याकुब 5 - चितवनिया थारु

धनि मन्‍सेसभके चेतवनि

¹ धनि मन्‍सावाह, तोहरा मोर बतवा सुनह! तोहार वपरा यावे लगइकि बिपतिक तहिँया डोढा-डोढाके कनते विलाप करह।

² तोहार धन-सम्‍पतिया काम हइने लगना भेल बडइ हसे तोहार लुगाफाटासभ किरवाह खइले बडइ।

³ तोहार सोनवा हसे चनियामा खिया लागल बडइ। उहे खियवा तोहार विरोधमा साछि हखबिय हसे यागि नहिँया उअ तोहार देहियाके जरोबिय। न्‍याय हखेके दिनक यागा अन्‍तिम दिनक तहिँया तोहरा धन जामा करले बडह।

⁴ हेरह, जुन मन्‍सावाह तोहार खेतवामा काम करलइ, हुनुकाके तोहरा बनिहारि हइने देले बडह। उहे बनिहरिया तोहार विरोधमा चिलेबिय हसे हुनुकर पुकार सरवसक्‍तिमान परमप्रभुक कनवालइ पुगल बडइ।

⁵ तोहरा इअ धरतियामा सुख-विलास हसे मोजमाजामा मस्‍त भके रहल बडह। तोहरा यपनहिँके काटेके दिनक तहिँया तयार करइबडह, जसने पसुवानिके मन्‍सावाह कटसइ।

⁶ तोहरा निरदोस मन्‍सेसभके दोस लगाके मारले बडह, जुने तोहार विरोध हइने करले रहलइ।

दुःख-कस्‍टमा सहसान करे परसइ

⁷ उहेसे प्रियसभ, प्रभुजि यवइलइ सहसान करिह। हेरह, खेति करलहरा बहुत मोल परना उब्‍जनिक बरखा हसे जाडक पानि नाहिँ परइकलइ सहसान करके इसियाइ रहसिय।

⁸ तोहरा फेनि सहसान करिह हसे यापन हृदयके स्‍थिर बनोइह, केहकेकि प्रभुक यइना दिन लजिके बडइ।

⁹ प्रियसभ, एक-दोसरि जनक विरोधमा झिन बुदबुदइह, नत तोहरा दोसि ठहरबह। हेरह, न्यायकरता दुवरियामा ठडियाइल बडसि!

¹⁰ प्रियसभ, खाँ दुःख-कस्‍ट हसे सहसान करके सहलहरानिक उदाहरनक रुपमा परमप्रभुक नाउँमा फदकेलहरा अगमवक्‍तावानिके सम्‍झिह।

¹¹ हेरह, सहसान धारन करलहरानिके हमरा धन्यक हखइ कहसहुँ। तोहरा अयुबक सहसानक बारेमा सुनले बडह। परमप्रभु कतुरा दया हसे कृपालु बडसि कहके हुनेक उदेस्‍य तोहरा वकर जिवनमा देखले बडह।

¹² मोर प्रियसभ, सबसे जबड बात त इअ हखइ कि, स्‍वरग, धरतियाक कि याको कुनहुँ चिजुक नाउँमा किरिया झिन खइह। बाकि तोहरा परमेस्‍वरक न्‍यायमा नाहिँ परेके तहिँया तोहार “हँ” चाहिँ “हँ” हसे “हइने” चाहिँ “हइने” हखइ।

विस्‍वासक परथाना

¹³ यगर तोहारमधे कुनहुँ गहनि दुःखमा बडिय जउँ, उअ परथाना करिय। यगर तोहारमधे कुनहुँ आनन्‍दित बडिय जउँ, उअ परमेस्‍वरक प्रसंसाक गित गवइ।

¹⁴ यगर तोहारमधे कुनहुँ मनियाइल बडिय जउँ, उअ मन्‍डलियाक एल्‍डरवानिके बलोइय हसे हुनुका प्रभुक नाउँमा वकरेके तेलवासे अभिसेक करके वकर तहिँया परथाना करइ।

¹⁵ यगर “इअ मनियइलि मन्‍सावाके प्रभुजि डउल बनोबसि” कहके विस्‍वाससे परथाना करले जउँ, प्रभुजि वकरेके डउल बनोबसि। उअ मन्‍सावा पाप करले फेनि प्रभुजि वकरेके छमा करबसि।

¹⁶ उहेसे तोहरा एक-दोसरि जनक यागा यापन-यापन पाप स्‍विकार करिह हसे एक-दोसरि जन डउल हखइ कहके परथाना करिह। धरमि मन्‍सेक परथाना सक्‍तिसालि हसे प्रभावसालि हसइ।

¹⁷ एलिया अगमवक्‍ता फेनि त हमरे नहिँया मन्‍से रहलिय। उअ पानि झिनपरइ कहके पुरा मनसे परथाना करलिय हसे धरतियामा तिन बरस छउ महिनालइ पानि हइने परलइ।

¹⁸ तब उअ फेरि परथाना करलिय हसे यकसवासे पानि परलइ तके भुयवा उब्‍जनि देलिय।

¹⁹ मोर प्रियसभ, तोहारमधे कुनहुँ सत्‍य पइडा छाडके जाइकि यगर कुनहुँ वकरेके फिराके यनबह जउँ,

²⁰ उअ जनिय कि, जुने एक जन पापि मन्‍सेके वकर खाँ खराब पइडासे वकरेके फिराके यनबिय, वकर आत्‍माके उअ मृत्‍युसे बचोबिय हसे वकर बहुत पाप झपबिय।