गलाति 4 - चितवनिया थारुहमरा परमेस्वरक प्रतिग्याक हकवाला हखहुँ 1 याबे मुइ हकवालवानिक बारेमा कहबहिँ। हकवाला उअ हखिय जुने यापन बाबाक जम्मे सम्पतिया पावेके हक बडइ हसे जम्मे सम्पतियाक मालिक हखिय, बाकि उअ हकवाला नाबालक हखइलइ एगुडा बहरिया नहिँया मतरे हसिय। 2 उअ यापन बाबाक तोकलि जुनवा यवइलइ वकरेके एगुडा अभिभावक हेरचाह करसिय हसे व्यवस्थापक वकर बाबाक सम्पतिया देखभाल करसिय। 3 ख्रिस्ट यइलिसे यागा हमरा फेनि नाबालक नहिँया रहलहुँ हसे इअ संसारक धरमक रितिथितिक अदलमा रहलहुँ। 4 बाकि परमेस्वरक तोकलि समय यलइलेपर हुने यापन पुतरके पठोलसि। हुने एगुडा जनियानिसे मन्से भके जरमलसि हसे मोसाक व्यवस्था पालन करलसि। 5 परमेस्वर हमार नहिँया मोसाक व्यवस्थाक बन्धनमा रहलहरानिके छुटकारा देवेके तहिँया हसे हमरा फेनि हुनेक पुरा रुपसे सन्तानक हक पावे सकुँ कहके ख्रिस्टके पठोलसि। 6 केहकेकि हमरा हुनेक सन्तानसभ हखहुँ, उहेसे परमेस्वर यापन पुतरक आत्मा हमार हृदयमा पठादेले बडसि हसे उहे आत्मा हमराके परमेस्वरके “हे अब्बा! हे बाबा” कहेके बलावेके सिखोससि। 7 उहेसे याबे हमरा बहरिया हइने बरु हुनेक सन्तान हखहुँ। हमरा हुनेक पुरा रुपसे सन्तान भेलेसे हुने यापन सन्तानसभक तहिँया जथि प्रतिग्या करले बडसि उअ देबसि। गलातिक विस्वासिसभक तहिँया पावलक वास्ता 8 तोहरा अयहुदियाह, परमेस्वरके चिनलेसे यागा, जुन सदि परमेस्वर हइने रहलइ यसनुक देउतासभक पुजा करइ रहलह। 9 बाकि याबे जब तोहरा परमेस्वरके चिनइ बडह, बरु मुइ यसके कहले ठिक हतइ कि, परमेस्वर तोहराके चिनइ बडसि, याबे केहके तोहरा फेरि फिरके कमजोर हसे तोहार किहो भलाइ करे हइने सकना धरमक रितिथितिक पाछा लगसह? कथि तोहरा फेरि उअ पुरनि रितिथितिक दास हखे चाहसह? 10 तोहरा अयहुदियाह त परमेस्वरक यागा यपनहिँके निरदोस ठहरावेके तहिँया यहुदि धरमक विसेस दिन, महिना, रितु हसे बरससभ मनसह। 11 तोहार तहिँया मोर करलि मेहनत व्यरथमा गेलइ कि कहके मुइ डेरेलहिँ। 12 मोर प्रियसभ, जसने याबे मुइ व्यवस्थासे मुक्त भेल बडहिँ तोहरा फेनि वसने हखिह कहके बिन्ति करइ बडहिँ, केहकेकि जसने तोहरा अयहुदियाह व्यवस्थासे मुक्त बडह मुइ फेनि तोहार नहिँया भेल बडहिँ। मुइ तोहार लघिना पहिला पारि यवइकि तोहरा मोरसाङे कस्के डउल व्यबहार करलह, उअ याद करिह। 13 तोहार थाह बडइ कि, मुइ पहिला पारि तोहराके सुसमाचार सुनोइकि मनियाइल रहलहिँ। 14 मोर अवस्था तोहार तहिँया परिछा नहिँया भेले ताफेनि तोहरा मोरके अस्विकार हसे घिरिना हइने करलह, बरु मोरके परमेस्वरक एगुडा स्वरगदुत हसे येसु ख्रिस्टक नहिँया गरहन करलह। 15 तखनहिँ तोहरा कतुरा खुसि रहलह। मुइ इअ बतवाक साछि बडहिँ कि, बनतिय जउँ मोर तहिँया तोहरा यापन यखिया फेनि निकडाके मोरके देतह, बाकि यखनि कथि भेलइ त? 16 केहके तोहरा याबे मोरके सतरु नहिँया व्यबहार करइबडह? कथि मुइ तोहाराके सत्य बात कहलेसे वसके सोचसह? 17 जुन झुठा सिछकसभ यहुदि नियमसभ पालन करेके कर लगोसइ, हुनुका तोहराके यापनवरि तानेके खाँ वास्ता करले नहिँया देखोसइ, बाकि हुनुकर मनसाय यसल हइने बडइ। वास्तवमा हुनुका तोहराके मोरसे छुटियाके तोहार ध्यान हुनुकरवरि देह कहके हुनुका खाँ इछा करसइ। 18 उअ यसल हखइ, जब कुनहुँ यापन यसल मनसायसे हमराके ध्यान देतइ। मुइ तोहार ध्यान मोरवरि देह कहके चाहसहिँ, बाकि मुइ तोहारसाङे रहइकि मतरे हइने। 19 मोर प्रिय छोकनियाह, जसने एगुडा जनियानि बाचा पवइकि बेथा लगसइ, वसने मुइ तोहराके फेरि जनम देइ नहिँया तोहार तहिँया खाँ कस्ट सहइ बडहिँ हसे तोहारमा ख्रिस्टक स्वभाव पुरा रुपसे पाका नाहिँ हखइलइ मुइ खाँ कस्ट सहइ रहबहिँ। 20 यखनि मुइ तोहारसाङे भके नम्रसे बात करेके यसल हतिय कहके इछा बडइ, बाकि तनाउ रहके मुइ कथि करेके त? मुइ त तोहार बारेमा यलमलाइल बडहिँ। अब्राहमक दु जन सन्तानसभक बारे 21 तोहरा मोसाक व्यवस्थाक अदलमा रहे खोजलहराह तोहराके मोसाक व्यवस्था कथि कहसिय कहके थाह हखे परतइ। 22 केहकेकि धरमसास्तरवामा यसके लिखाइल बडइ कि, अब्राहमक दु गो बेटासभ रहलइ, एगुडा बहरिनिया जनियावरिसे, दोसरि यपने जनियावरिसे, जुने बहरिया हइने रहलिय। 23 बहरिनियासे जरमलि बेटवा मन्सेक योजना यनुसार जरमल रहलिय, बाकि सारासे जरमलि बेटवा परमेस्वरक प्रतिग्या पुरा हखेके तहिँया भेल रहलइ। 24 हमरा यकरसे इअ बुझे सकबहुँ कि, इअ दु जन जनियानि परमेस्वरक दु गो करारके बुझोसइ। बहरिनिया हागार सिनइ पहडावाक पुरनि नियमक एगुडा दृस्टान्त नहिँया हखिय। सिनइ पहडावामा मन्सावाह व्यवस्था पउलइ हसे उअ व्यवस्था हुनुकाके दास बनोलिय। उहेसे यकरसे जरमलि सन्तनवाह बहरियासभ हखइ। 25 याबे हागार कहले अरब देसवामा भेलि सिनइ पहाड नहिँया हखिय, जहवाँसे व्यवस्था यलइ। वकरेके यखनिक यरुसलेम सहरवासाङे दाजे सकेतइ, केहकेकि हागार त यापन सन्तानसभसाङे बहरिया बडिय। 26 बाकि सारा, जुने बहरिया हइने रहलिय, उअ स्वरगक यरुसलेमक नहिँया हखिय हसे उअ हमार दाओ हखिय। 27 केहकेकि धरमसास्तरवामा यसके लिखाइल बडइ, “बेटा-बेटि हइने जरमोलहर बाँझि जनि, खुसि भके गग्गसिह, हलुकाएके वेथा थाह हइने भेल जनियानिह मनवा खोलह हसे खुसि भके चिल्लाह, केहकेकि जुन जनिक मरद छाडदेले बडइ वकर झन बहुत सन्तान हतइ।” 28 प्रियसभ, हमरा जुने विस्वास करसहुँ, हमरा इसहाक नहिँया बडहुँ, केहकेकि उअ परमेस्वरक प्रतिग्या यनुसार जरमल हखिय हसे हमरा फेनि अब्राहमक सन्तान भेल बडहुँ। वसने हमरा फेनि परमेस्वरक प्रतिग्या यनुसार भेल बडहुँ। 29 बहुत यागा इस्माएल, जुने मन्सेक योजना यनुसार जरमल रहलिय, उअ इसहाकके सतोलिय, जुने परमेस्वरक पवितर-आत्माक सक्तिमा जरमल रहलिय। वसने तोहराके फेनि सतोइ बडइ, जुने व्यवस्था पालन करे खोजसइ। 30 बाकि धरमसास्तरवामा कथि लिखाइल बडइ “बहरिनिया हसे वकर बेटवाके निकडा देह, केहकेकि बहरिनियाक बेटवा स्वतन्तर जनिनियाक बेटवासाङे हक नाहिँ हतइ।” 31 उहेसे प्रियसभ, हमरा परमेस्वरसे बहरिनिक सन्तान नहिँया हइने भेल बडहुँ, बाकि वकर सन्तान नहिँया भेल बडहुँ, जुने बहरिन जनि हइने रहलिय। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.