एफिसि 5 - चितवनिया थारु1 तोहरा परमेस्वरक सोगावल सन्तानसभ भेलेसे, तोहरा फेनि हुनेक नहिँया हखे खोजिह। 2 तोहरा एक-दोसरि जनके प्रेम करिह, जसने ख्रिस्ट फेनि हमराके प्रेम करलसि हसे हुने हमार तहिँया परमेस्वरक यागा यपनहिँके सवाद बसान भेटि तके भोगक रुपमा यरपन करलसि। 3 तोहरा ख्रिस्टक पवितर जनसभ भेलेसे तोहार बिचा धुचुड, लोभ, लालच हसे जम्मे खलिक असुद्ध बातक नाउँ फेनि लेवे नाहिँ बनतइ, केहकेकि परमेस्वरक जनसभक तहिँया यसनुक बात करेके हइने सोभेसइ। 4 तोहरा छिहरफुहर बात, काम हइने लगना बात हसे हइने डउल ठाठाक बात फेनि झिन करिह, केहकेकि यसनुक बात तोहराके हइने सोभेसइ। बरु यकर सटहा परमेस्वरके धन्यवाद देवेके काम करिह। 5 तोहराके इअ डउलसे थाह बडइ कि, धुचुड करलाहरसभ, घिन लगना काम करलाहरसभ, लोभि मन्से जुने मुरति पुजा करलाहर मन्से जसने हखइ, हुनुकर ख्रिस्ट हसे परमेस्वरक राजमा किहो अधिकार हइने बडइ। 6 कुनहुँ फेनि छलक बात करके तोहराके धोखा झिन देइ, केहकेकि वसनुक पापसभ करलेसे हुनेक बतवा हइने सुनलहरानिके परमेस्वर दन्ड देबसि। 7 उहेसे यसनुक मन्सेसभसाङे सङगत झिन करिह। 8 केहकेकि एकपल्टा तोहरा यन्हारमा रहलह, बाकि याबे प्रभुक जन भेलेसे इजोरमा बडह। उहेसे तोहरा इजोरक सन्तान नहिँया जिवन बितोइह। 9 केहकेकि इजोरमा रहलाहर मन्से भलाइ करलाहर, इमान्दार हसे सत्य फदकलहर रहसइ। 10 प्रभुक मन परना बात कथि हखइ उअ खोजि करिह। 11 तोहरा यन्हारमा रहलाहर मन्सेसभक करना कामसभ करबे झिन करिह, केहकेकि हुनुका काम हइने लगना काम करसइ। बरु उअ कमवा खराब हखइ कहके देखादिह। 12 यन्हारिमा रहलहरा मन्सावाह गुपचुपमा करलि कामसभक बारेमा फदकेके फेनि लाजक बात हखइ। 13 बाकि इजोरमा यनइकि हुनुकर जम्मे खराब काम देखेसइ। 14 हसे इजोरवाहिँ हरेक चिजुके प्रस्टसे देखा देसिय। उहेसे धरमसास्तरवामा यसके लिखाइल बडइ, “अरे सुतलि मन्सावाह जगह, मरलिसे जिउतह! हसे ख्रिस्टक इजोर तोहारमा हतइ।” 15 उहेसे यापन चालचलन कसनुक बडइ, उअ डउलसे ध्यान दिह। तोहार चालचलन निरबुद्धि मन्से नहिँया हइने भके, बुद्धियार मन्से नहिँया हखइ हसे 16 पउलि समयके यसल काम करेके तहिँया पुरा रुपसे परयोग करिह, केहकेकि यखनि मन्सावाह बहुत खराब काम करइ बडइ। 17 उहेसे तोहरा निरबुद्धि मन्से नहिँया झिन हखिह, बरु प्रभुक इछा कथि बडइ उअ बुझेके कोसिस करिह। 18 मोद पिके मातल झिन रहिह, केहकेकि इअ तोहार जिवन नास करसिय, बरु पवितर-आत्मासे भरपुर हखिह। 19 एक-दोसर जनसाङे भक्तिक गित, स्तुतिक गित हसे पवितर-आत्माक देल आत्मिक गित गाके हृदयसे प्रभुक स्तुति करिह। 20 तोहरा जम्मे बतवाक तहिँया हमार प्रभु येसु ख्रिस्टक नाउँमा सबदिन परमेस्वर पिताके धन्यवाद दिह। 21 ख्रिस्टक यादरमा एक-दोसरिक अदलमा रहिह। मरद हसे जनिक बिसयमा निरदेसन 22 तोहरा जनिनियाह, प्रभुक अदलमा भेल नहिँया यापन-यापन मरदावाक अदलमा रहिह। 23 केहकेकि मरदावाक यापन जनियावाक मुख्य हखिय, जसने ख्रिस्ट मन्डलियाक मुख्य हखसि। मन्डलिया ख्रिस्टक देहि हखिय हसे हुनेहिँ मन्डलियाक मुक्तिदाता हखसि। 24 जसने मन्डलिया ख्रिस्टक अदलमा बडइ, वसने जनिनियाह फेनि जम्मे बतवामा यापन-यापन मरदावाक अदलमा रहे परतइ। 25 तोहरा मरदावाह, ख्रिस्ट यापन जिवन देके मन्डलियाके प्रेम करले नहिँया यापन जनियावानिके वसने प्रेम करिह। 26 ख्रिस्ट मन्डलियाके यापन वचन हसे पानिसे धोके पवितर बनोलसि। 27 इअ मन्डलियाके पवितर, निरदोस, दाग हइने भेल हसे हइने चोङसाइल, कुनहुँ खोट हइने भेल छबिगर मन्डलि बनाके यापनसाङे राखेके तहिँया हुने यसके करलसि। 28 यसने मरदावाह फेनि यापन-यापन जनियावानिके यपने देहिके प्रेम करले नहिँया प्रेम करे परतइ। जुने यापन जनियावाके प्रेम करसिय, उअ यपनहिँके प्रेम करसिय। 29 कुनहुँ फेनि यापन देहियाके घिरिना हइने करसइ, बरु यकरेके खियापियाके पालन-पोसन करसइ, जसने ख्रिस्ट फेनि यापन मन्डलियाक पालन-पोसन करससि। 30 केहकेकि हमरा हुनेक देहिक यङसभ हखहुँ। 31 उहेसे, “मन्सावा यापन दाओ-बाबाके छाडके यापन जनियावासाङे मिलसइ हसे हुनुका दुन्हु जन एगुडे देहि हतइ” कहके धरमसास्तरवामा लिखाइल बडइ। 32 इअ चाहिँ एगुडा बुझे हइने सकना बात हखइ, बाकि इहे बतवा चाहिँ ख्रिस्ट हसे मन्डलि कस्के एक हखइ कहेके बारेमा हखइ। 33 उहेसे फेरि मुइ तोहराके इअ कहबहिँ कि, तोहरा हरेक जन फेनि यापन जनियावाके यपने देहियाके प्रेम करले नहिँया प्रेम करे परतइ हसे जनियावा फेनि यापन मरदावाके यादर करे परतइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.