हिब्रु 9 - चितवनिया थारुपुरान करार यनुसारक आराधना 1 पहिलाक करारमा परमेस्वरक आराधना करना धारमिक नियम रखाइल रहलइ हसे परमेस्वरक आराधना करेके तहिँया इअ संसारमा एगुडा पवितर ठउरि फेनि रहलइ। 2 उअ आराधनाक ठउरियामा एगुडा पवितर तम्बु रहलइ हसे वकर दु गो कोठा रहलइ। यागाक कोठवामा डिबरि धरना, टेबुल हसे परमेस्वरके चढावल रोटिसभ रखाइल रहलइ। यकरेके पवितर ठउरि कहइ। 3 दोसरो परदावाक भितर दोसरे कोठा रहलइ हसे वकरेके महापवितर ठउरि कहइ। 4 यकरमा धुप बारना सोनक वेदि हसे सोनसे मोहरल सन्दुक रहलइ, जकरेके वाचाक सन्दुक कहइ। उअ सन्दुकवामा मन्न कहल खइना चिजु रखाइल सोनक भडिया, टेमरा लागल हारुनक लाठि हसे दस आग्या लिखाइल दु गो पत्थराक पाटिसभ रहलइ। 5 उअ सन्दुखवा वपरा करुब कहल दु गो डयना भेल जिवसभ बनाइल रहलइ। हुनुका परमेस्वरक उपस्थितिक चिन्हा नहिँया रहलइ हसे हुनुकर डयनवाह पाप छमा करना ठउरिया वपरा फइलके छाहर रहलइ। बाकि यखनि चाहिँ उअ जम्मे बतवा एकहक करके कहे नाहिँ सकेतइ। 6 यसने जम्मे चिजु मिलोले पर पुजेरियाह यापन विधि हसे करतव्य पालन करते दिन-दिन पहिलो कोठवा, जकरेके पवितर ठउरि कहइ, वकरे भितरा पेसइ। 7 बाकि दोसरो कोठवा जकरेके महापवितर स्थान कहेसइ, वकरमा प्रधान पुजेरिया बरसक एकपल्टा मतरे यसकरे जइय। उअ रकत लेके मतरे जइय हसे उअ रकतवा यापन पापक तहिँया तके मन्सावानिक थाह हइने पाके करलि पापक तहिँया चढोइय। 8 इअ जम्मे बातसभसे, पवितर-आत्मा इअ देखोससि कि, जखनिलइ इअ पहिला तम्बुवा रहतइ, तखनिलइ परमेस्वरक महापवितर ठउरिया भितरा जइना पइडा नाहिँ खुलतइ। 9 इअ त यखनिक समयमा मन्सावानिके देखोना एगुडा नमुना मतरे हखइ। पुजेरिसभ परमेस्वरके चढोना भेटि हसे भोगसे परमेस्वरके आराधना करे यइलहरा मन्सावानिक मनवाके सुद्ध बनावे नाहिँ सकतइ। 10 उअ जम्मे पुरान भोग हसे भेटिसभ त मन्सेक खाए-पिए बातसे सम्बन्धित हसे फरक-फरक खलिकसे धोके सुद्ध हखना नियम मतरे हखइ। इअ जम्मे परमेस्वरक लउठा वाचा नाहिँ यवइलइ देहियामा पालन करे परना मतरे हखइ। ख्रिस्टक रकत 11 बाकि ख्रिस्ट त यहवाँ भेलि जम्मे यसल चिजुसभक प्रधान पुजेरि भके यासकल बडसि। हुने याको महान हसे सिद्ध पवितर तम्बुसे हखते गेलसि, जुन मन्सेक हाथसे बनावल हइने हखइ तके इअ संसारमा सिरिस्टि करल चिजु फेनि हइने हखइ। 12 हुने महापवितर ठउरियामा बोका हसे बाछासभक भोग चढावल रकत लेके हइने पेसलसि, बाकि यपने रकतवा लेके एकेपारि सबदिनक तहिँया पेसलसि हसे यसने हमराके सबदिनक तहिँया बचोलसि। 13 यगर बोका हसे साढ गोरुसभक रकत तके कलोर बाछिक छाउर असुद्ध मन्सावानिक वपरा छिटइकि हुनुकर देहिया सुद्ध हतइ जउँ, 14 ख्रिस्टक रकत त वकरसे झन बढता चिजु करे सकतइ। हुनेक रकतसे हमार करल दुस्ट कामसभक कारनसे असुद्ध भेल विवेकके सुद्ध बनोसिय, जाकर कारनसे, हमरा जिउते परमेस्वरके आराधना करे सकबहुँ। केहकेकि हुने परमेस्वरक सबदिन रहना आत्मासे यपनहिँके निरदोस भोगक रुपमा परमेस्वरमा समरपन करलसि। 15 उहेसे परमेस्वरक प्रतिग्या करलि सबदिन रहना आसिस हुनेक बलोलि मन्सावाह पवइ कहके, ख्रिस्ट त परमेस्वर हसे मन्सावानिक बिचा मध्यस्थ बनके एगुडा लउठा करार स्थापना करलसि। पहिलाक पुरान करारक अदलमा मन्सावानिक करलि पापसभसे हुनुका मुक्ति पवइ कहके ख्रिस्ट उहे मुक्तिक मोल तिरेके तहिँया यापन प्रान देलसि। 16 केहकेकि मन्सावाह मरलि पाछा यापन सम्पतिया बाटेके तहिँया इछा-पतर बनोसइ। इछा-पतरमा लिखलि बतवा लागु करेके इछा-पतर बनोलहरा मन्सावाक मृत्यु भेल परमान हखे परतइ। 17 इछा-पतर देलहरा मन्सावा बचइलइ उअ इछा-पतर काम नाहिँ करबिय। इछा-पतर देलहरा मन्सावा मरलेपर मतरे इछा-पतर काम करबिय। 18 उहेसे पहिलाक करार फेनि पसुक रकत भोग हइने चढोइलइ पाका हइने भेलइ। 19 जब मोसा व्यवस्थामा लिखइलि जम्मे आग्यासभ मन्सावानिके सुनासकलिय, तब उअ बाछा हसे बोकासभक रकतमा पानि लाल उनक तके हिसपक डार मिझराके व्यवस्थाक कितबवामा हसे जम्मे मन्सावानिमा छिटलिय। 20 वकरपाछा उअ यसके कहलिय, “इअ रकतवा, तोहरा पालन करेके परमेस्वरक बन्हलि करारके पक्का करसिय।” 21 वसने मोसा पवितर तम्बु हसे आराधनामा चलइनवा जम्मे भडियावाहमा रकत छिटलिय। 22 वास्तवमा मोसाक व्यवस्थाक कहलि नहिँया भोगवा चढोलि रकतावा लगभग जम्मे चिजु सुद्ध बनोसिय हसे रकत नाहिँ बहाके पापक छमा हखे नाहिँ सकतइ। 23 पवितर तम्बु हसे वकरमा भेलि जम्मे चिजुवा, स्वरगमा भेलि चिजुसभक नमुना मतरे हखइ। यगर स्वरगिय चिजुसभक नमुनाके सुद्ध पारेके इअ विधिसभ चाहिँ लगलइ जउँ, स्वरगक चिजुसभके सुद्ध पारेके त वकरसे याको यसल भोग चाहिलगसइ। 24 ख्रिस्ट त मन्सेक हाथसे बनावल महापवितर ठउरियामा हइने पेसलसि, जुन सत्य पवितर ठउरियाक नमुना मतरे हखइ, बाकि हुने स्वरग भितरा पेसलसि हसे हमार तहिँया परमेस्वरक यागा उपस्थित बडसि। 25 जसने यहुदिसभक प्रधान पुजेरिया भोग भेलि पसुवाक रकत लेके साले-साल महापवितर ठउरियामा पेससइ, बाकि ख्रिस्ट त घर-घराहे यपनहिँ भोग हखेके स्वरगमा हइने गेलसि। 26 यगर यसके हखइ त संसार सिरिस्टि भेलिसे हुने घर-घराहे दुःख भोगे परतिय, बरु हुने त इअ जुगवाक याखिर दिनवाहमा सबदिनक तहिँया एकेपारि यलसि हसे मन्सावाके पापसे छुटकारा देवेके तहिँया हुने यपनहिँ भोग हखलसि। 27 इअ बात निस्चित बडइ कि, मन्से एकपल्टा मरे परतइ हसे वकरपाछा वकर न्याय हतइ। 28 वसने ख्रिस्ट, जुने बहुत जनक पाप छमाक तहिँया यपनहिँ भोग हखलसि, हुने दोसरि पारि यबसि हसे तखनि पाप छमाक तहिँया हइने, बाकि हुनेके इसियलरानिके मुक्ति देवेके तहिँया यबसि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.