एफिसि 3 - चितवनिया थारुपावल अयहुदि मन्सावानिके सुसमाचार सुनोलिय 1 उहेसे तोहरा अयहुदि मन्सावानिके येसु ख्रिस्टक सुसमाचार सुनावेके काम करइकि मुइ पावल, झ्यालखनवामा परल बडहिँ। 2 परमेस्वर मोरके दाया करके तोहरा अयहुदि मन्सावानिके सुसमाचार सुनावेके जिमा देलि बतवा तोहरा सुनलहिँ बडह। 3 परमेस्वर कस्के हुनेक लोकाइल योजना मोरके देखोलसि, यकर बारेमा मुइ तोहराके पहिलहिँ छोटकरिमा लिखले बडहिँ। 4 मोर लिखलि बतवा तोहरा पढबह जउँ, मुइ ख्रिस्टक बिसयक लोकाइल सत्य बात कतेक बुझले बडहिँ कहके तोहार थाह हतइ। 5 उअ बतवा पहिला कुनहुँ मन्सेके फेनि थाह हइने दियाइल रहलइ, बाकि यखनि परमेस्वर यापन पवितर-आत्मासे हुनेक पवितर प्रेरितसभ हसे अगमवक्तावानिके परकट करदेले बडसि। 6 उअ लोकाइल योजना चाहिँ इअ हखइ कि, अयहुदि मन्सावाह फेनि सुसमाचारमा विस्वास करके यहुदि मन्सावानिक नहिँया परमेस्वरक आसिस पउतइ। हुनुका फेनि एगुडे देहिक यङसभ हखइ हसे ख्रिस्ट येसुमा परमेस्वरक करलि प्रतिग्याक भागिदार भेल बडइ। 7 परमेस्वर मोरके दाया करके सुसमाचार परचार करेके वरदान देलसि हसे हुने यापन सक्तिसे मोरके इअ महान कामक जिम्मा देले बडसि। 8 ख्रिस्टक पवितर जनसभमधे मुइ सबसे झिनिक भेले ताफेनि, ख्रिस्टक अनमोल सम्पति सुसमाचार अयहुदि मन्सावानिके सुनावेके परमेस्वर मोरके दाया करले बडसि। 9 जम्मे चिजु बनोलहर परमेस्वर पहिलासे लोकाइल योजना जम्मे मन्सावानिके कहेके तहिँया मोरके छानलसि। 10 यखनि मन्डलिक विस्वासिसभसे परमेस्वरक बहुत खलिक ग्यान हइने देखार संसारमा सासन करलहराह हसे अधिकार भेलहरवानिके थाह देवेके परमेस्वरक उदेस्य रहलइ। 11 परमेस्वर इअ जम्मे यापन कबहुँ हइने यन्त हखना योजना यनुसार करले हखसि हसे इअ योजना हुने हमार प्रभु येसु ख्रिस्टमा पुरा करलसि। 12 ख्रिस्टक कारनसे हसे हुने वपरा भेलि हमार विस्वाससे हमरा परमेस्वर लघिना जायके सहास हसे भरोसा पउले बडहुँ। 13 उहेसे मुइ तोहराके बिन्ति करबहिँ कि, तोहार तहिँया मोर भोगलि कस्ट देखके तोहरा निरास झिन हखिह। इअ तोहार तहिँया यादरक बात हखइ। विस्वासिसभक तहिँया पावलक परथाना 14 परमेस्वरक करलि इअ जम्मे बतवा समझके हमार परमेस्वर पिताक यागा मुइ ठेहुँनाके परथाना करसहिँ। 15 हुने स्वरग हसे धरतियाक जम्मे चिजुसभ सिरिस्टि करलाहर हखसि। 16 मुइ इअ परथाना करसहिँ कि, हुनेक महिमाक महान सम्पतिसे हुनेक आत्मा तोहराके सक्ति दिय, ताकि तोहार हृदय बरियार हखइ। 17 तोहरा विस्वास करलि ख्रिस्टक आत्मा तोहार हृदयमा बास करसि हसे तोहार हुनेक तहिँया तके याको जनक तहिँया भेल प्रेममा तोहार जरि फइलते हसे बरियार हखते जाइ। 18 ताकि तोहरा फेनि जम्मे ख्रिस्टक पवितर जनसाङे ख्रिस्टक प्रेमक नमहर, चाकर, उँच हसे गहिर कतेक बडइ कहके बुझे सकह। 19 हमरा कुनहुँ फेनि हुनेक प्रेम पुरन रुपमा बुझे नाहिँ सकबहुँ, ताफेनि तोहरा ख्रिस्टक प्रेमके पुरन रुपमा महसुस करे सकह कहके मुइ परथाना करसहिँ, ताकि तोहार स्वभाव फेनि परमेस्वरक स्वभाव नहिँया हखइ। 20 हमार भितरा काम करना हुनेक सक्तिसे हमार मङलि कि सोचलिसे फेनि प्रसस्त मतरामा देवे सकलाहर, 21 परमेस्वरक मन्डलि हसे येसु ख्रिस्टमा पुस्ता-पुस्तालइ सबदिन प्रसंसा हखइ। आमेन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.