हिब्रु 4 - चितवनिया थारुपरमेस्वरक जनसभक तहिँया विसरामक प्रतिग्या 1 हमराके विसराम देबहिँ कहके परमेस्वरक करल प्रतिग्या यखना फेनि बडइ। उहेसे हुसियार रहुँ हसे उअ विसराम पउना ठउरियामा पेसे हइने पउलाहर तोहारमधे कुनहुँ फेनि झिन हखइ। 2 हमरा परमेस्वरक करलि विसरामक बारेमा खुसिक समाद सुनले नहिँया पुरखावाह फेनि सुनले बडइ, बाकि हुनुका उअ बतवा विस्वास हइने करलइ, उहेसे हुनुकर सुनलि बतवा हुनुकर तहिँया बेकार भेलइ। 3 याबे हमरा विस्वास करलहरा उअ विसराम करना ठउरियामा पेसबहुँ। जसने हुने विस्वास हइने करलहरानिक बारेमा कहले बडसि, “उहेसे मुइ खिसियाके किरिया खेलहिँ, हुनुका कबहुँ फेनि मुइ विसराम देना ठउरियामा नाहिँ पेसतइ।” परमेस्वर संसार सिरिस्टि करलि जुनवाहिँ हुने बिसइना ठउरि बना सकले रहलसि, 4 बाकि सिरिस्टिक सात दिनक बारेमा धरमसास्तरवाक एगुडा ठउरियामा यसके कहाइल बडइ, “परमेस्वर यापन जम्मे कमवा सकके सात दिनमा यापन करइ रहलि कमवासे विसराम लेलसि।” 5 फेरि उहे ठउरिमा हुने यसके कहलसि, “मुइ विसराम देना ठउरियामा हुनुका कबहुँ फेनि पेसे नाहिँ पउतइ।” 6 पहिला खुसिक समाद सुनलहरा विसराम करना ठउरियामा पेसे हइने पउलइ, केहकेकि हुनुका परमेस्वरक कहलि बतवा हइने मनलइ, बाकि याको कतेक जन विसराम पउना ठउरियामा पेसेके बाँकि बडइ। 7 उहेसे परमेस्वर हुनेक विसराम पउना ठउरियामा जायके तहिँया दोसरि दिन तोकलसि हसे उअ दिन चाहिँ “याजु” हखइ कहके कहलसि। हुने पहिला फदकलि बतवा बहुत समय पाछा राजा दाउदके फदके लगोलसि, “याजु तोहरा परमेस्वरक स्वर सुनबह जउँ, तोहरा यापन हृदय कठोर झिन पारिह।” 8 यगर यहोसु इस्राएलि मन्सावानिके परमेस्वरक प्रतिग्या करलि विसरामक ठउरियामा पुगोले हतिय त, परमेस्वर पाछेसे दोसरे दिनक बारेमा बाते नाहिँ करतसि। 9 परमेस्वर सात दिनमा विसराम लेले नहिँया परमेस्वरक जनसभक तहिँया विसराम लेना दिन रखाइल बडइ। 10 परमेस्वर यापन सिरिस्टिक कमवा सकके विसराम लेले नहिँया, विसराम पउना ठउरियामा पेसलहराह जम्मे जन फेनि यापन-यापन कमवासे विसराम पउतइ। 11 उहेसे हमरा उअ विसराम पउना ठउरियामा पेसेके जोडसाङे कोसिस करु, यगर हमरा इस्राएलि मन्सावानि नहिँया हइलठ हखबहुँ जउँ त हमरा नास हखबहुँ। 12 केहकेकि परमेस्वरक वचन त जिउते हसे सक्तिसालि बडइ तके इअ दुन्हुँवरि धार भेल तरवारसे फेनि तधार हसइ। इअ प्रान हसे आत्माक भितरा पुगके जोरवा तके हडवा भितराक सिहुवाके भाग-भाग पारइलइ वारपार छिदसइ। परमेस्वरक वचन मन्सेक हृदयक विचार हसे इछा जाँचे सकसिय। 13 परमेस्वरक सिरिस्टिक कुनहुँ चिजु फेनि हुनेसे हइने लोकाइल बडइ। हुनेक यागा जम्मे चिजु खुला हसे कुनहुँ चिजु फेनि हइने झपाइल बडइ तके हुनेके हमरा यापन करलि कमवाक लेखा देवे परतइ। येसुजि हमार महान प्रधान पुजेरि 14 हमार एक जन महान प्रधान पुजेरि बडसि, जुने स्वरगमा गेल बडसि हसे हुनेहिँ परमेस्वरक पुतर येसु हखसि। उहेसे हमार करलि विस्वासमा याको स्थिर भके रहुँ। 15 हमार प्रधान पुजेरिया हमार जम्मे कमजोरि बुझससि, केहकेकि हमार नहिँया हुने जम्मे चिजुमा परिछित हखलसि, बाकि हुने पाप हइने करलसि। 16 उहेसे हमरा खाँचो परलि जुनवामा, नाहिँ डेराके हमार दाया करलाहर परमेस्वरक सिंहासनक लजिके जाउँ हसे हमरा दाया तके अनुग्रह पउबहुँ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.