गलाति 1 - चितवनिया थारु1 मुइ पावल, प्रेरित हखेके तहिँया कुनहुँ मन्सेसभक दाफासे न त कुनहुँ अधिकार चलोलहर मन्सेसे पठाइल हखहि, बाकि येसु ख्रिस्टसे हसे हमार स्वरगिय पितासे, जुने ख्रिस्टके मरलिसे जिउतोलसि, हुनेसे पठाइल हखहि। 2 मुइ हसे मोरसाङे भेलि विस्वासिसभक दफवासे गलातिया परदेसक मन्डलियानिके इअ चिठिया लिखइ बडहिँ। 3 हमार परमेस्वर पिता हसे प्रभु येसु ख्रिस्ट तोहराके अनुग्रह हसे सान्ति दिय। 4 इअ दुस्ट संसारसे हमराके छुटकारा देवेके हुने हमार परमेस्वर हसे पिताक इछा यनुसार हमार पापक तहिँया यापन जिवन देलसि। 5 परमेस्वरक यादर सबदिन हखइ। आमेन। खुसिक समाद एगुडा मतरे बडइ 6 मुइ त तोहार बारेमा सुनके छक परइ बडहिँ कि, ख्रिस्टक अनुग्रहमा तोहराके बलोलहरा परमेस्वरके यतुरा हलहालि छडइ बडह हसे दोसरे सिछावरि लगइ बडह। 7 सदियो इअ हखइ, ख्रिस्टक बारेमा याको दोसरे सदियो सिछा हइने बडइ, बाकि कतेक जन मन्सेसभ तोहराके भरममा पारके, ख्रिस्टक इअ खुसिक समाद बदलेके कोसिस करइ बडइ। 8 बाकि यगर कुनहुँ हमार परचार करलि खुसिक समादसे दोसरे सिछा परचार करतइ जउँ, चाहे उअ हमरहिँ हखहुँ, चाहे उअ स्वरगदुत हखिय, वकर अनन्त निना हखइ। 9 मुइ इअ बतवा यगाहे फेनि कहले रहलहिँ हसे याबे फेरि कहइ बडहिँ, तोहरा जुन खुसिक समाद गरहन करले बडह। यगर कुनहुँ वकरसे दोसरे खुसिक समाद तोहराके परचार करतइ जउँ, उअ सरापित हखिय। 10 कथि मुइ इअ कहइ बडहिँ, मुइ मन्सावानिके खुसि बनावे खोजइ बडहिँ? हइने, मुइ सबदिन परमेस्वरके खुसि बनावे खोजइ बडहिँ। मुइ मन्सावानिके खुसि पारेके मतरे हइने कहसहि। यगर मुइ यखनिलइ मन्सावानिके खुसि बनावे खोजइ बडहिँ जउँ, मुइ ख्रिस्टक सेवक हइने हखहि। पावलक परचार करलि खुसिक समाद ख्रिस्टसे याइल हखइ 11 मोर प्रियसभ, तोहरा इअ जनह कहके मुइ चाहसहिँ, मोर परचार करलि खुसिक समाद मन्सेक मनसे बनावल खुसिक समाद हइने हखइ। 12 केहकेकि मुइ इअ कुनहुँ मन्सेसे हइने पउले हखहि, न त कुनहुँ मोरके सिखोले हखइ। बाकि वकर ग्यान येसु ख्रिस्ट मोरके यपनहिँ परकट करले हखसि। 13 मुइ यहुदि धरमक पाछा लगइकि मोर जिवन कस्नुक रहलइ कहके तोहरा सुनले बडह। तखनहिँ मुइ कस्के परमेस्वरक मन्डलियाके खाँ सतोलहिँ हसे वकरेके नास करे खोजलहिँ। 14 मुइ तखनहिँ यहुदि धरम मनलहरानिमा यापन उमेरक मन्सावानिमधे यहुदि धरमक ग्यानमा मुइ कट्टर रहलहिँ। मुइ यापन पुरखावानिक रितिथितिमा खाँ उत्साहित रहलहिँ। 15 बाकि मुइ जरमलिसे यागा परमेस्वर मोरके यलग करलसि हसे यापन अनुग्रहसे हुनेक काम करेके तहिँया बलोलसि, 16 परमेस्वरक खुसि लगलइ कि मोरसे अयहुदियानिक बिचा हुनेक बारेमा परचार हखे सकइ कहके यापन पुतरके मोर लघिना परकट करलसि। तखनहिँ मुइ कुनहुँ मन्सेसाङे वकर बारेमा ककरहुँके पुछभाख हइने करलहिँ। 17 न त मोरसे यागाक प्रेरितवानिसाङे सल्लाह लेवे मुइ यरुसलेम गेलहिँ, बाकि मुइ वइघरहिँ अरब देसवरि गेलहिँ हसे पाछेसे दमस्कस सहरवामा फिरके यलहिँ। 18 येसुजि मोरके परकट करलिक तिन बरस पाछा पतरुसके भेटे मुइ यरुसलेम गेलहिँ हसे वकरसाङे पनरह दिन रहलहिँ। 19 बाकि मुइ प्रभुक भयवा याकुबके बाहेक याको कुनहुँ प्रेरितके हइने भेटलहिँ। 20 मुइ जथि लिखइ बडहिँ, उअ सत्य बडइ। मुइ झुठा हइने फदकइ बडहिँ कहके परमेस्वर जनससि। 21 वकरपाछा मुइ सिरिया हसे किलिकिया परदेसवरि गेलहिँ। 22 तखनिलइ यहुदिया परदेसमा भेलि ख्रिस्टक मन्डलियानिक विस्वासिसभ मोरके हइने देखले रहलइ। 23 हुनुका मोर बारेमा इअ मतरे सुनले रहलइ, “एक समय जुने हमराके सतोइय, याबे उअ मन्सावा उहे विस्वासक बारेमा परचार करइ बडिय, जुने एकपल्टा उअ नास पारे खोजइ रहलिय।” 24 हुनुका मोर बारेमा उअ समाद सुनलेपर परमेस्वरक महिमा करलइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.