हिब्रु 5 - चितवनिया थारु1 हरेक प्रधान पुजेरि मन्सेसभ मधेसे छनेसइ। उअ मन्सावानिक वरिसे परमेस्वर लघिना पाप छमाक भोग हसे भेटि चढावेके नियुक्त करेसइ। 2 उहेसे मुरुख हसे गलत पइडामा लगलहरा मन्सावानिके नम्र भके सम्झावे सकबिय, केहकेकि उअ यपनहिँ फेनि गल्ति करे सकबिय। 3 उहेसे उअ मन्सावानिक पापक तहिँया मतरे हइने, बाकि यापन पापक तहिँया फेनि भोग चढावे परसइ। 4 कुनहुँ फेनि यादर पावेके तहिँया यपनहिँ प्रधान पुजेरि बने नाहिँ सकतइ, बाकि हारुन नहिँया परमेस्वरक बलावल मन्से मतरे पावे सकतइ। 5 यसने ख्रिस्ट फेनि प्रधान पुजेरि हखना यादर यपनहिँ हइने लेलसि, बाकि परमेस्वर हुनेके बलोलसि हसे हुनेके कहलसि, “तुइ मोर पुतर हखहि, याजु मुइ तोर पिता भेल बडहिँ।” 6 दोसरे ठउरिमा हुने यसके कहससि, “तुइ मल्किसेदेक पुजेरिया नहिँया सबदिनक तहिँया पुजेरि हखहि।” 7 येसुजि इअ धरतियामा रहइकि हुनेके मृत्युसे बचावे सकलाहर परमेस्वरसाङे रोर बहोते हसे जबड स्वरसे परथाना करते बिन्ति चढोलसि। हुनेक नम्रता हसे परमेस्वरक तहिँया गहिर भक्तिक कारनसे परमेस्वर हुनेक परथाना सुनलसि। 8 हुने परमेस्वरक पुतर भेले ताफेनि यापन भोगलि कस्टसभसे परमेस्वरक आग्या पालन करेके सिखलसि। 9 यसने येसुजि जम्मे खलिक दुःखसभ सहके पुरा सिद्ध भेके, हुनेक आग्या पालन करलहराह जम्मेक तहिँया हुने सबदिन रहना मुक्ति देलाहर हखलसि हसे 10 परमेस्वर हुनेके मल्किसेदेक नहिँया प्रधान पुजेरिक पदमा नियुक्त करलसि। विस्वास नाहिँ त्यागेके चेतवनि 11 यकर बारेमा कहना बहुत बात बडइ, बाकि बुझावेके गारह बडइ, केहकेकि तोहरा बुझहि हइने चाहसह। 12 यखनिलइ त तोहरा याको जनके सिखोलहर सिछक हखसकेके रहलइ, बाकि यखना फेनि तोहराके परमेस्वरक बारेमा सुरुमा सिखोलि सत्य सिछा सिखावे परइ बडइ। तोहराके काखट खइना चिजु हइने, बाकि दुध चाहि बडइ। 13 दाओक दुध मतरे पियलहरा यखना फेनि उअ छोकनि बडिय, केहकेकि वकरमा यसल हसे खराब छुटियावेके ग्यान हइने रहसइ। 14 काखट खइना चिजु त परिपाका भेलि मन्सेक तहिँया हखइ। उअ यापन अनुभवसे सिखलेसे यसल हसे खराब छुटियावे सकिय। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.