हिब्रु 1 - चितवनिया थारु

ख्रिस्‍ट त परमेस्‍वर कसनुक बडसि कहके देखोससि

¹ यगतिक जुनवामा परमेस्‍वर अगमवक्‍तावानिसे बहुत पारि हसे बहुत तरिकासे हमार पुरखवानिसाङे फदकलसि।

² बाकि इअ याखिर दिनवाहमा हुने यापन पुतरसे हमारसाङे फदकले बडसि। हुने यापन पुतरके जम्‍मे चिजुक हकवाला हखेके तहिँया नियुक्‍त करलसि हसे हुने यापन पुतरसे जम्‍मे चिजुक सिरिस्‍टि करलसि।

³ हुने परमेस्‍वरक महिमा परकट करससि हसे हुनेहिँ परमेस्‍वर कसनुक बडसि कहके देखोससि। हुने यापन वचनक सक्‍तिसे यकास हसे धरतियाक जम्‍मे चिजु चलोससि। हुने हमार पाप सुद्ध करलेपर स्‍वरगमा सबसे महान परमेस्‍वरक दहिनिकलहरवा बेठल बडसि।

⁴ स्‍वरगदुतवानिसे फेनि हुनेक पुतर महान बडसि, केहकेकि परमेस्‍वर हुनेके स्‍वरगदुतवानिसे फेनि याको यादरक नाउँ देलसि।

परमेस्‍वरक पुतर स्‍वरगदुतवानिसे महान बडसि

⁵ परमेस्‍वर यापन पुतरके कहलसि, “तुइ मोर पुतर हखहि, मुइ याजु तोर पिता भेल बडहिँ।” हुने यापन पुतरक बारेमा यसके फेनि कहलसि, “मुइ वकर पिता हखबहिँ, हसे उअ मोर पुतर हखबिय।” कथि यसके हुने कुनहुँ स्‍वरगदुतवानिके कबहुँ कहले बडसि त?

⁶ परमेस्‍वर यापन पहिलोठि जरमलि पुतरके संसारमा पठोइकि हुने फेरि यसके कहलसि, “परमेस्‍वरक जम्‍मे स्‍वरगदुतवाह हुनेक आराधना करतइ।”

⁷ परमेस्‍वर स्‍वरगदुवानिक बारेमा यसके कहले बडसि कि, “हुने यापन स्‍वरगदुतवानिके आत्‍मासभ, हसे यापन सेवकसभके यागिक धिधोर नहिँया बनोले बडसि।”

⁸ बाकि हुनेक पुतरक बारेमा हुने यसके कहससि, “हे परमेस्‍वर, यपनहुँक राज सबदिनक तहिँया रहतइ, हसे यपनहुँ डउलसे न्याय करके राज करबहुँ।

⁹ यपनहुँ धारमिकता मन परोसहुँ हसे अधरम काम घिरिना करसहुँ, उहेसे परमेस्‍वर, यपनहुँक परमेस्‍वर यपनहुँके याको जनसे बढता आनन्‍दक तेलसे अभिसेक करले बडसि।”

¹⁰ हुने पुतरके फेरि कहलसि, “हे प्रभु, सुरुमा यपनहुँ धरतियाक जग बेठोलहुँ, हसे यकसवा तके वहवाँ भेलि जम्‍मे चिजुसभ यापन हथवासे बनोलहुँ।

¹¹ उअ जम्‍मे चिजुवा पाछे नास भके जेतइ, बाकि यपनहुँ त सबदिन रहबहुँ। उअ जम्‍मे चिजुवा लुगा नहिँया पुरान हखते जेतइ।

¹² हसे यपनहुँ सिरिस्‍टिके पुरान लुगा नहिँया घेउटबहुँ, उअ जम्‍मे लुगा नहिँया फेरेतइ। यपनहुँ कबहुँ नाहिँ बदलेबहुँ, केहकेकि यपनहुँक जिवन कबहुँ नाहिँ यन्‍त हतइ।”

¹³ बाकि कुन स्‍वरगदुतवाके परमेस्‍वर कबहुँ यसके कहलसि हसे, “मुइ तोर सतरुवानिके हराके तोर टङवातर नाहिँ पारइलइ तुइ मोर दहिनिकलहरवा बेठहि।”

¹⁴ बाकि उअ स्‍वरगदुतवानिके त परमेस्‍वरक मुक्‍ति पावे जाइकि मन्‍सावानिके मदत करेके तहिँया पठावल आत्‍मासभ हखइ।