हिब्रु 11 - चितवनिया थारुविस्वासक महान उदाहरनसभ 1 विस्वास करेके कहले यासा करल बातमा निस्चय हखेके हसे हइने देखल बातमा पाका भरोसा करेके हखइ। 2 हमार पुरखवानिक इहे विस्वाससे परमेस्वरके खुसि बनोलिय। 3 हमरा विस्वाससे इअ बतवा बुझे सकबहुँ कि, संसारक जम्मे चिजु परमेस्वरक वचनसे सिरिस्टि भेलइ हसे हमार देखारि चिजुवा फेनि हइने देखार चिजुसे बनलइ। 4 विस्वास भेलेसे हाबिल यापन भयवा कयिनसे झन डउल भेटि परमेस्वरके चढोलिय। वकर विस्वासक कारन परमेस्वर वकर चढोलि भेटिया गरहन करलसि हसे वकरेके धरमि ठहरोलसि। हाबिल मरके गेले ताफेनि वकर विस्वाससे यखना फेनि हमरा सिखे सकबहुँ। 5 विस्वास भेलेसे हनोक हइने मरलिय, परमेस्वर वकरेके जिउते रहते उठाके स्वरग लिगलसि हसे कुनहुँ फेनि वकरेके हइने पउलइ। हनोक स्वरगमा उठाके लिगइलिसे यागा उअ परमेस्वरक मन परना जिवन जियले रहलिय कहके धरमसास्तरवामा लिखाइल बडइ। 6 विस्वास नाहिँ करके परमेस्वरके खुसि बनावे नाहिँ सकेतइ, केहकेकि जुने परमेस्वरक लजिके यसइ, उअ परमेस्वर बडसि हसे हुनेके खोजलहरानिके हुने इनाम देबसि कहके विस्वास करे परतइ। 7 विस्वास भेलेसे नोहा परमेस्वरक चेतवनि सुनलिय। कबहुँ हइने देखल, बाकि पाछे हखे यइना घटनाक बारेमा परमेस्वर वकरेके कहले रहलसि। नोहा परमेस्वरक बतवा मानके काठक एगुडा जबड पानि-जहाज बनोलिय हसे वकरमा पेसके यापन परिवारके बचोलिय। यसके विस्वास करके उअ संसारके दोसि ठहरोलिय हसे यपनहिँ विस्वाससे धरमि मन्से ठहरलिय। 8 विस्वास भेलेसे अब्राहम परमेस्वरक कहलि मनलिय हसे यसनुक ठउरिवरि गेलिय, जुन ठउरिया परमेस्वर वकरेके देबहि कहके प्रतिग्या करले रहलसि। वकर कहवाँ जायके कहके थाह हइने भेले फेनि उअ यापन देसवा छाडके गेलिय। 9 अब्राहमक विस्वास भेलेसे परमेस्वरक प्रतिग्या करल देसवामा गेलिय हसे परदेसि मन्से नहिँया तम्बुसभ टाङके बसोबास करलिय। वसने करके परमेस्वर इसहाक हसे इसहाकक बेटवा याकुबके फेनि प्रतिग्या करलसि तके हुनुका फेनि तम्बुसभ टाङके बसोबास करलइ। 10 अब्राहम त सबदिन रहना जगसभ भेल यसनुक सहर इसियाइ रहलिय, जाकर योजना करलाहर हसे बनोलहर परमेस्वर यपनहिँ हखसि। 11 विस्वास भेलेसे अब्राहमक जनियावा सारा, जुने बुढि रहलिय हसे वकर भारदेहि हखेके उमेर बितल रहलइ, उअ भारदेहि हखेके सक्ति पउलिय। केहकेकि अब्राहमक प्रतिग्या पुरा करलाहर परमेस्वर विस्वासयोग्य बडसि कहके जनले रहलिय। 12 बुढ भके मरे लगइकि एक जन मन्से अब्राहमसे फेनि यकसवामा भेलि तरगनसभ जतुरा बहुत हसे गाने हइने सकना समुनदरवाक तिरवामा भेलि बालु जतुरा बहुत सन्तान भेलइ। 13 इअ जम्मे मन्सावाह परमेस्वरमा विस्वास करके मरलइ, बाकि हुने देबहिँ कहके प्रतिग्या करलि चिजुवा हइने पाके मरलइ। हुनुका परमेस्वरक प्रतिग्या करल चिजु तनाउसे देखलइ हसे खुसि भेलइ तके इअ धरतियामा हमरा अपरिचित हसे परदेसि मतरे कहके सम्झलइ। 14 यसनुक बात करलाहर मन्सेसभ यापन तहिँया एगुडा सबदिन रहना देस खोजइबडइ कहके प्रस्ट हसइ। 15 जुन देसवासे हुनुका निकडके गेल रहलइ, उअ देसवाके हुनुका हइने सम्झइ रहलइ। उअ देसवाके सम्झइ रहतिय जउँ, हुनुकाके फेरि उहे देसवामा फिरके जायके मउका पउतिय। 16 बाकि हुनुका त उअ देसवासे फेनि एगुडा याको डउल स्वरगक देस, स्वरग-देसक इछा करले रहलइ। उहेसे परमेस्वर “मुइ तोहार परमेस्वर हखहि” कहेके फेनि हुने हइने लजेलसि, केहकेकि हुने एगुडा सहर हुनुकर तहिँया तयार पारदेले बडसि। 17 परमेस्वर अब्राहमके जाँच करइकि, वकर विस्वास भेलेसे उअ यापन बेटवा इसहाकके भोग चढावेके तहिँया तयार भेलिय। अब्राहम प्रतिग्या करलि चिजुवा पउले रहलिय, ताफेनि उअ यापन एक मतरे बेटवाके भोग चढावेके तयार भेलिय। 18 “तोर बेटवा इसहाकसेहिँ तोर वंससभ हतइ” कहके प्रतिग्या करले ताफेनि अब्राहम यापन उअ एक मतरे बेटवा इसहाकके भोग चढावेके इछा करलिय, 19 बाकि इसहाक मरले फेनि परमेस्वर जिउतावे सकबसि कहके अब्राहम विस्वास करलिय हसे सदियो इसहाकके फेरि जिउते फिरता पउलिय। 20 विस्वास भेलेसे इसहाक यापन बेटवा याकुब हसे एसावके हुनुकर पाछे हखे यइना बातक बारेमा यासिरवाद देलिय। 21 विस्वास भेलेसे याकुब यापन मरलि जुनवामा यापन लठियामा वठङके परमेस्वरक आराधना करलिय हसे योसेफक दुन्हुँ बेटवानिके यासिरवाद देलिय। 22 विस्वास भेलेसे योसेफ यापन जिवनक याखिर जुनवामा इस्राएलि मन्सावाह मिस्र देस छाडेके बारेमा कहले रहलिय। योसेफ हुनुकाके यापन मरलि देहियाके कथि करे परतइ, वकर बारेमा फेनि निरदेसन देले रहलिय। 23 विस्वास भेलेसे मोसाक दाओ-बाबा वकर जरमलिसे तिन महिनालइ वकरेके लोकाके रखलइ, केहकेकि हुनुका बेटवाके देखसार देखके हुनुका रजवाक हुकुमसे फेनि डर हइने मनलइ। 24 विस्वास भेलेसे मोसा जबड भेलेपर फारो रजवाक बेटियाक बेटा हखेके अस्विकार करलिय। 25 उअ पापक एघरिक सुख भोगलिसे त बरु परमेस्वरक मन्सावानिसाङे यत्याचार सहेके रुचलिय। 26 मिस्र देसवाक धन-सम्पतिसे त मुक्ति देलाहर ख्रिस्टक तहिँया निना सहके जबड बात हखइ कहके उअ सम्झलिय, केहकेकि उअ त परमेस्वरक राखदेलि इनामवरि हेरइ रहलिय। 27 विस्वास भेलेसे रजवाक खिससे हइने डेराके उअ मिस्र देसवा छडलिय, केहकेकि यखियासे देखे हइने सकना परमेस्वरके देखले नहिँया उअ पाछा हइने फिरलिय। 28 विस्वास भेलेसे मोसा इस्राएलि मन्सावानिके छुटकाराक पाबनि मनावेके आग्या देलिय हसे हुनुकाके ढोकवामा रकतवा छिटे लगोलिय हसे मोसा नास करलाहर दुतवा पहिला जरमलि इस्राएलिसभके झिन छुवइ कहके यसके करलिय। 29 विस्वास भेलेसे इस्राएलि मन्सावाह सुखाइल भुइमा बुलल नहिँया लाल समुनदरमा बुलके पार करलइ, बाकि मिस्र देसवाक मन्सावाह पार करे खोजइकि डुबके मरलइ। 30 विस्वास भेलेसे इस्राएलि मन्सावाह सात दिनलइ यरिहो सहरवाक परखलवाक चारिवरि घुमइकि परखलवा भसकलइ। 31 विस्वास भेलसे राहाब वेस्या फेनि परमेस्वरक बतवा हइने मनलहरा यरिहो सहरवाक मन्सावानिसाङे मरे हइने परलइ, केहकेकि उअ वहवाँ सुराक लेवे गेलहरवा इस्राएलि मन्सावानिके डउलसे स्वागत करले रहलिय। 32 यकरसे बढता मुइ कथि कहुँ? गिदोन, बाराक, सिमसोन, यिप्ता, दाउद, समुएल हसे अगमवक्तावानिक बारेमा कहेके मोर यखनि समय हइने बडइ। 33 हुनुका विस्वाससे राजसभके जितलइ, न्यायसाङे राज करलइ हसे परमेस्वरक प्रतिग्या करल चिजु पउलइ। हुनुका विस्वास करलेसे सिंहसभ हुनुकाके किहो फेनि करे हइने सकलइ। 34 हुनुकाके बरइक यागि किहो करे हइने सकलिय, कतेक जन मन्सेसभ हुनुकाके मारे खोजलइ, ताफेनि हुनुका बचलइ। हुनुका कमजोर रहलइ, बाकि याबे सक्तिसालि भेलइ। हुनुका लडाइमा सक्तिसालि भके जम्मे विदेसि सेनाक फउजके जितलइ। 35 विस्वास भेलेसे जनिनियाह यापन मरसकलि मन्सावानिके फेरि जिउते पउलइ। याको कतेक जन परमेस्वर हमराके यसल जिवन देबसि कहके यासा करइ रहलइ। उहे कारन हुनुका छुटकारा इन्कार करलइ बरु दुःख भोगे चाहलइ। 36 कतेक जनक गिल्ला सहे परलइ, कोरा खाए परलइ हसे याको जनके बान्हके झ्यालखानामा थुन देलइ। 37 हुनुकाके मारेके तहिँया पत्थरासे पिटके मारलइ, यारासे चिरके मारलइ, तरवारसे काटके मारलइ। हुनुका कङगाल भके भेडा हसे छेरिसभक छालासे जिउ झपलइ। हुनुका यत्याचार हसे हइने डउल व्यबहार सहते दुःख भोगलइ। 38 हुनुकर तहिँया इअ संसार रहेके लाइक हइने रहलइ। हुनुका यतेवते पहाडसभ, गुफासभ हसे सोन्हरमा रहे परलइ। 39 हुनुकर विस्वासक कारनसे हुनुकर जम्मे जनसे परमेस्वर खुसि भेलसि, बाकि हुनेक प्रतिग्या करलि जम्मे चिजु हुनुका हइने पउलइ। 40 परमेस्वर हमार तहिँया झन याको यसल चिजुक योजना बनोले बडसि। हमारसाङे हुनुका सिद्ध हखइ कहके हुनेक इछा रहलइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.