याकुब 2 - चितवनिया थारुपछपातक बारेमा चेतवनि 1 मोर प्रियसभ, हमार महिमित प्रभु येसु ख्रिस्टके तोहरा विस्वास करलेसे ककरहुँके फेनि पछपात झिन करिह। 2 यगर कुनहुँ एक जन धनि मन्से सोनक यङुठिसभ हसे बहुत महङ झोलिया पेहरके तोहार सभामा यबिय हसे कुनहुँ एक जन गरिब मन्से फेनि फाटल-मइलाइल झोलिया पेहरके यबिय जउँ, 3 यगर तोहरा महङि झोलियावा पेहरलि मन्सावाके विसेस यादर करते, “यपनहुँ इअ डउलि ठउरियामा बेठहुँ” कहके कहबह, बाकि उअ गरिबवाके, “तुइ यहवाँहिँ ठडियाहि कि भुयवामा मोर गोडवा लघिना बेठहि” कहके कहबह जउँ, 4 कथि तोहरा यपने बिचा पछपात हइने देखोलह हसे खराब विचार भेल न्यायकरता हइने भेलह त? 5 मोर प्रियसभ, सुनह, कथि परमेस्वर संसारमा भेलि गरिबवानिके विस्वासमा धनि बनावेके हसे परमेस्वरक राजक उतराधिकारि हखेके तहिँया हइने छानलसि त? उहे राज हुनेके प्रेम करलहराके देबहि कहके हुने प्रतिग्या करले बडसि। 6 बाकि तोहरा त गरिबवानिके यपमान करले बडह। कथि धनि मन्सावाह तोहराके यत्याचार हइने करसइ त? कथि हुनुका तोहराके अदालतमा हइने लिगसइ त? 7 कथि हुनुका उहे यादरनिय नाउँक यपमान हइने करलइ त जुन नाउँसे तोहरा बलावल बडह? 8 यगर, “यापन पोरसियावाके यपने नहिँया प्रेम करह” कहके धरमसास्तरवामा भेलि राजकिय व्यवस्था पालन करबह जउँ तोहरा यसल करइबडह। 9 यगर तोहरा पछपात करबह जउँ तोहरा पाप करसह हसे परमेस्वरक व्यवस्था तोहराके दोसि ठहरोबिय। 10 केहकेकि जुने पुरा व्यवस्था पालन करसिय, बाकि एगुडे बातमा चुकबिय जउँ, व्यवस्थाक जम्मे बतवामा उअ दोसि ठहरबिय। 11 केहकेकि जुने, “धुचुड झिन करिह” कहके कहलसि, हुने “हत्या झिन करिह” कहके फेनि कहलसि। उहेसे यगर तुइ धुचुड नाहिँ करबहि हसे हत्या करबहि जउँ, तुइ फेनि याको जनक नहिँया व्यवस्था-भङ करबहि। 12 उहेसे परमेस्वरक स्वतन्तर व्यवस्था यनुसार तोहार न्याय हतइ कहके जानके वसने फदकह तके काम करह। 13 जुने याको जनके दाया नाहिँ देखोबिय, उअ दाया नाहिँ पउबिय। बाकि यगर तोहरा दाया देखोबह जउँ, परमेस्वर तोहराके दाया करबसि, जब हुने तोहार न्याय करबसि। विस्वास हसे काम 14 मोर प्रियसभ, यगर कुनहुँ मन्से “मोरसाङे विस्वास बडइ” कहबिय, बाकि उअ देखावेके तहिँया उअ काम नाहिँ करबिय जउँ, यकरसे वकर कथि फाइदा? कथि वकर विस्वास वकरेके बचावे सकबिय त? 15 यगर कुनहुँ भाइ कि बहिनिक पेहरेके लुगा हइने बडइ हसे वकर दिन-दिनक खइना जेउना फेनि किहो हइने बडइ जउँ, 16 हसे तोहारमधे कुनहुँ वकरेके, “सान्तिसे जाहि, कुमियाके रहसि हसे यघाइलइ खइसि” कहके कहबह, बाकि वकर चाहिँ लगना चिजु नाहिँ देबह जउँ कथि फाइदा भेलइ त? 17 वसने करके यगर तोहारमधे कुनहुँ विस्वास यनुसार काम नाहिँ करबिय जउँ, वकर विस्वास त मरल हखइ। 18 बाकि कुनहुँ कहतइ, “तोरसाङे विस्वास बडइ, मोरसाङे कामसभ बडइ।” काम बिनाक तोर विस्वास मोरके देखोहि हसे मुइ त काम करके यापन विस्वास तोरके देखोबहिँ। 19 परमेस्वर एगुडे बडसि कहके तुइ विस्वास करसहि, उअ यसल हखइ। भुतत्मावाह फेनि त विस्वास करसइ हसे डरेसे दुलदुलेसइ। 20 मुरुख मन्से, कथि तोहरा काम बिनाक विस्वास बेकाम हखइ कहलि बतवाक परमान चाहसह? 21 जब हमार पुरखावा अब्राहम यापन बेटवा इसहाकके वेदियामा चढोलिय, तब यापन कामसे परमेस्वरक यागा उअ धरमि हइने ठहरलिय त? 22 तुइ देखसहि कि, वकर कमवा सङहि विस्वास क्रियासिल रहलइ तके कमवासे वकर विस्वास पुरा भेल बडइ। 23 यसने “अब्राहम परमेस्वरमा विस्वास करलिय हसे परमेस्वर वकरेके धरमि ठहरोलसि” कहके धरमसास्तरवाक कहलि इअ वचनवा पुरा भेलइ तके उअ हुनेक सङहतिया कहेलिय। 24 तोहरा देखसह कि, मन्से कामसे धरमि ठहरसइ, विस्वाससे मतरे हइने। 25 वसने करके राहाब बेस्या फेनि, जब उअ सुराक लगोलहरानिके सत्कार करके दोसरि पइडवामाहे पठादेलिय, वकर इअ कमवा वकरेके धरमि हइने ठहरोलिय त? 26 जसने देहिया आत्माबिना मरल रहसिय, वसने विस्वास फेनि कामबिना मरल रहसिय। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.