गलाति 5 - चितवनिया थारुख्रिस्टमा स्वतन्तर 1 ख्रिस्ट हमराके व्यवस्थाक बन्धनसे छुटकारा देके स्वतन्तर बनोले बडसि। उहेसे डटके रहिह हसे यहुदि रितिथितिक दास फेरि झिन बनिह। 2 मोर बतवा सुनह, मुइ पावल, तोहराके इअ कहइ बडहिँ कि, यगर तोहरा खतना करके परमेस्वरक लजरियामा ठिक ठहरे खोजइ बडह जउँ, तोहार तहिँया ख्रिस्ट जथि करलसि उअ त किहो कामक हइने भेलइ। 3 मुइ फेरि हरेक जनके कहबहिँ, तोहरा जुने खतना करके परमेस्वरक लजरियामा ठिक ठहरे खोजसह, तोहरा मोसाक जम्मे व्यवस्था पालन करहि परतइ। 4 तोहारमधे जम्मे जन जुने मोसाक व्यवस्थामा भेलि जम्मे रितिथिति पालन करके परमेस्वरक लजरियामा निरदोस हखे खोजसह, तोहरा पहिलहिँ ख्रिस्टक सम्बन्धसे यलग भेल बडह हसे परमेस्वरक दायासे पउलि उद्धारके अस्विकार करले बडह। 5 बाकि हमरा जुने ख्रिस्टमा विस्वास करले बडहुँ, परमेस्वर हमराके यापन लजरियामा निरदोस ठहरोबसि कहके खाँ इसियाइ बडहुँ। पवितर-आत्मा हमराके निरदोस ठहरोबसि कहके यासा देले बडसि, केहकेकि हमरा ख्रिस्टमा विस्वास करसहुँ। 6 यगर हमरा ख्रिस्टसाङे एक भेलेसे, हमरा खतना करेके कि खतना नाहिँ करेके किहो बात हइने हखइ, बरु मुख्य बात त इअ हखइ कि, हमरा ख्रिस्टमा विस्वास करसहुँ उहेसे दोसरि मन्सावानिके प्रेम करसहुँ। 7 पहिला तोहरा ख्रिस्टक पाछा डउलसे लागल रहलह, बाकि याबे कुने तोहराके सत्य पालन करेके बाधा देलिय त? 8 जुन परमेस्वर तोहराके बलोले हखसि, हुने पाका फेनि तोहराके सत्यता पालन करेके नाहिँ रोकबसि। 9 चेतले रहिह! केहकेकि, जुन झुठा सिछा कुनहुँ तोहराके सिखोइ बडइ उअ झुठा सिछा जसने इचिका खमिर जम्मे पिठवाक ढेलवाके खमिर बनोलि नहिँया तोहार विस्वासके कमजोर बनादेतइ। 10 तोहरा झुठा सिछामा विस्वास नाहिँ करबह कहके मोर प्रभुमा पुरा भरोसा बडइ, बाकि जुने तोहराके झुठा बात सिखोइ बडइ, उअ जबड पदक मन्से भेले फेनि परमेस्वर वकरेके दन्ड देबसि। 11 बाकि प्रियसभ, मुइ फेनि अयहुदि मन्से खतना करे परतइ कहके परचार करसहि कहके कतेक जन मन्से कहसइ। यगर मुइ खतना करे परतइ कहके परचार करसहिँ जउँ, केहके यहुदियाह मोरके सतोसइ त? यगर मुइ अयहुदि मन्सावा खतना करहि परतइ कहके परचार करबहिँ जउँ, तब मुइ ख्रिस्ट क्रुसमा मरलि बतवाक बारेमा परचार करइकि अयहुदि मन्सावा विरोध नाहिँ करतिय। 12 तोहराके यलमलोलहरा त खतना मतरे केहके करेके, बरु यापन यङग कटले त डउल हतिय? पवितर-आत्मासे जिवन 13 मोर प्रियसभ, तोहरा यहुदि रितिथितिसे स्वतन्तर हखेके तहिँया बलावल हखह। बाकि इअ स्वतन्तरताके यापन पाप स्वभाव पुरा करेके तहिँया लाथ लगावेके परयोग झिन करिह, बरु प्रेमसे एक-दोसरि जनक सेवा करिह। 14 जम्मे व्यवस्थाक सार एगुडा आग्यामा बडइ, “तुइ यापन पोरसियावाके यपनहिँ नहिँया प्रेम करसि।” 15 यगर तोहरा एक-दोसरि जनके बनक पसु नहिँया कपटबह हसे लिलबह जउँ याद रखिह, तोहरा एक-दोसरि जनके नास करबह। 16 उहेसे मोर सुझाव इअ हखइ कि, तोहरा पवितर-आत्माक कहलि यनुसार चलिह! केहकेकि यसके करबह जउँ, तोहरा यापन मनवाक पाप स्वभावक करे लगोलि खराब काम नाहिँ करबह। 17 केहकेकि हमार मनवाक पाप स्वभावक चाहना पवितर-आत्माक चाहनाक विरोध करसइ हसे पवितर-आत्माक चाहना हमार मनवाक पाप स्वभावक चाहनाक विरोध करसइ। इअ दुन्हु एक-दोसरिक विरोध करसइ, उहेसे तोहार करे खोजलि कमवा करे हइने सकसह। 18 बाकि तोहरा पवितर-आत्माक कहलि यनुसार चलसह जउँ, तोहरा मोसाक व्यवस्था पालन करेके कर हइने बडइ। 19 मन्सेक मनक पाप स्वभावक कामसभ इअ हखइ: धुचुड, अपवितरता, घिन लगना छाडा काम, 20 मुरति पुजा करेके, जादु-मन्तर करेके, दुस्मनि करेके, झगडा करेके, डाह करेके, खिस करेके, यापन मतरे भलाइ सोचेके, फुट यानेके, गुटबन्दि करेके, 21 डाह करेके, मातल रहेके, मोजमाजा करेके हसे यसने याको काम करेके। जसने पहिला मुइ तोहराके चेतवनि देले रहलहिँ वसने यखनि फेरि चेतवनि देइ बडहिँ। जुने यसनुक कामसभ करतइ, उअ परमेस्वर राजक हकदार हखे नाहिँ सकबिय। 22 बाकि पवितर-आत्मा हमार जिवनमा इअ फरसभ फरोसिय: प्रेम, आनन्द, सान्ति, सहसान, दाया, भलाइ, विस्वस्तता, 23 नम्रता, संयम हखइ। जुने यसनुक व्यबहार देखोसइ, उअ व्यवस्थाक अनुमति हइने देलि किहो काम हइने करसिय। 24 जतेक जन ख्रिस्ट येसुक हखइ, हुनुका यापन मनवाक पाप स्वभावक दुस्ट विचारसे हइने चलसइ। उअ इअ जम्मे स्वभावके क्रुसवामा काँटि ठोकके मारले बडिय। 25 यगर पवितर-आत्मा हमराके इअ लउठा जिवन देले बडसि जउँ, हमरा फेनि हुनेक कहलि यनुसार करु। 26 हमरा एक-दोसरि जनसाङे घमन्ड करेके, खिस उठावेके हसे डाह करना काम करे नाहिँ बनतइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.