गलाति 6 - चितवनिया थारु

जम्‍मे जनक भलाइ करिह

¹ प्रियसभ, यगर तोहारमधे कुनहुँ खराब काम करइ बडइ कहके तोहरा थाह पउबह जउँ, तोहरा जुने आत्‍मिक रुपमा बरियार बडह, वकरेके नम्रसे सुधारिह। बाकि तोहरा चेतले रहिय, नत तोहरा फेनि उअ मन्‍सावाक नहिँया परिछामा परे सकबह।

² दुःखमा परइकि एक-दोसरि जनके मदत करिह। यसनेकरके तोहरा ख्रिस्‍टक कहलि वचन पुरा करबह।

³ बाकि जुने दोसरे जनके मदत हइने करसइ हसे मुइ जबड मन्‍से हखहि कहके सोचबिय जउँ, उअ यसलमा जबड मन्‍से हइने हखिय, बरु उअ यपनहिँके धोखा देसिय।

⁴ उहेसे हरेक जन यापन करलि कमवा ठिक बडइ कि हइने बडइ कहके यपनहिँ जाँच करे परतइ। तब वकर करलि कमवा यसल बडइ जउँ, उअ यापन करलि कमवामा खुसि हखे सकबिय हसे दोसरि जनसाङे दाजे नाहिँ परतइ।

⁵ केहकेकि हरेक जन यापन-यापन करलि कमवाक जिम्‍मा यपनहिँ हखे परतइ।

⁶ जुने परमेस्‍वरक वचनसे सिछा पवइ बडिय, उअ यापनसाङे भेलि जम्‍मे यसल चिजुसभ वचन सिखोलहरासाङे बाटचिट करे परतइ।

⁷ यपनहिँके धोखा झिन दिह। परमेस्‍वरके छकावेके सम्‍भव हइने बडइ, केहकेकि मन्‍सावा जथि रोपबिय, उहे कटनि करबिय।

⁸ जुने यापन मनवाक पाप स्‍वभावक चाहना पुरा करे खोजतइ, वकरेके परमेस्‍वर दन्‍ड देबसि, बाकि जुने परमेस्‍वरक आत्‍माक मन परना काम करबिय, उअ पवितर-आत्‍माक देना फर अनन्‍त जिवन पउबिय।

⁹ भलाइ करना काममा हमरा नाहिँ हरियाउ, केहकेकि यगर यसके करइ रहबहुँ जउँ, ठिक जुनमा हमरा यकर फर पउबहुँ।

¹⁰ उहेसे मउका पउतेकि हमरा जम्‍मे जनके भलाइ करते जाउँ हसे विसेस करके हुनुकर जुने ख्रिस्‍टमा विस्‍वास करल हमार विस्‍वासि परिवारक हखइ।

लउठा सिरिस्‍टि

¹¹ हेरह, मुइ यपने हथवासे जबड-जबड अछरसे तोहराके इअ लिखइ बडहिँ।

¹² जुने तोहराके खतना करेके कर लगोइ बडइ, हुनुका मन्‍सावानिक यागा ठिक बडहुँ कहके देखावे खोजसइ। यहुदियाह हुनुकाके झिन सतोइ कहके हुनुका वसके करसइ, केहकेकि हुनुकर थाह बडइ कि, यगर हुनुका ख्रिस्‍ट क्रुसवामा मरलेसे हमरा उद्धार पउले बडहुँ हसे उहेसे खतना करे नाहिँ परतइ कहके परचार करतइ जउँ, हुनुकर याको यहुदि सङहतियवाह हुनुकाके सतोतइ।

¹³ केहकेकि खतना करलहराह यहुदि विस्‍वासिसभ यपनहिँ फेनि मोसाक देलि जम्‍मे व्‍यवस्‍था पालन हइने करसइ, बाकि हुनुकर कारनसे तोहरा खतना करलह कहके घमन्‍ड करे सकुँ कहके तोहराके खतना करे लगोसइ।

¹⁴ बाकि मुइ यसनुक बिसयमा कबहुँ फेनि घमन्‍ड नाहिँ करबहिँ। बरु मुइ हमार प्रभु येसु ख्रिस्‍ट क्रुसवामा मरके जथि करलसि वकर बारेमा मतरे घमन्‍ड करबहिँ। ख्रिस्‍ट क्रुसवामा मरके जथि करलसि, उहेसे संसारक चिजुसभ मोर तहिँया किहो मोलक हइने हखइ हसे यसने मुइ संसारक तहिँया फेनि मरल बडहिँ।

¹⁵ परमेस्‍वरक तहिँया मन्‍सावाह खतना करले फेनि नाहिँ करले फेनि किहो बात हइने हखइ, केहकेकि महत्‍वक बात इअ हखइ कि, परमेस्‍वर हमराके पुरा रुपमा लउठा बनोले बडसि।

¹⁶ जतेक जन इअ सिछा यनुसार चलसइ, परमेस्‍वरक सान्‍ति हसे दाया हुनुकरमा रहइ। हुनुकहिँ परमेस्‍वरक सदि मन्‍सेसभ हखइ।

¹⁷ याखिरमा, मुइ इअ कहबहिँ कि, याबेसे तोहरा वसनुक झुठा सिछा सुनके कुनहुँ फेनि मोरके दुःख झिन दिह, केहकेकि मोर देहियामा बोकलि घाउसभक खतक चिन्‍हासभ मुइ ख्रिस्‍ट येसुक दास हखइ कहके देखोसिय।

¹⁸ प्रियसभ, हमार प्रभु येसु ख्रिस्‍टक दाया तोहार आत्‍मामा रहइ। आमेन।