याकुब 4 - चितवनिया थारु

परमेस्‍वरमा समरपन

¹ तोहार बिचा लडाइ हसे झगडा कहवाँसे यसइ? कथि उअ जम्‍मे तोहार यपनपेटाह अभिलासा, जुन तोहार भितरा लडाइ करइरहसइ, वहवाँसे याइल हखइ हइने त? जुन तोहार भितरा लजरापजरि करइरहसइ।

² तोहरा उअ पावेके इछा त करसह, बाकि हइने पउसह। उहेसे तोहरा हत्‍या करसह हसे लोभ करसह, बाकि हइने पउसह। तोहरा झगडा हसे लडाइ करले फेनि उअ तोहरा हइने पउसह, केहकेकि तोहरा परमेस्‍वरसे हइने मङसह।

³ तोहरा मङले फेनि हइने पउसह, केहकेकि तोहरा यापन खराब अभिलासासभ पुरा करेके तहिँया खराब इछासे मङसह।

⁴ अरे विस्‍वासघाति मन्‍सेसभ! कथि तोहार हइने थाह बडइ कि, जुने संसारके सङहतिया बनावे खोजबिय उअ परमेस्‍वरक सतरु हसिय? यगर कुनहुँ संसारक सङहतिया बने खोजतइ जउँ, उअ यपनहिँके परमेस्‍वरक सतरु बनोबिय।

⁵ कथि तोहरा इअ सोचसह कि, पवितर धरमसास्‍तरवा व्‍यरथमा यसके कहसिय, “परमेस्‍वर हमारमा धरदेलि आत्‍माक तहिँया खाँ डाह करससि?”

⁶ बाकि हुने याको बहुत अनुग्रह देससि। धरमसास्‍तरवामा यसके लिखाइल बडइ, “परमेस्‍वर घमन्‍डियानिक विरोध करससि, बाकि नम्र मन्‍सावानिके अनुग्रह करससि।”

⁷ उहेसे परमेस्‍वरक अदलमा रहिह, सइतनवाक विरोध करिह हसे उअ तोहारसे भगबिय।

⁸ तोहरा परमेस्‍वरक लजिके यइह हसे हुने फेनि तोहार लजिके यबसि। अरे पपियाह, तोहार हथवा धोके सुद्ध पारह। अरे दु मनक मन्‍सेसभ, यापन मनवा सुद्ध पारिह।

⁹ तोहरा दुःखि हखिह, सोक करिह हसे कनिह। तोहार हसटि सोकमा हसे तोहार आनन्‍द निरासमा बदलतइ।

¹⁰ प्रभुक यागा तोहरा यपनहिँके नम्र बनोइह हसे हुने तोहराके जबड बनोबसि।

¹¹ हेरह प्रियसभ, एक-दोसरि जनक विरोधमा खराब बात झिन फदकिह। जुने यापन भयवाक विरोधमा खराब बात फदकतइ कि यापन भयवाके दोस लगोतइ, उअ व्‍यवस्‍थाक विरोधमा फदकबिय हसे व्‍यवस्‍थाके दोस लगोबिय। यगर तुइ व्‍यवस्‍थाके दोस लगोबहि जउँ, तुइ व्‍यवस्‍था यनुसार चललाहर हइने भेलहिँ, बाकि व्‍यवस्‍थाक न्याय करलाहर भेलहिँ।

¹² व्‍यवस्‍था देलाहर हसे न्याय करलाहर एक जन बडसि। हुने मतरे मन्‍सावानिके बचावे हसे नास करे सकबसि। बाकि यापन पोरसियावाके दोस लगोलहर तोहरा कुने हखह?

¹³ “याजु कि यनदिने हमरा कुनहुँ सहरवामा जेबहुँ, वहवाँ एक बरस बितोबहुँ हसे व्‍यपार करके नाफा करबहुँ” कहलहरा तोहरा मोर बतवा सुनह।

¹⁴ यनदिने कथि हतइ कहके तोहरा हइने जनसह। तोहार जिन्‍गि कथि हखइ त? तोहार जिन्‍गिया त यघरिक तहिँया देखा परना हसे बिलइना कुइसा नहिँया हखइ।

¹⁵ यकर सटहा त तोहरा यसके कहेके रहलइ, “यगर प्रभुक इछा भेले जउँ, हमरा बचबहुँ हसे यसनुक कि वसनुक करबहुँ।”

¹⁶ बाकि तोहरा त यपने योजनामा घमन्‍ड करसह। यसके घमन्‍ड करेके हइने डउल हखइ।

¹⁷ उहेसे जुने भलाइ करे जानके फेनि नाहिँ करबिय जउँ, उअ पाप करसिय।