हिब्रु 12 - चितवनिया थारुविस्वासक यसल उदाहरन येसुजि 1 हमार चारिवर विस्वासक जिवनक बिसयमा गवाहि देना मन्सेसभक जबड भिड भेलेसे हमरा फेनि विस्वस्थ भके येसु ख्रिस्टक सेवा दउड नहिँया करे परतइ। हमार दउडमा यइना हरेक बाधाके हसे हमराके उसारसे यझुरोलहर पापके यकोरियाहे लागके हमरा सहसानसे अन्तिमलइ येसु ख्रिस्टक सेवामा दगुरे परतइ। 2 हमार दगुरमा हमरा येसुजिके हेरु, केहकेकि हुनेहिँ हमार विस्वास सुरु करलाहर हसे पुरा करलाहर हखसि। हुनेक यागा राखदेलि आनन्दक तहिँया यपमानके किहो हइने ठानके क्रुसक कस्ट भोगलसि हसे परमेस्वरक सिंहासनक दहिनिकलहरवा बेठल बडसि। 3 कस्के येसुजि पापि मन्सेसभसे यइना विरोध सहलसि उअ बतवा विचार करह, ताकि तोहरा यतियाके हरेस नाहिँ खेबह। 4 तोहरा पापक विरोधमा लडे परइकि यखनिलइ यापन प्रान गुमावे त हइने परल बडइ। 5 कथि परमेस्वर यापन बेटा नहिँया समझके तोहराके करलि उत्साहक वचन बिसरा सकलह? “अरे मोर बेटवा, परमेस्वरक अनुसासनके हल्का झिन लेह, हुने तोहराके डटइकि हरेस झिन खइह, 6 केहकेकि जकरेके परमप्रभु प्रेम करससि, वकरेके हुने अनुसासन करससि, जकरेके हुने बेटा नहिँया स्विकार करले बडसि, वकरेके दन्ड फेनि देससि।” 7 जब तोहारमा याइल गारह समयसभके, परमेस्वरसे यइना अनुसासन हखइ कहके सहइ बडह। इअ याद करहि कि, परमेस्वर तोहारसाङे बेटाक नहिँया व्यबहार करससि। कथि बाबा यापन बेटासभके सुधारेके तहिँया सजाय हइने देसइ त? 8 यगर परमेस्वर तोहराके यपने बेटा-बेटिसभ नहिँया अनुसासन नाहिँ करबसि जउँ, तोहरा हुनेक सदि बेटा-बेटिसभ हइने हखह, बाकि दोसरे जनक बेटा-बेटिसभ हखह। 9 हमार संसारक बाबासभ फेनि हमराके अनुसासनमा रखसइ हसे हमरा उअ कमवाक तहिँया हुनुकाके यादर करसहुँ। कथि अनन्त जिवन पावेके तहिँया हमरा आत्मिकि पिताक अदलमा याको बढि नाहिँ बेसे परतइ त? 10 केहकेकि इअ धरतियामा हमार बाबासभ हुनुकाके जुन बतवा ठिक लगसइ उहे यनुसार किहो समयलइ हमराके सुधारेके तहिँया अनुसासनमा लगोसइ, बाकि हमार परमेस्वर पिता हमार भलाइ हखइ कहके हसे हमरा हुनेक नहिँया पवितर हखे सकुँ कहके हमराके सुधारेके तहिँया अनुसासनमा लगोससि। 11 जसनुक खलिक अनुसासन फेनि उअ समयमा आनन्दक बात हइने हसइ। वास्तवमा उअ दुःखित बनोसिय, बाकि पाछेसे उअ अनुसासनसे यसल बात सिखबहुँ जउँ, उअ अनुसासन हमराके परमेस्वरक यागा ठिक रखसिय हसे हमरा सान्तिसे रहबहुँ। 12 उहेसे लुल हाथसभ उठोह हसे कमजोर ठेहुनसभ बरियार बनोह। 13 तोहरा यापन बुलनवा डगरवा सोझ बनोइह, ताकि लङड टङवा झिन छटकइ, बरु डउल हखइ। परमेस्वरके इन्कार नाहिँ करेके चेतवनि 14 तोहरा जम्मे मन्सेसभसे मिलके सान्तिसे रहेके हसे पवितर जिवन बितावेके कोसिस करिह, केहकेकि पवितर नाहिँ हखके कुनहुँ फेनि प्रभुके देखे नाहिँ सकतइ। 15 चेतले रहिह, कुनहुँ फेनि परमेस्वरक अनुग्रह गुमावे झिनपरइ। मन तिता पारना जरि फइलके कुनहुँ फेनि तोहार मनवा तिता झिन बनोइ। यसनुक मन्से बहुत जनके नास बनोसइ। 16 तोहरा कुनहुँ फेनि एसाव जसने छाडा स्वभावक हसे परमेस्वरक डर हइने मनलाहर झिन हखिह, केहकेकि उअ एक छाक जेउनाक तहिँया यापन जेठ हक बेच देलिय। 17 तोहार थाह बडइ कि, पाछेसे उअ यापन बाबासे यासिरवाद पावे खोजलिय, बाकि पउबे हइने करलिय। उअ यापन बेचलि हकवा कानके फिरता पावे खोजइ फेनि फिरता पावे हइने सकलिय। 18 तोहरा परमेस्वरक लजिके याइल बडह। तोहरा सिनइ पहाड नहिँया कुनहुँ हथवामा छुके मिलना पहाडमा याइल हइने बडह, जहवाँ खाँ काडा यागिक इजोर, करिया बादर, किट-किटवा यन्हार, धुधुइ-बयार, 19 धुतुहाक जबड यवाज हसे एगुडा यसनुक स्वर रहलइ, जुन स्वर सुनलहरा “याबे यकरसे याको बढता एक सबद फेनि सुने झिनपरइ” कहके बिन्ति करलइ। 20 केहकेकि “यगर कुनहुँ पसुवा उअ पहडावाके छुयबिय जउँ, वकरेके पत्थरासे ढोकहारके मारिह” कहलि परमेस्वरक आग्या हुनुका सहे हइने सकलइ। 21 उअ दृस्य हेरइकि कतुरा डेरटावनेक रहलइ, मोसा यपनहिँ फेनि “मुइ त डरेसे दुलदुलाइ बडहिँ” कहले रहलिय। 22 बाकि तोहरा त सियोन पहडावामा याइल बडह। तोहरा त जिउते परमेस्वरक सहर, स्वरगक यरुसलेममा याइल बडह हसे हजार-हजार स्वरगदुतसभ खुसि हखते जामा भेल ठउरियामा याइल बडह। 23 तोहरा याको विस्वासियवानिसाङे मिलके पहिला जरमल बेटा नहिँया भेल बडह, जाकर नाउँ स्वरगमा लिखाइल बडइ। तोहरा जम्मे मन्सावानिक न्याय करलाहर लघिना याइल बडह। तोहरा स्वरगमा भेलि सुद्ध भेल धारमिक आत्मासभ लघिना याइल बडहुँ। 24 तोहार परमेस्वर हसे मन्सेक बिचा लउठा वाचा बान्ह देलाहर येसुजिक लघिना याइल बडह हसे हुनेक छिटाइल रकतक यागा याइल बडह, जुन रकतावा हाबिलक रकतवासे फेनि यसल वचन देसिय। 25 ध्यान दिह, तोहारसाङे फदकेलहराक बतवा इन्कार झिन करिह। यगर धरतियामा चेतवनि देलाहर मोसाके इन्कार करलहरा दन्ड पाके बचे हइने सकलइ जउँ, हमरा स्वरगसे फदकेलहराक बतवा सुनेके इन्कार करबह जउँ कस्के बचे सकबहुँ त? 26 उअ जुनवामा, परमेस्वर सियोन पहडावासे फदकइकि धरतिया डिङलइ, बाकि याबे त हुने यसके कहके प्रतिग्या करले बडसि, “मुइ धरतिया मतरे हइने एकपल्टा स्वरगके फेनि डिङा देबहिँ।” 27 “याको एकपल्टा” कहल वचन इअ देखोसिय कि, सिरिस्टि भेलि हरेक डिङावे सकना चिजु नास हखतइ, बाकि डिङावे नाहिँ सकना चिजु मतरे रहतइ। 28 उहेसे, हमरा डिङावे हइने सकना राज पउलेसे, हमरा परमेस्वरके धन्यवाद चढाउ। यसके करके हमरा हुनेक मन परना खलिक भक्ति हसे यादरसे हुनेक आराधना करु। 29 केहकेकि हमार परमेस्वर त भस्म करलाहर यागि हखसि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.