याकुब 3 - चितवनिया थारु

जिभियाके वसमा पारेके

¹ मोर प्रियसभ, तोहारमधे बहुत जन सिछक बने झिन खोजिह। केहकेकि तोहार थाह बडइ, हमरा जुने सिछा देसहुँ परमेस्‍वर हमार न्यायक जनसे झन काडासे करबसि।

² केहकेकि हमरा जम्‍मे जन बहुत गल्‍ति करइ रहसहुँ। यगर कुनहुँ मन्‍से यापन फदकलि बतवामा गल्‍ति नाहिँ करबिय जउँ, उअ सिद्ध मन्‍से हखिय। उअ यपनहिँके वसमा राखे सकबिय।

³ यगर हमरा यापन वसमा पारेके तहिँया घोडवानिक मुहवामा लगाम लगोबहुँ जउँ, हुनुकाके जहवाँ मन लगतइ वतहि लिगाए सकबहुँ।

⁴ वसने करके पनिया जहजावानिके विचार करह, उअ बडके-बडके रहसइ हसे जबडे बयारसे चलसइ। ताफेनि पाछा भेलि छोटे पतवारसे, जहजवा चलोलहराक जहवाँ मन लगतइ वतहि लिगसिय।

⁵ वसने करके जिभिया देहियाक छोटे यङग भेले फेनि इअ जबड-जबड बातमा घमन्‍ड करसिय। हेरह, एगुडा झिनिक यागिक फुन्‍गिसे जबड वनमा यागि लागे सकसइ।

⁶ जिभिया फेनि त एगुडा यागि हखिय। इअ देहियाक याको यङगसभमधे बहुत दुस्‍ट काम करे सकलाहर सक्‍ति हखिय। इअ जम्‍मे देहियाके असुद्ध बनोसिय। इअ नरकक यगिया लेके हमार पुरा जिन्‍गियामा यागि लगादेसिय।

⁷ जम्‍मे खलिक जनावर, चेरइसभ, घिसियाके बुलाह जनावर हसे समुनदरक प्रानिसभके तह लगावे सकेसइ तके मन्‍सावासे तह फेनि लगाइल बडइ।

⁸ बाकि जिभियाके कुनहुँ मन्‍से फेनि तह लगावे हइने सकसइ। जिभिया विनास करना बिख भरल अस्‍थिर दुस्‍ट हखिय।

⁹ हमरा प्रभु हसे पिताके इहे जिभियासे धन्यवाद देसहुँ हसे यकरहिँसे परमेस्‍वरक स्वरुपमा बनलि मन्‍सावानिके सराप देसहुँ।

¹⁰ प्रियसभ, एगुडा मन्‍से मुहसे यासिरवाद हसे सराप निकडोसइ। वास्‍तवमा इअ ठिक हइने हखइ।

¹¹ कथि पनियाक एगुडे म्‍वाकामाहे सवाद हसे तिता पानि निस्‍कतइ त?

¹² मोर प्रियसभ, कोइलारक गाछमा जइतुन फरे नाहिँ सकतइ हसे अंङगुरक लतिमा कोइलार फरे नाहिँ सकतइ। तिता पानिक म्‍वाकासे सवाद पानि नाहिँ निसकतइ।

दु खलिक बुद्धि

¹³ तोहारमधे बुद्धियार हसे ग्‍यानि मन्‍से कुने बडिय? उअ यापन यसल चालचलनसे बुद्धिक नम्रतामा यापन कामसभ देखोइय।

¹⁴ बाकि यगर तोहार मनवामा डाह हसे यपनपेटाह बडइ जउँ, वकर बारेमा घमन्‍ड झिन करिह हसे सत्‍यक विरोधमा झुठा झिन फदकिह।

¹⁵ यसनुक बुद्धि त स्‍वरगसे यइना बुद्धि हइने हखइ। बाकि इअ त संसारिक, अनात्‍मिक हसे सइतानक हखइ।

¹⁶ केहकेकि जहवाँ डाह हसे यपनपेटाह बात बडइ, वहवाँ गोजमोज हसे जम्‍मे खलिक दुस्‍ट काम हसइ।

¹⁷ बाकि स्‍वरगसे याइल बुद्धि त सबसे पहिला सुद्ध, मिलाह, सोझ, विचारसिल, दयासे भराइल हसे यसल फरसे भरल, निस्‍पछय तके इमान्‍दार रहसइ।

¹⁸ सान्‍ति यनलहरा मन्‍सावा मेलमिलापक काम करके धारमिकताक फर बटियोसइ।