हिब्रु 7 - चितवनिया थारुप्रधान पुजेरि मल्किसेदेक 1 मल्किसेदेक सालोम सहरवाक राजा हसे सबसे महान परमेस्वरक पुजेरि रहलिय। अब्राहम जखनि रजवानिके लडाइमा जितके फिरइ रहलिय, तखनहिँ मल्किसेदेक वकरेके भेटके यासिरवाद देलिय। 2 अब्राहम रजवानिसे लडाइमा जितके यनलि जम्मे धन-सम्पतियाक दसांस मल्किसेदेकके देलिय। मल्किसेदेकक नाउँक यरथ चाहिँ “न्यायसे सासन करलाहर राजा” हसे सालोमक राजा कहले “सान्तिक राजा” हखइ। 3 कुनहुँ फेनि मल्किसेदेकक दाओ-बाबा हसे वकर पुरखाक बारेमा हइने जनसइ। वकर जनम हसे मृत्युक बारेमा फेनि ककरहुँक हइने थाह बडइ, बाकि परमेस्वरक पुतर नहिँया उअ सबदिनक पुजेरि हखिय। 4 मल्किसेदक कतुरा महान मन्से रहलिय कहल बात तोहरा यकरसे बुझे सकबह, केहकेकि हमार नाउँ चलल पुरखावा अब्राहम फेनि लडाइमा जितके यनलि चिजुवाक दसांस वकरेके देलिय। 5 व्यवस्था यनुसार, पुजेरिक पदमा नियुक्त भेलि लेविक सन्तानसभ यापन इस्राएलि ददेर-भयवानिसे दसांस उठोसइ। इअ इस्राएलि ददेर-भयवाह फेनि अब्राहमक वंससे याइल हखइ, ताफेनि व्यवस्था हुनुकरसे दसांस उठावेके अधिकार लेविसभक सन्तानके दियाइल बडइ। 6 बाकि मल्किसेदक त लेविक सन्तान हइने रहलिय, ताफेनि उअ अब्राहमसे दसांस लेलिय हसे उअ परमेस्वरक प्रतिग्या पउलहरा अब्राहमके यासिरवाद देलिय। 7 छोटे मन्से जबड मन्सेसे आसिस पउसइ कहल बात जम्मे जनक थाह बडइ। 8 मरके गेलहर पुजेरिसभ त दसांस लेलइ, बाकि मल्किसेदक हुनुकरसे फेनि महान हखिय, केहकेकि उअ सबदिन जिउते रहबिय कहके धरमसास्तरवामा कहाइल बडइ। 9 कुनहुँ यसके कहे सकतइ कि, जब अब्राहम मल्किसेदकके दसांस देलिय, तब दसांस लेलहरवा लेवि फेनि मल्किसेदकके दसांस देलिय। 10 केहकेकि मल्किसेदेक अब्राहमके भेटइकि लेविक जनम हइने भेल रहलइ, बाकि यसके बुझइकि त उअ अब्राहमक देहियामा रहलिय, केहकेकि उअ अब्राहमक कुलसे जरमलिय। येसुजि मल्किसेदक नहिँया सबदिनक पुजेरि हखबसि 11 जब परमेस्वर इस्राएलि मन्सावाके व्यवस्था देलसि, हुने लेवि-कुलक सन्तानसभके पुजेरिक पदमा नियुक्ति करके इस्राएलि मन्सावानिके व्यवस्था पालन करेके जिम्मा देलसि। बाकि लेवि पुजेरिक कामसभ मन्सावाके परमेस्वरक यागा पवितर बनावे हइने सकलइ, वसने करके लेविक कुलसे यइना हारुनक सन्तानसे हइने, बरु मल्किसेदेक नहिँया दोसरे पुजेरि चाहिँ लगइ। 12 केहकेकि जब पुजेरि पद बदलेसइ, तब व्यवस्था फेनि फेरहिँ परतइ। 13 इअ हमार प्रभुक बारेमा कहाइल हखइ। हुने त दोसरे कुलक हखसि, जुन कुलसे कुनहुँ फेनि कबहुँ हइने पुजेरि भके काम करले बडइ। 14 इअ जम्मे जनक थाह बडइ कि, हमार प्रभु त यहुदाक कुलसे याइल हखसि हसे मोसा यहुदाक कुलसे पुजेरि हखेके बारेमा किहो फेनि हइने कहले बडिय। 15 मल्किसेदेक नहिँया दोसरे पुजेरि यासकलेसे, याबे लेवि-कुलक पुजेरि पद हसे व्यवस्था फेरासकल बडइ कहके झन याको स्पस्ट हसइ। 16 हुने मन्सावानिक देल आग्या हसे व्यवस्थाक आधारमा पुजेरि हइने भेल हखसि, बाकि कबहुँ हइने नास हखना जिवनक सक्तिक आधारमा पुजेरि भेल हखसि। 17 केहकेकि धरमसास्तरवामा यसके लिखाइल बडइ, “मल्किसेदेक नहिँया यपनहुँ सबदिनक तहिँया पुजेरि हखहुँ।” 18 केहकेकि पुजेरिक नियुक्तिक बारेमा रहलि पहिलाक पुरान व्यवस्था किहो करे हइने सकना हसे काम हइने लगना भेलेसे खारिज भेल बडइ। 19 मोसाक व्यवस्था किहो चिजु फेनि सिद्ध बनावे हइने सकलिय, बाकि याबे त वकरसे याको दोसरे यसल यासा हमराके दियाइल बडइ, जुने हमराके परमेस्वरक लजिके पुगोसिय। 20 परमेस्वर इअ कमवा किरिया हइने खाके हइने करले हखसि। पहिनाक पुजेरि हखलहरा किरिया हइने खाके पुजेरिक पद पउले रहलइ, 21 बाकि येसुजि किरिया सहित पुजेरिक पद पउले बडसि, हुनेक कहलि बतवा धरमसास्तरवामा यसके लिखाइल बडइ, “परमप्रभु किरिया खइले बडसि हसे हुने यापन मनवा नाहिँ बदलबसि, तुइ सबदिनक तहिँया पुजेरि हखहि।” 22 इहे किरिया येसुजिके उतम करारक जमानत बनोसिय। 23 लेवि-कुलक पुजेरि हसे येसुजिक बिचा याको कथि फरक रहलइ, लेवि-कुलक पुजेरिसभक संख्या बहुत रहलइ, केहकेकि हुनुका मरे परलेसे यापन सेवा सबदिन करे हइने सकलइ। 24 बाकि येसुजि कबहुँ नाहिँ मरबसि, उहेसे हुनेक पुजेरि पद सबदिनक तहिँया रहतइ। 25 उहेसे येसुजिमा विस्वास करके परमेस्वर लघिना यलहरावानिके हुने सबदिन उद्धार करे सकबसि, केहकेकि हुनुकर तहिँया परमेस्वरसाङे परथाना करेके हुने सबदिन जिउते बडसि। 26 हमार तहिँया चाहिँ लागल प्रधान पुजेरि फेनि यसने हखइ। हुने पवितर, निरदोस हसे सुद्ध बडसि तके हमरा मन्सावानि नहिँया पापि हइने बडसि। परमेस्वर हुनेके सबसे वपरा स्वरगमा रखलसि। 27 याको प्रधान पुजेरियानि करलि नहिँया पहिला यापन पापक तहिँया हसे याको जनक पापक तहिँया दिन-दिन भोग चढोइ रहे नाहिँ परतइ, केहकेकि हुने एके पारिमा सबदिनक तहिँया पुगे जोकर भोगक रुपमा यपनहिँके चढोलसि। 28 व्यवस्था त कमजोर मन्सेसभके प्रधान पुजेरिक रुपमा नियुक्त करलिय, बाकि जुन प्रतिग्याक किरिया परमेस्वर व्यवस्थासे पाछा खेलसि, उअ पुतरके नियुक्त करसिय, जुने सबदिनक तहिँया सिद्ध बनोले बडसि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.