‍वरवा हुनुका हइने चिनसइ।”

⁶ येसुजि इअ बतवा हुनुकाके दृस्‍टान्‍तक रुपमा कहले रहलसि, बाकि हुनेक बतवाक यरथ हुनुका हइने बुझलइ।

⁷ उहेसे येसुजि फेरि हुनुकाके कहलसि, “मुइ तोहराके सदियो कहइ बडहिँ, भेडवानिक दुवारि मोहिँ हखहि।

⁸ मोरसे यागा यलहरवा जम्‍मे जन चोर हसे डाँकुसभ हखइ, बाकि भेडवाह हुनुकर बतवा हइने सुनलइ।

⁹ दुवारि मोहिँ हखहि, यगर कुनहुँ मोरमाहे भितरा पेसतइ जउँ उअ बचबिय हसे भितरा-बाहरा यवइ-जाइ रहबिय तके जमरवामा चरहे पउबिय।

¹⁰ चोरवा त चोरावे, मारे हसे नास पारेके तहिँया मतरे यसइ। मुइ त हुनुका जिवन पवइ हसे उअ प्रसस्‍त मतरे पवइ कहके याइल हखहि।

¹¹ “यसल भेडहार मोहिँ हखहि। यसल भेडहार यापन भेडवानिक तहिँया यापन प्रान देसिय।

¹² बाकि बनिहारिमा लगावल मन्‍से भेडहार हइने हखिय हसे भेडवानिक मालिक फेनि हइने हखिय। उअ बनकुता यवइकि देखले भेडवानिके छाडके भगबिय हसे बनकुतवा याके भेडवानिके झपटके लिगबिय तके छाहरछिता पारबिय।

¹³ तखनहिँ उअ भागके जेबिय, केहकेकि उअ बनिहारिक मन्‍से मतरे हखिय, उअ भेडवानिक किहो वास्‍ता नाहिँ करबिय।

^14-15 “मुइ यसल भेडहार हखहि। जसने पिता मोरके चिनससि हसे मुइ पिताके चिनसहिँ, वसने मुइ यापन भेडवानिके चिनसहिँ तके मोर भेडवाह मोरके चिनसइ। मुइ भेडवानिक तहिँया यापन प्रान देसहिँ।

¹⁶ “मोर याको भेडा बडइ, हुनुका इअ खोरवाक हइने हखइ। मुइ हुनुकाके फेनि यानेके बडइ। हुनुका मोर स्‍वरवा सुनतइ हसे मोर जम्‍मे भेडवा एगुडे बगाल हतइ तके एगुडे भेडहार हतइ।

¹⁷ पिता मोरके प्रेम करससि, केहकेकि मुइ यापन प्रान देसहिँ हसे फेरि लेसहिँ।

¹⁸ कुनहुँ फेनि मोर प्रान मोरसे लेवे नाहिँ सकतइ, बाकि मुइ यपने राजिखुसिसे यापन प्रान देसहिँ। यापन प्रान देवेके अधिकार मोरसाङे बडइ हसे फेरि लेवेके अधिकार फेनि बडइ। इअ आग्या मुइ मोर पितासे पउले बडहिँ।”

¹⁹ इअ बतवा सुनके यहुदियानिक बिचा फेरि फुट भेलइ।

²⁰ हुनुकरमधे बहुत जन कहलइ, “यकर भुत लागल बडइ हसे पगलाइल बडिय। तोहरा यकर बतवा केहके सुनसह?”

²¹ बाकि याको जन कहलइ, “भुत लागल मन्‍से यसनुक बात हइने फदकसइ। कथि भुत लागल मन्‍से यान्‍हर मन्‍सेके डउल बनावे सकतइ त?”

यहुदि यगुवासभ येसुजिके इन्‍कार करलइ

²² तखनहिँ जाडक जुन रहलइ हसे यरुसलेममा मन्‍दिर यरपनक पाबनि रहलइ।

²³ येसुजि मन्‍दिरवा भितरा सोलोमनक ओसरवामा घुमफिर करइ रहलसि।

²⁴ यहुदि यगुवासभ हुनेक चारिवर जामा भके यसके कहलइ, “यपनहुँ हमराके कहियालइ सक करे लगोबहुँ? यगर यपनहुँ मुक्‍ति देलाहर ख्रिस्‍ट हखहुँ जउँ हमराके स्‍पस्‍टसे कहदेहुँ।”

²⁵ येसुजि जवाफ देते कहलसि, “मुइ तोहराके कहसकले बडहिँ, बाकि तोहरा विस्‍वास हइने करसह। मोर पिताक नाउँमा मुइ जथि कामसभ करसहिँ, उहे मोर गवाहि देसइ।

²⁶ बाकि तोहरा मोर भेडा हइने हखह, उहेसे तोहरा मोरके विस्‍वास हइने करसह।

²⁷ मोर भेडवाह मोर स्‍वरवा सुनसइ। मुइ हुनुकाके चिनसहिँ हसे हुनुका मोर पाछा लगसइ।

²⁸ मुइ हुनुकाके अनन्‍त जिवन देसहिँ। हुनुका कबहुँ नाहिँ नास हतइ हसे कुनहुँ फेनि मोर हथवासे हुनुकाके निछुरके नाहिँ लिगतइ।

²⁹ मोर पिता हुनुकाके मोर जिम्‍मा देले बडसि, हुने सबसे महान बडसि। मोर पिताक हथवासे कुनहुँ फेनि हुनुकाके निछुरके लिगे नाहिँ सकतइ।

³⁰ पिता हसे मुइ एके हखहुँ।”

³¹ यहुदि यगुवासभ येसुजिके मारेके तहिँया फेरि पत्‍थरा उठोलइ।

³² बाकि येसुजि हुनुकाके कहलसि, “मुइ तोहराके मोर पितासे बहुत यसल काम देखोलहिँ। उअ कमवामधे कुन कमवाक तहिँया तोहरा मोरके पत्‍थरासे मारे खोजइ बडह?”

³³ यहुदि यगुवासभ हुनेके जवाफ देलइ, “तोर कुनहुँ यसल कामक तहिँया हमरा तोरके पत्‍थरासे मारे हइने खोजइ बडहुँ, बाकि तुइ परमेस्‍वरक निना करलेसे हखइ, केहकेकि तुइ मन्‍से भके फेनि यपनहिँके परमेस्‍वर बनावे खोजसहि।”

³⁴ येसुजि हुनुकाके जवाफ देते कहलसि, “कथि तोहार यपने धरमसास्‍तरवामा ‘परमेस्‍वर कहससि, तोहरा देवतासभ हखह’ कहके हइने लिखाइल बडइ त?

³⁵ जाकर लघिना परमेस्‍वरक वचन यलइ हुनुकाके हुने देवतासभ कहससि हसे धरमसास्‍तरवा त झुठा नाहिँ हखे सकतइ।

³⁶ बाकि मोरके पिता यापन पवितर उदेस्‍य पुरा करेके तहिँया इअ संसारमा पठोले हखसि। वसके भेले मुइ परमेस्‍वरक पुतर हखहि कहके कहबहिँ जउँ, तोहरा मोरके कस्‍के परमेस्‍वरक निना करसहि कहबह?

³⁷ यगर मुइ मोर पिताक काम हइने करसहिँ जउँ, मोरमा विस्‍वास झिन करिह।

³⁸ बाकि यगर मुइ मोर पिताक काम करसहिँ जउँ, तोहरा मोरमा विस्‍वास नाहिँ करले ताफेनि मोर करलि कमवाह देखके विस्‍वास त करह। तब तोहरा थाह पउबह हसे बुझबह कि, पिता मोरमा बडसि तके मुइ पितामा बडहिँ।”

³⁹ तब हुनुका फेरि येसुजिके पकडे खोजलइ, बाकि हुने हुनुकर हथवासे बचलसि।

⁴⁰ तब येसुजि फेरि यरदन लदियाक वाहिपार गेलसि, जहवाँ युहन्‍ना पहिला बप्‍तिस्‍मा दिय हसे हुने वहवाँहिँ रहलसि।

⁴¹ तखनहिँ बहुत मन्‍से हुनेक लघिना यलइ। हुनुका एक-दोसरि जनके कहलइ, “युहन्‍ना किहो यचम्‍मक काम हइने करलिय, बाकि युहन्‍ना येसुजिक बारेमा जथि कहले रहलिय उअ जम्‍मे बतवा सत्‍य रहलइ।”

⁴² उअ ठउरियामा बहुत मन्‍से हुनेमा विस्‍वास करलइ।