एफिसि 2 - चितवनिया थारुपरमेस्वरक दाया 1 तोहरा विस्वास करलिसे पहिला, यापन पाप हसे परमेस्वरक विरोधि कामसभक कारन आत्मिकि रुपमा मरल रहलह। 2 तखनहिँ तोहरा दुस्ट काम करलाहर संसारक याको मन्सावानिक नहिँया जिवन बितोइ रहलह हसे यकसवामा सासन करलाहर दुस्ट सक्तिसभक मालिकके मनह। यखनि उअ आत्मा परमेस्वरक आग्या हइने मनलहरा मन्सावानिमा काम करइ बडिय। 3 हमरा जम्मे जन फेनि एक पारि हुनुकर नहिँया रहलहुँ। हमरा देहि हसे मनक इछा पुरा करेके तहिँया यापन पाप स्वभावक लालचमा जियहुँ तके याको मन्सावानिक नहिँया हमरा फेनि परमेस्वरक दन्ड पावेके रहलइ। 4 बाकि परमेस्वर हमराके खाँ प्रेम करलसि हसे खाँ दाया देखोलसि। 5 उहेसे हमरा पापमा आत्मिकि रुपसे मरले, ताफेनि हुने हमराके ख्रिस्टसाङे जिउतोलसि। परमेस्वर तोहराके दाया करलेसे मुक्ति पउले बडह। 6 हमरा येसु ख्रिस्टमा विस्वास करलेसे परमेस्वर हमराके येसु ख्रिस्टसाङे जिउतोलसि हसे हुने हमराके हुनेसाङे स्वरगमा बेठोलसि। 7 परमेस्वर यसनुक करेके उदेस्य इअ हखइ कि, येसु ख्रिस्टसे हुने हमराके देखोलि दाया कतुरा महान बडइ कहके यावेवाला जुगमा देखावे चाहलसि। 8 केहकेकि परमेस्वरक दायासे तोहरा ख्रिस्टमा विस्वास करके मुक्ति पउले बडह। तोहरा इअ मुक्ति यापन सक्तिसे हइने, बाकि इअ त परमेस्वरक देल वरदान हखइ। 9 इअ तोहरा यापन डउल कामक कारनसे हइने पउले बडह, उहेसे हमरा कुनहुँ फेनि घमन्ड करे नाहिँ सकबहुँ। 10 केहकेकि जिवनमा यसल कामसभक तहिँया हुने हमराके येसु ख्रिस्टमा लउठा बनोले बडसि। उअ यसल काम हमरा करु कहके हुने पहिनहिँ तयार करले बडसि। ख्रिस्टमा जम्मे एक 11 उहेसे एक समयमा तोहरा कसनुक रहलह उअ याद करह। तोहरा अयहुदि परिवारमा जरमल रहलह हसे देहियामा खतना करलि यहुदियाह तोहराके खतना हइने करल अयहुदि मन्से कहइ। 12 तखनहिँ तोहरा ख्रिस्टके हइने चिनले रहलह। तोहरा परमेस्वर यापन तहिँया छानल जाति इस्राएलक नागरिक हकसे बाहरा भेल रहलह। परमेस्वर हुनुकर तहिँया करारमा करलि प्रतिग्यामा तोहरा सहभागि हइने रहलह हसे इअ संसारमा परमेस्वरके हइने चिनले रहलह तके तोहार किहो यासा हइने रहलइ। 13 बाकि याबे तोहरा ख्रिस्ट येसुसाङे एक भेल बडह। एक समय तोहरा परमेस्वरसे तनाउ रहलह, बाकि याबे परमेस्वर यपनहिँ ख्रिस्टक रकतसे तोहराके लजिके बनोले बडसि। 14 ख्रिस्ट हमार बिचा सान्ति यनलसि, केहकेकि हुने हमरा यहुदि हसे अयहुदियानिके एक बनोलसि तके यपनहिँके क्रुसमा भोग देके हमराके छुटियोना दुस्मनिक देवलवा भसकादेलसि। 15 हुने यहुदि हसे अयहुदि मन्सावानिके सान्ति देवेके तके हुनेमा एक लउठा जाति बनावेके तहिँया भोग हखके व्यवस्था हसे यकर रितिथितिके खारिज करदेलसि। 16 हुने क्रुसवामा मरके दु दाफाक मन्सेसभके एक बनोलसि हसे परमेस्वरसाङे मिलाप करोलसि तके दु दाफाक मन्सेसभक बिचा भेलि दुस्मनिके फेनि नास करलसि। 17 हुने इअ संसारमा याके परमेस्वरसे तनाउ भेलि अयहुदि हसे लजिके भेलि यहुदि मन्सेसभके मेलमिलापक खुसिक समाद सुनोलसि। 18 केहकेकि ख्रिस्टक कारनसे हमरा दुन्हुँ, यहुदि हसे अयहुदि जातिक मन्सावाह एगुडे पवितर-आत्मा पाके परमेस्वर पिताक लजिके जाए पवइ बडहुँ। 19 उहेसे तोहरा जुने अयहुदि बडह, याबे तोहरा हइने चिनल हसे विदेसि हइने हखह, बाकि तोहरा परमेस्वरक जनसाङे एक भेल बडह। याबे तोहरा परमेस्वरक परिवारक मन्से भेल बडह, 20 जुन परिवार चाहिँ प्रेरित हसे अगमवक्तासभक बेठावल जग वपरा बनल घर हखइ। इअ जगवाक मुख्य पत्थरा त येसु ख्रिस्ट यपनहिँ हखसि। 21 उअ जम्मे भवन ख्रिस्टमा जोडाइल बडइ। इअ परमेस्वरमा पवितर मन्दिर बनके बढसइ। 22 तोहरा फेनि हुनेमा याको जम्मे जनसाङे उअ घर बनइ बडह, जहवाँ परमेस्वर आत्मामा बास करससि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.