हिब्रु 13 - चितवनिया थारुअन्तिम यरति 1 एक-दोसरि जनके प्रेम करते रहिह, तोहरा ख्रिस्टमा ददेर-भाइ हसे दिदेर-बहिनिसभ हखह। 2 परदेसिसभके सेवा-सत्कार करेके झिन बिसरोइह, केहकेकि यसने करइकि कतेक जन थाहे हइने पाके स्वरगदुतवानिके सेवा-सत्कार करले बडइ। 3 झ्यालखनामा परल विस्वासिसभके वास्ता करिह, जसने कि, तोहरा यपनहिँ फेनि हुनुकरसाङे झ्यालखनवामा परल बडह। तोहरा दुःख पउलहरानिके वास्ता करिह, जसने कि, तोहरा यपनहिँ फेनि यापन देहियामा दुःख पवइ बडह। 4 जम्मे जन बियाहके यादर करे परतइ। जनि-मरद एक-दोसरि पर विस्वासयोग्य रहइ, केहकेकि जुने धुचुड करसइ, चाहे उअ बियाह करल हखिय कि बियाह हइने करल हखिय, परमेस्वर वकरेके दन्ड देबसि। 5 तोहरा धन-सम्पति लोभ करेकेसे तनाउ रहिह। तोहारसाङे जथि बडइ वकरमा सन्तोख रहेके सिखिह। केहकेकि परमेस्वर यसने कहले बडसि, “मुइ कुनहुँ हालतमा फेनि तोरके नाहिँ छडबहिँ, मुइ तोरसे तनाउ नाहिँ जेबहिँ।” 6 उहेसे हमरा सहाससाङे इअ कहे सकबहुँ कि, “प्रभु मोरके मदत करबसि, मुइ नाहिँ डेरेबहिँ। मन्सावाह मोरके कथि करे सकतइ?” 7 तोहराके सुरुमा परमेस्वरक वचन सिखोलहरा यगुवासभके सम्झिह। हुनुका मृत्युलइ यापन जिवन कस्के बितोलइ हसे हुनुकर जिवनसे याइल यसल परिमानसभ विचार करह हसे तोहरा विस्वासक जिवनक उदाहरनके अनुसरन करिह। 8 येसु ख्रिस्ट काल्हु, याजु हसे सबदिन एक समान बडसि। 9 तोहरा बहुत खलिक हसे झुठा सिछासभक पाछा झिन जइह। उअ खइना-पिइना नियमसे हइने, बाकि परमेस्वरक अनुग्रहसे हृदय बरियार भेल डउल हखइ, केहकेकि उअ नियम पालन करके ककरो फाइदा हइने भेल बडइ। 10 हमार एगुडा यसनुक वेदि बडइ, वकरमा भोग चढावल चिजु पवितर तम्बुमा काम करलहरा पुजेरियानिक खाएके अधिकार हइने रहलइ। 11 पुरनि करारक विधि यनुसार, प्रधान पुजेरियाह, महापवितर ठउरिमा पापक तहिँया भोग चढावल पसुक रकत लेके जाइ, बाकि भोग चढोलि पसुवाक देहियाके बस्तियासे बाहरा लिगाके यगियामा जरोवइ। 12 वसने करके येसुजि फेनि मन्सावानिके पवितर बनावेके तहिँया यपने रकत लेके सहरवासे बाहरा दुःख भोगलसि। 13 उहेसे हमरा फेनि बस्तियासे बाहरा हुनेक लघिना जाउँ हसे हुनेक सहलि यपमान नहिँया हमरा फेनि सहुँ। 14 केहकेकि इअ संसारमा हमार तहिँया सबदिन रहना कुनहुँ सहर हइने बडइ, बाकि हमरा त यावे लगइकि सहरक पइडा हेरके रहइ बडहुँ। 15 उहेसे येसुजिमा सबदिन परमेस्वरके प्रसंसाक भोग चढोइ रहुँ। हुनेहिँ हमार प्रभु हखसि कहके स्विकार करते हमार मुहवासे निकडल प्रसंसा हमार चढावल भेटि हखइ। 16 एक-दोसरि जनके भलाइ करेके हसे यापनसाङे भेलि चिजुवा बाटचिट करेके झिन बिसरोइह, केहकेकि यसने कामसभ परमेस्वरक तहिँया भोग जसने हखइ हसे परमेस्वरक मन परसइ। 17 तोहार यगुवानिक कहलि बतवा तोहरा मनिह हसे हुनुकर अदलमा रहिह। यापन कामक लेखा परमेस्वरके देवे परतइ कहके हुनुका तोहार आत्माक हेरचाह करसइ। हुनुकर कहलि बतवा मनबह जउँ, हुनुका यापन कमवा दुःखित नाहिँ भके बरु खुसिसे करतइ। यगर दुःखित भके करतइ जउँ, तोहार किहो फाइदा नाहिँ हतइ। 18 हमार तहिँया परथाना करइरहिह। हमरा निस्चित बडहुँ कि, हमार मनवा सुद्ध बडइ हसे हमरा जम्मे कमवा इमान्दारसे करे चाहसहुँ। 19 तोहरा मोर तहिँया परथाना करदिह कहके मोर बिन्ति बडइ, ताकि तोहार लघिना मुइ हालि फिरके यावे सकुँ। अन्तिम परथाना हसे अभिवादन 20 हमार प्रभु येसु, जुने भेडवानिक महान भेडहार हखसि, हुने यापन रकत बहाके सबदिन रहना करार स्थापना करलसि। उहे बहोलि रकतवाक यधारमा सान्तिक परमेस्वर हुनेके मरलिसे फेरि जिउतोलसि। 21 याबे तोहरा हुनेक इछा पुरा करे सकह कहके सान्ति देलाहर परमेस्वर तोहराके सछम बनोसि हसे हुनेक मन परना बातसभ तोहारमा हखइ कहके हुने येसु ख्रिस्टसे तोहार हृदयमा काम करसि। येसु ख्रिस्टक सबदिन जयजयकार हखइ। आमेन। 22 प्रियसभ, मुइ तोहराके बिन्ति करइ बडहिँ कि, मोर यरति देलि बतवा मनिह, केहकेकि मुइ तोहराके लिखलि इअ चिठिया छोटे बडइ। 23 हमार भाइ तिमोथि झ्यालखनवासे छुटसकल बडिय कहके तोहराके समाद देवे चाहबहिँ। उअ हलहालि यबिय जउँ, मुइ वकरेके लेके तोहराके भेटे यबहिँ। 24 मन्डलियाक जम्मे यगुवासभ हसे विस्वासि जनसभके हमार अभिवादन बडइ कहके कहदिह। इटालिया देसवामा रहलाहर विस्वासिसभ फेनि तोहराके अभिवादन पठोले बडइ। 25 परमेस्वरक अनुग्रह तोहार जम्मे जनसाङे रहइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.