गलाति 2 - चितवनिया थारुप्रेरितवाह पावलके प्रेरित कहके गरहन करलइ 1 चउदह बरस पाछा मुइ बारनाबाससाङे फेरि यरुसलेमक मन्डलियानिक यगुवासभके भेटे गेलहिँ। तखनहिँ तितसके फेनि मुइ यापनसाङे लेले गेलहिँ। 2 परमेस्वर मोरके जाए कहलेसे मुइ वहवाँ गेलहिँ। मुइ वहवाँ पुगलेपर नाउँ चलल मन्डलियाक यगुवासभके गुप्त रुपमा भेटलहिँ हसे अयहुदि मन्सावानिके मोर सुनोलि खुसिक समादक बारेमा हुनुकाके प्रस्ट पारदेलहिँ। मुइ इअ यकर तहिँया करलहिँ कहके हुनुका जनतइ कि जथि मुइ पहिला परचार करके सिछा देलहिँ उअ ठिक रहलइ हसे यखनि उअ फेनि व्यरथ झिन हखइ। 3 हुनुका मोर देलि सिछा ठिक रहलइ कहके सहमत भेलइ। उहेसे मोरसाङे रहलहरा तितस अयहुदि भेले ताफेनि हुनुका वकरेके खतना करेके कर हइने लगोलइ। 4 बाकि वहवाँ कतेक जन विस्वासिसभ हखहुँ कहके लाथ लगोलहर मन्डलिया भितरा पेसके येसु ख्रिस्टमा भेलि हमार स्वतन्तरताक चुवा करलइ हसे हमराके व्यवस्थाक दास बनावे खोजलइ। 5 बाकि जुन सदि सुसमाचारमा तोहरा विस्वास करलह, वकर सत्यता झिन बदलाइ कहके हमरा हुनुकर कहलि बतवामा सहमत हइने भेलहुँ हसे यघरिक फेनि हइने झुकलहुँ। 6 बाकि हुनुका मन्डलियाक यगुवासभ मोर देलि सिछामा किहो फेनि हइने थपलइ। हुनुका जुन पदक भेले फेनि मोर किहो फरक हइने परलइ, केहकेकि परमेस्वर ककरहुँके फेनि पछपात हइने करससि। 7 बरु परमेस्वर पतरुसके यहुदि मन्सावानिक लघिना सुसमाचार परचार करे पठोले नहिँया हुने मोरके अयहुदि मन्सावानिक लघिना सुसमाचार परचार करे पठोलसि कहके हुनुका थाह पउलइ। 8 जसने परमेस्वर पतरुसके यहुदि मन्सावानिक लघिना परचार करेके तहिँया प्रेरित बनोलसि, वसने हुने मोरके फेनि अयहुदि मन्सावानिक बिचा परचारक काम करलाहर प्रेरित बनोलसि। 9 याकुब, पतरुस हसे युहन्ना जुने मन्डलियाक खाँ नाउँ चलल यगुवा कहके चिनाइल रहलइ, परमेस्वरक दायामा मोरके इअ बिसेस काम देले बडसि कहके जनलेपर प्रभुक कामक तहिँया हुनुका मोरके हसे बारनाबासके स्वागत करलइ। उहेसे हुनुका हमराके सहकरमिक रुपमा स्विकार करलइ। हमरा अयहुदियानिक बिचा काम करलाहर भेलहुँ हसे हुनुका यहुदि मन्सावानिक बिचा काम करलाहर भेलइ। 10 हुनुका एगुडा बात अनुरोध करलइ, हमरा यरुसलेममा भेलि गरिब यहुदि विस्वासिसभके मदत करेके सम्झइ रहे परतइ। उहे बतवा करेके मुइ फेनि उत्सुक रहलहिँ। पावल पतरुसक विरोध करलिय 11 मुइ पाछेसे एन्टिओखिया सहरवामा रहलहिँ, पतरुस फेनि वहवाँ यलिय, तब मुइ वकरेके खुल्लमखुल्ला विरोध करलहिँ, केहकेकि उअ गल्ति करले रहलिय। 12 मुइ उअ करलहिँ केहकेकि याकुबक पठोलि मन्सावाह यइलिसे यागा पतरुस अयहुदियानिसाङे बइठके खइय, बाकि जब हुनुका यलइ, तब उअ अयहुदियानिसे रसेरसे पाछा हटके यलग भेलिय, केहकेकि उअ अयहुदि विस्वासिसभ खतना करहि परतइ कहके कहलाहर यरुसलेमक यहुदि मन्सावानिसाङे डेरेलिय। 13 उहेसे वहवाँक याको यहुदि विस्वासियवाह पतरुसक उदाहरनमा चललइ। हमरा हइने डउल करइ बडहुँ कहके हुनुकर हसे पतरुसक थाह रहलइ। बारनाबास फेनि हुनुकरे उदाहरनमा चललिय। 14 जब हुनुका खुसिक समादमा भेलि सत्य सिछाक उल्टा करइ बडइ कहके जनलइ, मुइ जम्मे जनक यागा पतरुसके कहलहिँ, “तुइ यहुदि भके फेनि यहुदि रितिथिति हइने मनसहि हसे अयहुदि मन्से नहिँया जिवन बितोसहिँ जउँ, कस्के तुइ अयहुदि मन्सावानिके यहुदि रितिथितिमा चले परतइ कहके कर लगावे सकबहि?” 15 तब मुइ जम्मे यहुदियानिके कहते गेलहिँ, हमरा जरमतिसे यहुदि नहिँया हखहुँ, हमरा परमेस्वरक व्यवस्था हइने जनलाहर अयहुदि मन्से हइने हखहुँ। 16 बाकि हमार यखनि थाह बडइ कि, यहुदि व्यवस्था पालन करलेसे मन्से परमेस्वरक लजरियामा निरदोस हइने ठहरसइ, बरु येसु ख्रिस्टमा विस्वास करलेसे निरदोस ठहरसइ। उहेसे हमरा यहुदि मन्सावाह येसु ख्रिस्टमा विस्वास करसहुँ, ताकि परमेस्वर हमराके फेनि निरदोस ठहरोसि, यहुदि व्यवस्था पालन करलेसे हइने। सदियो कुनहुँ फेनि परमेस्वरक लजरियामा यहुदि व्यवस्था पालन करके निरदोस नाहिँ ठहरतइ। 17 हमरा यहुदि मन्सावाह येसु ख्रिस्टसाङे सम्बन्ध भेलेसे परमेस्वरक लजरियामा निरदोस ठहरबहुँ कहके यासा बडइ। यगर हमरा यहुदि रितिथिति पालन हइने करलेसे हुनुकर लजरियामा पापि ठहरबहुँ जउँ, कथि यकर यरथ ख्रिस्ट मन्सावानिके पाप करेके उत्साह देससि त? अहँ, कबहुँ नाहिँ! 18 यकर सत्यता इअ हखइ, यगर मुइ पहिला पालन करेके छडलि यहुदि व्यवस्था पालन करबहिँ जउँ, मुइ पाप करले बडहिँ कहके देखोसहिँ। 19 जब मुइ व्यवस्था पालन करेके कोसिस करलहिँ, उअ मोरके दोसि ठहरोलिय हसे परमेस्वरसे यलग करलिय कहके मुइ जनलहिँ। मुइ परमेस्वरक तहिँया जियसकहिँ कहके व्यवस्थाक सम्बन्धमा यपनहिँके मरल सम्झलहिँ। 20 मुइ ख्रिस्टसाङे क्रुसवामा मरल नहिँया बडहिँ हसे याबे मुइ हइने बरु ख्रिस्ट मोरमा जियइ बडसि। जुन जिवन मुइ यखनि इअ देहियामा जियइ बडहिँ, उअ मुइ परमेस्वरक पुतरमा विस्वास करके जियइ बडहिँ, जुने मोरके प्रेम करके यापन जिवन मोर तहिँया देलसि। 21 मुइ परमेस्वरक दायाके अस्विकार हइने करसहिँ, केहकेकि यगर व्यवस्था पालन करके परमेस्वरक लजरियामा कुनहुँ निरदोस ठहरतइ जउँ, ख्रिस्ट त व्यरथमा मरलसि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.