एफिसि 6 - चितवनिया थारुछोकनियाह हसे दाओ-बाबासभके निरदेसन 1 तोहरा छोकनियाह, प्रभुमा एक भेलेसे यापन दाओ-बाबाक कहलि मनिह, केहकेकि इअ परमेस्वरक मनपरना बात हखइ। 2 परमेस्वरक देलि आग्यासभमधे “यापन दाओ-बाबाक यादर करिह” कहल आग्यामा इनाम पवसइ कहके परमेस्वरक प्रतिग्या करल पहिला आग्या हखइ हसे, 3 उअ आग्यामा परमेस्वर इअ प्रतिग्या करले बडसि कि, “यगर तोहरा यसने करबह जउँ, तोहार भलाइ हतइ हसे धरतियामा तोहरा बहुत दिनलइ जियबह।” 4 तोहरा दाओ-बाबासभ, यापन बेटवा-बेटियानिके खिस झिन उठोइह, बाकि हुनुकाके प्रभुक अनुसासन हसे सिछामा हुरकोइह। बहरियावाह हसे मलिकावानिके निरदेसन 5 तोहरा बहरियावाह, ख्रिस्टक सेवा करल नहिँया इमान्दारसे इअ संसारमा भेलि तोहार मलिकावानिक यादर करिह हसे हुनुकर कहलि मनिह। 6 मलिकावानिके खुसि पारेके हुनुकर यागा देखावेके मतरे काम झिन करिह, बाकि ख्रिस्टक दास नहिँया पुरा हृदयसे परमेस्वरक इछा पुरा करिह। 7 मन्सावानिके सेवा करइ बडहिँ कहके सोचके हइने, बाकि प्रभुक सेवा करइ बडहिँ कहके सोचके खुसिसे सेवा करिह। 8 तोहार इअ बतवा थाहे बडइ, बहरिया भेले फेनि, हइने भेले फेनि, यसल काम करलहरा हरेक जनके प्रभु इनाम देबसि। 9 तोहरा मालिकसभ, यापन बहरियावानिसाङे डउल व्यबहार करिह हसे हुनुकाके झिन डटिह, केहकेकि तोहार दुन्हु जनक मालिक स्वरगमा बडसि। हुने न्याय करइकि ककरो पछपात हइने करससि। परमेस्वरक हाथ-हथियार 10 याखिरमा, तोहरा प्रभुमा हसे हुनेक महान सक्तिसे बरियार हखते जइह। 11 परमेस्वरक देलि जम्मे हाथ-हथियार लिह, ताकि सइतनवासे यइना जम्मे चलाखिक विरोध करे सकबह। 12 केहकेकि हमार लडाइ चाहिँ मन्सेसे हइने, हइने देखार सक्ति हसे अधिकार भेलिसाङे, इअ धरतियामा सासन करलहरा यन्हारिक सक्तिसाङे, यकसवामा भेलि जम्मे खलिक भुत-आत्मासभ हसे दुस्ट-आत्मासभक सक्तिसाङे हखइ। 13 उहेसे परमेस्वरक जम्मे हाथ-हथियार लिह, ताकि जब उअ खराब दिन यतइ, तोहरा दुस्टक सक्तिके रोके सकबह हसे याखिरलइ फेनि तोहरा स्थिर भके ठडियाए सकबह। 14 उहेसे तोहरा सबदिन लडेके तहिँया तयार रहिह। सत्य बातके तोहरा पेटि नहिँया ठेकनवामा बनिह, सतरुसे यपनहिँके बचावेके तहिँया धारमिकताक छातिपाता लगोइह, 15 हसे सान्ति देना सुसमाचारक जुता लगाके तयार हखिह। 16 उतुरा मतरे हइने, इअसाङे ख्रिस्ट वपरा तोहार दृढ विस्वासके यापन रछा करेके ढाल नहिँया उठोइह, ताकि सइतनवा तोहराके हानि पुगोना जम्मे अग्निवाडसभ रोके सकबह। 17 परमेस्वरक देलि मुक्तिके टोप नहिँया लगोइह हसे पवितर-आत्माक तरवार लिह, जुन परमेस्वरक वचन हखइ। 18 तोहरा सबदिन पवितर-आत्माक यगुवाइमा परथाना हसे बिन्ति करिह। सबदिन हुसियार रहिह हसे ख्रिस्टक जम्मे पवितर जनसभक तहिँया लगातार परथाना करते रहिह। 19 तोहरा मोर तहिँया फेनि परथाना करदिह, मुइ ख्रिस्टक बारेमा फदकइकि, परमेस्वर मोरके फदकेके वचन दिय, ताकि मुइ खुसिक समादमा भेलि हइने बुझलि बतवा याको जनके सहाससे बुझावे सकुँ। 20 इहे सुसमाचार सुनावेके तहिँया मुइ प्रेरित भेल बडहिँ हसे यकरे तहिँया मुइ झ्यालखनामा परल बडहिँ। उहेसे मुइ कथि फदके परतइ उअ सहाससे फदके सकुँ कहके मोर तहिँया परथाना करदिह। याखिर अभिवादन 21 तुखिकस हमार सोगावल भाइ हसे प्रभुक विस्वासयोग्य सेवक हखिय। उअ मोर जम्मे हालखबर तोहराके कहदेबिय। 22 हमार हालचाल कसनुक बडइ उअ सुनके तोहरा सहास पावे सकह कहके मुइ वकरेके तोहार लघिना पठोले बडहिँ। 23 जम्मे विस्वासिसभके, हमार परमेस्वर पिता हसे प्रभु येसु ख्रिस्ट तोहराके सान्ति, प्रेम तके ख्रिस्टमा विस्वास दिय। 24 हमार प्रभु येसु ख्रिस्टके हृदयसे प्रेम करलहरा जम्मे जनसाङे परमेस्वरक दाया सबदिन रहइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.