एफिसि 4 - चितवनिया थारुविस्वासिसभ ख्रिस्टमा एक हखइ 1 उहेसे मुइ पावल, प्रभुक सेवा करके झ्यालखनवामा परल एगुडा मन्से तोहराके परमेस्वरक मन परना जिवन बितोइह कहके मुइ बिन्ति करसहिँ, केहकेकि हुने तोहराके बलोले हखसि। 2 तुइ सबदिन नम्र, सोझ मनक हसे सहनसिल हखसि। प्रेममा एक-दोसरि जनके सहसि। 3 पवितर-आत्मा तोहराके एगुडे बनोले हखसि। उहेसे एक-दोसरिसाङे सान्तिमा रहेके तहिँया कोसिस करिह। 4 हमरा जम्मे जन ख्रिस्टमा विस्वास करलहराह चाहिँ एगुडे देहि नहिँया हखहुँ हसे हमारमा भेलि पवितर-आत्मा फेनि एगुडे बडसि। यसने परमेस्वर हमराके एगुडे यासाक तहिँया बलोले बडसि। 5 एगुडे प्रभु, एगुडे विस्वास हसे बप्तिस्मा फेनि एगुडे बडइ। 6 हमार जम्मे जनक एगुडे परमेस्वर बडसि, जुने हमार जम्मे जनक पिता हखसि। हुने जम्मे मन्सेसे काम करससि हसे जम्मे जनमा बास करससि। 7 बाकि ख्रिस्ट हमरा हरेक जनके हुनेक निरनय यनुसार खलि-खलिक वरदान हुनेक काम करेके तहिँया देले बडसि। 8 उहेसे यकरे बारेमा धरमसास्तरवामा यसके लिखाइल बडइ, “यापन सतरुवानिके जितले पाछा, हुने उँचमा जाइकि बन्दि बनोलरानिके यापनसाङे लेले गेलसि हसे यापन मन्सावानिके यसल चिजुसभ उपहार देलसि।” 9 “हुने उँचमा गेलसि” कहले कथि हखइ? इअ बतवाक मतलब चाहिँ हुने पहिला धरतियाक तर गेलसि कहके बुझोसिय। 10 हुने तर इअ धरतियामा यलसि हसे हुनेहिँ यखनि जम्मे यकसवासे फेनि उँचमा गेलसि, ताकि जम्मे चिजुके हुने भरिपुरन पारे सकसि। 11 हुनेहिँ ककरहुँके प्रेरितसभ, ककरहुँके अगमवक्ता, ककरहुँके परचारक, ककरहुँके मन्डलिक देखभाल करलाहर यवनिया हसे ककरहुँके सिछकसभ बनोलसि, 12 ताकि हुनुका ख्रिस्टक पवितर जनसभके परमेस्वरक सेवाक तहिँया तयार करइ हसे ख्रिस्टक देहि, जुन मन्डलिक विस्वासिसभ हखइ, हुनुकाके बरियार बनोइ। 13 जखनिलइ हमरा जम्मे जन विस्वास हसे परमेस्वरक पुतरक ग्यानमा एक हइने भेल बडहुँ तके पाका मन्से भके ख्रिस्टक भरिपुरनतामा नाहिँ पुगबहुँ, इअ कमवा हमरा करइरहे परतइ। 14 यसके हमरा धुरत हसे चलाख मन्सावानिक झुठा सिछाक बातसे जते लिगले वतहि गेलहर झिनमिन छोकनि नहिँया नाहिँ हखबहुँ। हुनुकर बनोलि झुठा सिछा याको जनके गलत पइडामा लिगसिय। 15 बरु एक-दोसरि जनके प्रेम करते सत्य फदकते जम्मे चिजुमा हमरा ख्रिस्ट नहिँया हखुँ, केहकेकि हुनेहिँ मन्डलियाक प्रमुख हखसि। 16 ख्रिस्ट यापन जम्मे मन्सावानिके एक बनोससि, उहेसे हमरा फेनि देहियाक जम्मे यङके एकसाङे जोरलाहर जोरनि नहिँया हखुँ। यगर हरेक यङ यापन करे परना काम करतइ जउँ, उअ पुरा देहिया स्वास्थ्य रहतइ हसे बढते जेतइ। ख्रिस्टमा लउठा जिवन 17 उहेसे मुइ प्रभुक देलि अधिकारसे तोहराके जोड देके बिन्ति करबहिँ कि, तोहार चालचलन परमेस्वरके विस्वास हइने करल मन्से नहिँया झिन हखइ, केहकेकि हुनुकर सोचे बेकार बडइ। 18 हुनुका हइलठ भेलेसे परमेस्वरक बारेमा जाने हइने खोजसइ। उहेसे हुनुकर मनवा यखनिलइ यन्हार बडइ हसे जुन जिवन परमेस्वर देससि उअ जिवन हुनुकरमा हइने बडइ। 19 हुनुका यापन करलि गल्तिक तहिँया लाज हइने मनसइ। उहेसे हुनुका जम्मे खलिक लोभ हसे घिन लगना छाडा काम करते जेसइ। 20 बाकि यसनुक बात तोहरा ख्रिस्टक सिछासे हइने सिखले बडह। 21 वास्तमा तोहरा त येसुजिक सिछा सुनके हुनेक चेला भेलेसे सत्य बात सिखले बडह, जुन सत्यता हुनेमा बडइ। 22 तोहरा पहिलाक यापन पुरान खराब स्वभाव छाडदिह। तोहार उहे पाप स्वभावक चाहना तोहार जिवनके नास करइ रहलिय। 23 परमेस्वरक आत्मा तोहार सोचके लउठा बनोसि। 24 परमेस्वर तोहराके हुनेक नहिँया लउठा स्वभाव देले बडसि, उहेसे तोहार स्वभाव हुनेक मन परना हसे पवितर हखइ। 25 उहेसे तोहरा हरेक जन झुठा फदकेके छडिह हसे एक-दोसरि जनसाङे सत्य फदकिह, केहकेकि हमरा जम्मे जन ख्रिस्टक देहियाक यङगसभ हखहुँ। 26 तोहार खिस लगले फेनि पाप झिन करिह। घमवा डुबलिसे यगाहे तोहार खिसवा मरइ। 27 तोहराके पापमा पारेके सइतनवाके मउका झिन दिह। 28 जुन मन्से यखनिलइ चोरोसिय, उअ झिन चोरोइ। बरु उअ इमान्दार भके यापन हथवासे मेहनत करिय, ताकि खाँचोमा परलहरानिके देवेके वकरसाङे किहो हतइ। 29 तोहार मुहवासे हइने डउल बात झिन फदकिह, बरु चाहि लगना हसे भलाइ हखना डउल बात फदकिह, ताकि तोहार बतवा सुनलहरा मन्सावानिक भलाइ हतइ। 30 परमेस्वरक पवितर-आत्माके दुःखित झिन बनोइह, केहकेकि परमेस्वर हमराके छुटकाराक दिनक तहिँया चिन्हाक रुपमा यापन पवितर-आत्मा देके छाप लगोले बडसि। 31 तोहरा यापन मनवामा याको जनक तहिँया हइने डउल विचार झिन लिह, झगडा हसे खिस झिन करिह। यपमान करना बात झिन फदकिह, जम्मे खलिक दुस्मनि त्यागदिह। 32 बरु एक-दोसरि जनके दाया देखोइह। ख्रिस्टमा परमेस्वर तोहराके छमा देले नहिँया तोहरा फेनि एक-दोसरि जनके छमा करिह। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.