हिब्रु 6 - चितवनिया थारु1 उहेसे ख्रिस्टक बारेमा हमरा सुरुमा सिखलि उसार सिछासभके छाडके गहिर सिछावरि बढु। मृत्युवरि लिगना करमसभसे पछताप हसे परमेस्वर वपरा विस्वास करलाहर नहिँया सुरुक सिछामा मतरे झिन लगिह। 2 हमरा तोहराके बप्तिस्मासभक बारेमा, मन्सेसभ वपरा हाथ राखके परथाना करेके बारेमा, मरलिसभ जिउते भके उठना बातक बारेमा हसे याखिरि न्याय पाछा परमेस्वर मन्सावानिके देना अनन्त दन्डक बारेमा फेरि-फेरि बात करे नाहिँ परतइ। 3 यगर परमेस्वर अनुमति देबसि जउँ, हमरा हुनेमा यागावरि बढना सिछा सिखबहुँ। 4 केहकेकि एकपल्टा सत्य ग्यानक बारेमा जानल, स्वरगिय वरदान चिखल, पवितर-आत्माक सहभागि भेल, 5 परमेस्वरक वचन यसल बडइ कहके जानल हसे यावेवाला जुगक सक्तिक बारेमा थाह करलसभ, 6 उअ चिजुवा जानके फेनि फिरके जेतइ जउँ, हुनुकाके फेरि पछताप करे लगाके परमेस्वर लघिना फिरावे नाहिँ सकेतइ, केहकेकि यसनुक मन्से परमेस्वरक पुतरके फेरि क्रुसमा टङसइ हसे जम्मे जनक यागा खुल्लमखुल्ला हुनेक यपमान करसइ। 7 जुन भुयवा घर-घराहे बरखाक पानि सोकसिय हसे खेति करलहरानिके चाहिँ लगना यन्न देसिय, उअ भुयवाके परमेस्वर आसिस देबसि। 8 बाकि यगर उअ भुयवा काँट हसे सिउडि जमोबिय जउँ, उअ त बिनाकामक हतइ। यसनुक भुइमा त परमेस्वरक सराप परे सकतइ हसे याखिरमा उअ यगियामा जरेतइ। 9 प्रिय सङहातिसभ, हमरा तोहार बारेमा यसके फदकले ताफेनि, तोहार बारेमा इअ पाका बडइ कि, तोहरा उद्धार पावल मन्सेसभक करना कामसभ नहिँया तोहरा फेनि असल काम करइबडह। 10 तोहरा परमेस्वरक मन्सावानिके सेवा करके हुनेके यापन प्रेम देखोले बडह हसे यखना फेनि यसने सेवा करइबडह। तोहार करलि इअ सेवा हसे प्रेम हुने कबहुँ नाहिँ बिसरोबसि, परमेस्वर अन्याय हइने करससि। 11 इहे हमार चाहना बडइ कि, तोहार जम्मे जनक इअ जोसवा याखिरलइ यसने रहइ हसे तोहरा परमेस्वरसे जथि पावेके यासा रखले बडह उअ पउबह। 12 तोहरा यल्छि नाहिँ हखके, यसनुक मन्से नहिँया हखिह, जुने विस्वास हसे सहसानसे परमेस्वर देवेके प्रतिग्या करलि चिजु पउसइ। परमेस्वरक प्रतिग्याक निस्चयता 13 परमेस्वर अब्राहमसाङे प्रतिग्या करइकि किरिया खाएके यापनसे याको जबड कुनहुँ हइने भेलेसे हुने यपने नाउँमा यसके कहके किरिया खेलसि। 14 हुने कहलसि, “सदियो मुइ तोरके आसिस देबहि हसे तोरके बहुत सन्तान देबहि।” 15 अब्राहम सहसान करके इसियलिय हसे परमेस्वरक प्रतिग्या करल आसिस उअ पउलिय। 16 मन्सावाह किरिया खाइकि यापन कहलि बतवा पाका हखइ कहके यापनसे जबड मन्सेक नाउँमा किरिया खेसइ हसे किरिया खाके ठोरा-बोलि मिलोसइ। 17 परमेस्वरक प्रतिग्या पउलाहर मन्सावानिके हुने यापन करलि प्रतिग्या पाका हखइ हसे कबहुँ फेनि नाहिँ बदलेतइ कहके देखावेके तहिँया हुने किरिया फेनि खेलसि। 18 परमेस्वरक करल प्रतिग्या हसे खइलि किरिया इअ दुन्हु बतवा बदलाए नाहिँ सकेतइ, केहकेकि परमेस्वर झुठा फदके नाहिँ सकबसि। उहेसे हुने लघिना सरन लेलहरवा हमार यागा राखदेलि यासा पावेके जबड हउसला पउले बडहुँ। 19 इहे यासामा हमार जिवन यडियाइल बडइ। इअ यासा त सुरछित हसे स्थिर बडइ। इअ यासा स्वरगिय परदा भितराक पवितर ठउरिलइ पुगोसिय। 20 हमार तहिँया येसु हमारसे पहिला उअ ठउरियामा गेल बडसि। मल्किसेदेक पुजेरिया नहिँया हुने सबदिन हमार तहिँया प्रधान पुजेरि भेल बडसि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.