हिब्रु 2 - चितवनिया थारु

हुसियार रहेके तहिँया चेतवनि

¹ उहेसे हमरा परमेस्‍वरक पुतरक बारेमा सुनलि सत्‍य सिछामा खाँ डउलसे ध्‍यान देवे परतइ, तब मतरे हमरा वकरसे बहकके नाहिँ जेबहुँ।

² केहकेकि परमेस्‍वर स्‍वरगदुतवानिसे देलि समाद सत्‍य हखइ कहके देखेलइ हसे उअ समाद हइने मनलहराह तके वकरेके हइने पछिवोलहराह उचित दन्‍ड पउलइ।

³ उहेसे हमरा यतुरा महान मुक्‍तिक वास्‍ता नाहिँ करबहुँ जउँ, हमरा कस्‍के दन्‍डसे बचे सकबहुँ त? इअ मुक्‍तिक समाद सबसे पहिला प्रभु येसु यपनहिँ परचार करलसि हसे हुनेक वचन सुनलहराह उअ सत्‍य हमार तहिँया पाका साबित करदेलइ।

⁴ परमेस्‍वर फेनि चिन्‍हासभ देखाके बहुत खलिक यचम्‍म हसे सक्‍तिसालि काम तके यापन इछा यनुसार पवितर-आत्‍माक वरदानसभ देके उअ समाद सत्‍य हखइ कहके गवाहि देलसि।

मन्‍सावानिके मुक्‍ति देवेके तहिँया ख्रिस्‍ट मन्‍से हखलसि

⁵ केहकेकि जुन यावे लगइकि लउठा संसारक बारेमा हमरा बात करइ बडहुँ, उअ संसारके परमेस्‍वर स्‍वरगदुतवानिक अदलमा हइने रखलसि कहके हमार थाह बडइ।

⁶ बाकि धरमसास्‍तरवाक एक ठउरिमा यसके कहाइल बडइ कि, “मन्‍से कुने हखिय त, यपनहुँ वकर वास्‍ता करसहुँ? मन्‍सेक बेटा कुने हखिय त, यपनहुँ वकर फिकरि करसहुँ?

⁷ यपनहुँ इचिका समयक तहिँया मन्‍सावाके स्‍वरगदुतवानिसे इचिका तर पारदेले बडहुँ। यपनहुँ वकरेके सम्‍मान हसे यादरक मकुट पेहरोले बडहुँ।

⁸ यपनहुँ जम्‍मे चिजु वकरे अदलमा राखदेलहुँ।” यकर यरथ इअ हखइ कि, मन्‍सेक अदलमा हइने भेल कुनहुँ चिजु फेनि हइने बडइ। बाकि यखनिक जुनवामा हमरा जम्‍मे चिजु मन्‍सेक अदलमा भेल हइने देखसहुँ।

⁹ बाकि हमरा येसुजिके देखसहुँ, जुने इचिका समयक तहिँया स्‍वरगदुतवानिसे इचिका झिनिक बनाइल रहलसि। बाकि परमेस्‍वरक दाया भेलेसे हुने जम्‍मेक तहिँया मरलसि हसे मृत्‍युक दुःख भोगलेसे परमेस्‍वर हुनेके महिमा तके यादरक मकुट पेहरा देलसि।

¹⁰ केहकेकि परमेस्‍वर, जाकरसे हसे जाकर तहिँया जम्‍मे सिरिस्‍टि भेलइ, हुनेक बहुत सन्‍तानसभके कि यापन महिमामा सहभागि हखेके यनइकि, हुनुकर मुक्‍ति देलाहर येसुजिके कस्‍टसभसे सिद्ध बनोलसि। यसके परमेस्‍वरक तहिँया मुक्‍ति देलाहर येसुजिके दुःख भोगलेसे सिद्ध पारेके उचित रहलइ।

¹¹ केहकेकि मन्‍सावानिके पवितर बनोलहर येसु हसे पवितर बनावल जम्‍मे जनक एगुडे पिता बडसि। उहेसे हुने जम्‍मे जनके “मोर ददेर-भाइ हसे दिदेर-बहिनसभ” कहेके हइने लजेससि।

¹² हुने परमेस्‍वरके यसके फेनि कहससि, “मुइ यपनहुँक नाउँ यापन ददेर-भाइ हसे दिदेर-बहिनसभके घोसना करबहिँ, मुइ हुनुकर सभामा यपनहुँक स्‍तुति करबहिँ।”

¹³ हुने यसके फेनि कहलसि, “मुइ परमेस्‍वरमा भरोसा रखबहिँ।” हसे फेरि कहलसि, “हेरह, यहवाँ मुइ परमेस्‍वर मोरके देलि हुनेक सन्‍तनवानिसाङे बडहिँ।”

¹⁴ केहकेकि इअ सन्‍तानसभक मासु हसे रकतक देहि भेलेसे येसुजि फेनि यपनहिँ मृत्‍यु भोगके मृत्‍युक सक्‍ति भेल सइतानके नास पारेके तहिँया हुनुकर नहिँया मासु हसे रकत भेल मन्‍से भेलसि।

¹⁵ यसके करके हुने जुने मरे परतइ कहके डरसे जिवनभर बन्‍धनमा रहलइ हुनुकाके छुटकारा देलसि।

¹⁶ सदियो, येसुजि स्‍वरगदुतवानिके मदत करेके तहिँया हइने, बाकि अब्राहमक सन्‍तानसभके मदत करे याइल हखसि कहके हमार थाह बडइ।

¹⁷ उहेसे जम्‍मे बतवामा हुने यपने ददेर-भाइ हसे दिदेर-बहिनसभ नहिँया बने परलइ। यसने परमेस्‍वरक सेवामा हुने दयगर हसे विस्‍वासयोग्‍य प्रधान पुजेरि हखलसि तके मन्‍सावानिक पाप छमा देवेके तहिँया हुने यपनहिँ भोग हखलसि।

¹⁸ केहकेकि हुने यपनहिँ दुःख भोगले बडसि हसे परिछामा परलसि, उहेसे परिछामा परलहरानिके हुने मदत करे सकबसि।