हिब्रु 3 - चितवनिया थारुयेसुजि मोसासे महान बडसि 1 उहेसे, स्वरगिय बोलावटमा परमेस्वरक छानल पवितर मन्सेसभ, तोहरा परमेस्वरक समाद कहलाहर तके प्रधान पुजेरि कहके हमरा स्विकार करलि येसुजिमा मन लगोइह। 2 जसने मोसा परमेस्वरक घरवामा मन्सावानिक सेवा करेके विस्वासयोग्य भेलिय, येसुजि फेनि हुनेके पठोलहर परमेस्वरक देलि कमवामा विस्वासयोग्य भेलसि। 3 जसने घरवासे, घरवा बनोलहरा मन्सावाक बढता यादर हसइ, वसने येसुजि फेनि मोसासे बढता यादर पावेके योग्य बडसि। 4 केहकेकि हरेक घर कुनहुँ न कुनहुँ मन्सेसे बनावल रहसइ, बाकि जम्मे चिजु बनोलहर त परमेस्वरहिँ हखसि। 5 मोसा निस्चित रुपमा परमेस्वरक घरवामा विस्वासयोग्य भके सेवा करलिय, बाकि सेवक भके मतरे। वकर करलि कमवा परमेस्वर भविस्यमा परकट करे जाइकि सत्यक गवाहि देलिय। 6 बाकि ख्रिस्ट जम्मे परमेस्वरक घरवामा पुतरक रुपमा विस्वासयोग्य बडसि। यगर ख्रिस्टमा भेलि हमार यासामा हमरा सहास हसे भरोसा रखते जेबहुँ जउँ, हमरा फेनि परमेस्वरक घरवाक मन्सेसभ हखहुँ। परमेस्वरक जनक पउना विसराम 7 उहेसे पवितर-आत्मा कहससि, “यगर याजु, तोहरा परमेस्वरक स्वर सुनबह जउँ, 8 तोहार पुरखवाह इस्राएलिसभ, परमेस्वरक विरोध करलि जुनवामा हसे उराठ-ठउरियामा परिछाक दिनवामा करले नहिँया, यापन मनवा कठोर झिन बनोइह। 9 वहवाँ तोहार पुरखवाह इस्राएलिसभ चालिस बरसलइ मोर करलि यचम्मक कमवा देखके फेनि, हुनुका हइने पतियलइ हसे मोरके जचलइ। 10 उहेसे उअ मन्सावानिसाङे मुइ खिसियलहि हसे मुइ कहलहिँ, ‘हुनुकर हृदय सबदिन मोरसे तनाउ बडइ, हसे मोर कहलि बतवा हुनुका हइने मनसइ।’ 11 उहेसे मुइ खिसियाके यसके किरिया खाके कहलहिँ, ‘हुनुका निस्चित रुपमा मोर विसरामक ठउरियामा पेसे नाहिँ पउतइ’।” 12 प्रियसभ, चेतले रहिह, जिउते परमेस्वरसे तोहराके तनाउ लिगना दुस्ट मन हसे अविस्वासि हृदय तोहार ककरोमा झिन रहइ। 13 जखनिलइ तोहारसाङे मउका बडइ, तखनिलइ तोहरा हरेक दिन एक-दोसरि जनके उत्साह दिह। यसने तोहरा पापक फानामा नाहिँ परबह हसे तोहार हृदय परमेस्वरके इन्कार नाहिँ करबिय। 14 यगर हमरा सुरुमा ख्रिस्टमा भरोसा करले नहिँया याखिरलइ हमार जिवनमा विस्वासके बचाके रखबहुँ जउँ, हमरा ख्रिस्टसाङे सझिया हकदार हखबहुँ। 15 धरमसास्तरवामा यसके लिखाइल बडइ, “याजु तोहरा हुनेक स्वर सुनबह जउँ, तोहार पुरखावाह इस्राएलिसभ परमेस्वरक विरोध करके यापन हृदय कठोर बनोले नहिँया तोहरा झिन बनोइह।” 16 परमेस्वरक बात सुनके फेनि हुनेके विरोध करलाहर कुने रहलिय? मोसा यगुवाइ करके मिस्र देसवासे निकडाके यनलि मन्सावाह हइने त? 17 हुने काकरसे चालिस बरसलइ खिसियलसि? कथि उअ पाप करलहरा मन्सावानिसे हइने त, जुने उराठ-ठउरियामा मरलइ? 18 विसराम पउना देसवामा हुनुका पेसे नाहिँ पउतइ कहके काकरसाङे किरिया खइले रहलसि? कथि हुनेक बतवा हइने मनलहरानिसाङे हइने त? 19 उहेसे हमरा देखसहुँ कि, हुनुका विस्वास हइने करलेसे, विसराम पउना देसवामा पेसे हइने सकलइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.