गलाति 3 - चितवनिया थारुव्यवस्था हसे ख्रिस्टमा विस्वास 1 अरे गलातिक विस्वासिसभ, तोहरा केहके मुरुख भेल बडह? तोहार मनवा कुने बहकोलिय? येसु ख्रिस्ट क्रुसवामा मरके पुरा करलि बतवा तोहार यखियाक यागा स्पस्टसे बयान करदेले बडहिँ। 2 मुइ तोहराके एगुडा बात पुछबहिँ, तोहरा पवितर-आत्मा मोसाक व्यवस्था पालन करके पउलह कि, सुसमाचार सुनके विस्वास करलेसे पउलह? 3 तोहरा केहके यतुरा मुरुख भेलह कि, तोहार इसाइ जिवन परमेस्वरक आत्माक सक्तिसे सुरु करके, याबे यापन सक्तिमा पुरा करेके कोसिस करइबडह? 4 कथि तोहरा व्यरथमा यसनुक खाँ दुःख भोगलह त? उअ कबहुँ फेनि व्यरथमा हइने भेलइ। 5 परमेस्वर तोहराके पवितर-आत्मा देके तोहार बिचा यचम्मक काम करससि। कथि इअ तोहरा व्यवस्था पालन करलेसे भेलइ कि सुसमाचार सुनके वकरमा विस्वास करलेसे भेल हखइ? 6 अब्राहमक बारेमा सोचह, “उअ परमेस्वरमा भरोसा करलिय हसे परमेस्वर वकर विस्वासक कारनसे वकरेके निरदोस ठहरोलसि।” 7 उहेसे तोहरा इअ बुझहि परतइ कि, जुने परमेस्वरमा भरोसा करसइ, हुनुकहिँ अब्राहमक सदि सन्तान हखइ। 8 परमेस्वर अयहुदि मन्सावानिके हुनुकर विस्वाससे यापन लजरियामा निरदोस ठहरोबसि कहके धरमसास्तरवामा लिखाइल रहलइ। यसके परमेस्वर बहुत यागासे इअ सुसमाचारक बारेमा अब्राहमके कहले रहलसि “तोरसे जम्मे जतियाक मन्सावाह आसिस पउतइ।” 9 उहेसे जुने येसु ख्रिस्टमा विस्वास करसइ, हुनुका जम्मे जन अब्राहमक विस्वास करके पउलि आसिस नहिँया पउतइ। 10 जुने व्यवस्थामा भर परके परमेस्वर यागा ठिक ठहरे खोजतइ, उअ दोसि ठहरके दन्ड पउबिय, केहकेकि धरसास्तरवामा यसके लिखाइल बडइ, “व्यवस्थाक कितबवामा लिखइलि जम्मे बतवा पुरा रुपसे हइने मनलहरा मन्सावाह दोसि ठहरके दन्ड पउबिय।” 11 व्यवस्था पालन करलहरानिके परमेस्वर निरदोस हइने ठहरोससि कहके स्पस्ट बडइ। केहकेकि धरमसास्तरवा यसके कहसिय “जुन मन्सावाके परमेस्वर विस्वास करलेसे निरदोस ठहरोससि, उअ कबहुँ हइने वरइना जिवन पउबिय।” 12 एक जन परमेस्वरमा विस्वास करके व्यवस्था पालन करेकेमा खाँ फरक बडइ, केहकेकि धरमसास्तरवामा यसके लिखाइल बडइ, “जुने व्यवस्थाक कहलि जम्मे पालन करसिय, उअ कबहुँ हइने वरइना जिवन पउबिय।” 13 बाकि कुनहुँ फेनि व्यवस्था पालन करे नाहिँ सकतइ, उहेसे हमरा जम्मे जन दन्ड पावेके योग्य रहलहुँ। बाकि ख्रिस्ट हमराके व्यवस्थासे यइना दन्डसे छुटकारा देलसि, जब हुने क्रुसवामा मरलसि, हुने हमार पावे परना गल्तिक दन्ड यपनहिँ सहलसि। केहकेकि धरमसास्तरवामा यसके लिखाइल बडइ, “जकरेके मारके गछवामा टङले रहसइ, उअ परमेस्वरसे दन्ड पउले रहसिय।” 14 येसु ख्रिस्ट हमराके इअ कारनसे छुटकारा देलसि कि, अब्राहमके देलि आसिस अयहुदि मन्सावाह फेनि येसु ख्रिस्टमा विस्वास करके पावे सकइ, ताकि हमरा फेनि विस्वास करके परमेस्वरक प्रतिग्या करल पवितर-आत्मा पावे सकुँ। व्यवस्था हसे परमेस्वरक प्रतिग्या 15 मोर प्रियसभ, मन्सेक हरेक दिनक जिन्गिसे एगुडा उदाहरन लेउ, जुन अब्राहमके परमेस्वरक करलि प्रतिग्याक बारेमा देखोसइ। दु जन मन्सेक बिचा सम्झउता भके सहि छाप करलेपर वकरमा कुनहुँ किहो थपे कि घटावे नाहिँ सकतइ। 16 वसने जुन प्रतिग्या परमेस्वर अब्राहमके वकर एगुडा सन्तानक बारेमा करलसि, उअ नाहिँ बदलेतइ। धरमसास्तरवा “सन्तानसभके” हइने कहल हखइ। इअ त बहुत जन मन्सेसभ बुझोबिय, बाकि धरमसास्तरवा “तोर सन्तानके” कहसिय, इअ एक जन मन्सेके मतरे बुझोसिय। उअ एक जन सन्तान ख्रिस्ट हखसि। 17 मोर कहे खोजल बात इअ हखइ कि, परमेस्वर पहिला अब्राहमसाङे एगुडा सम्झउता स्थापित करलसि हसे जुन व्यवस्था परमेस्वर चार सय तिस बरस पाछा मोसाके देलसि, उअ सम्झउताके खारिज करे हइने सकलिय। उहेसे मोसाक व्यवस्था परमेस्वरक करलि प्रतिग्याके खारिज करे हइने सकलिय। 18 यगर परमेस्वर मन्सावानिके हक व्यवस्था पालन करलेसे मतरे देतसि जउँ त, प्रतिग्या पावेके तहिँया त परमेस्वरमा भरोसा करहि नाहिँ परतिय। बाकि परमेस्वर अब्राहमके देबहिँ कहके प्रतिग्या करलेसे देलसि। 19 वसके भेले व्यवस्था केहके चाहिँ लगलइ त? वास्तवमा मन्सावाह लगातार पाप करइ बडहुँ कहके थाह पावे सकइ कहके प्रतिग्यासाङे उअ दियलइ। व्यवस्था मतरे पालन करेके महत्व त अब्राहमके प्रतिग्या करल सन्तान ख्रिस्ट यवइलइ रहलइ। परमेस्वर यापन व्यवस्था स्वरगदुतवानिसे मोसाके देलसि, जुने मन्सावानि हसे परमेस्वरक बिचा मध्यस्थ रहलिय। 20 सम्झउता बनावेके तहिँया मध्यस्थ करलाहर एक पछक तहिँया काम हइने करसिय। उअ दु पछक तहिँया काम करसिय, बाकि परमेस्वर मध्यस्थ करलाहर बिना अब्राहमके प्रतिग्या देलसि। प्रतिग्याक काम व्यवस्थाक कामसे फरक बडइ 21 वसके भेले, कथि मोसाक देलि व्यवस्था परमेस्वरक प्रतिग्यासभक विरोध हखइ त? अहँ, कबहुँ फेनि हइने! यगर व्यवस्था मन्सावानिके जिवन देतिय जउँ, तब मन्सावाह व्यवस्था पालन करके परमेस्वरक यागा निरदोस ठहरतिय। 22 बाकि जम्मे संसार पापक अदलमा कइदि नहिँया बडइ कहके धरमसास्तरवा कहसिय, उहेसे हुनुका दन्डसे बचे नाहिँ सकतइ। परमेस्वर येसु ख्रिस्टमा विस्वास करलहरानिके यापन करलि प्रतिग्या देवेके तहिँया यसनुक करलसि। 23 बाकि ख्रिस्टमा विस्वास करके उद्धार पउना समय यवइलइ हमरा व्यवस्थाक बन्धनमा कइदि नहिँया रहलहुँ। 24 विस्वाससे हमरा परमेस्वरक यागा निरदोस ठहरे सकुँ कहके ख्रिस्ट हइने यवइलइ व्यवस्था हमार अभिभावक रहलिय। 25 बाकि यखनि परमेस्वर ख्रिस्टमा विस्वास करेके बारेमा समाद परकट करलेसे हमार अभिभावक चाहिँ हइने बडइ। परमेस्वरक सन्तान 26 याबे तोहरा जम्मे जन येसु ख्रिस्टमा विस्वास करलेसे परमेस्वरक सन्तान भेल बडह। 27 तोहरा जम्मे जन ख्रिस्टमा एक हखेके तहिँया बप्तिस्मा लेले बडह हसे तोहरा हुनेके लुगा नहिँया पेहरले बडह, केहकेकि तोहार जम्मे जनक जिवनमा हुनेक यसल चरितर देखार बडइ। 28 उहेसे परमेस्वरक लजरियामा यहुदि हसे अयहुदिक, कमारा तके स्वतन्तर, मरदाना हसे जनियानि मन्सेक बिचा किहो फरक हइने बडइ, केहकेकि तोहरा जम्मे जन येसु ख्रिस्टसाङे एक भेल बडह। 29 यगर तोहरा ख्रिस्टक हखह जउँ, अब्राहमक सन्तान फेनि हखह हसे परमेस्वरक प्रतिग्या करल हकवाल फेनि हखह। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.