कल्लसि 4 - चितवनिया थारु1 तोहरा मालिकसभ, यापन कमरवानिसाङे पछपात नाहिँ करके यसल व्यबहार करिह हसे तोहार फेनि स्वरगमा एक जन मालिक बडसि कहलि बतवा झिन बिसरोइह। 2 तोहरा परथाना करते रहिह हसे परथाना करइकि चेतले रहके परमेस्वरके सबदिन धन्यवाद देते रहिह। 3 हमरा ख्रिस्टक रहस्यक बात सुनावे सकुँ हसे मन्सावानिके हुनेक वचन परचार करेके तहिँया परमेस्वर एगुडा दुवारि खोल दिय कहके हमार तहिँया फेनि परथाना करिह। यकरे तहिँया मुइ झ्यालखनवामा थुनाइल बडहिँ। 4 मुइ स्पस्टसे परचार करे सकुँ कहके परथाना करदिह। 5 येसु ख्रिस्टके विस्वास हइने करलहरा मन्सावानिसाङे व्यबहार करइकि बुद्धियार भके व्यबहार करिह हसे तोहार पउलि मउकाके पुरा परयोग करिह। 6 नुनवा जेउनाके सवाद बनोले नहिँया तोहार फदकावा सबदिन सवाद हसे दयगर हखइ, ताकि तोहरा हरेक जनके कस्के जवाफ देवे परतइ कहके जनबह। अन्तिम अभिवादन 7 तुखिकस मोर बारेमा तोहराके जम्मे सुनादेबिय। उअ हमार सोगावल भाइ हसे हमारसाङे काम करलाहर प्रभुमा विस्वासयोग्य सेवक हखिय। 8 तोहरा हमार बारेमा थाह पउह हसे तोहराके सहास दिय कहके मुइ वकरेके तोहार लघिना पठोइ बडहिँ। 9 वकरसाङे ओनेसिमस यवइ बडिय, जुने तोहारमधे एक जन हखिय। उअ हमार विस्वासयोग्य हसे सोगावल भाइ हखिय। हुनुका दुन्हुँ जन यहवाँक जम्मे हालखबर तोहराके कहदेतइ। 10 मोरसाङे झ्यालखनवामा परल अरिस्ताखरस तोहराके अभिवादन पठोले बडिय। बारनाबासक नाता परना मरकुस फेनि तोहराके अभिवादन पठोले बडिय। वकर बारेमा मुइ तोहराके यगाहेसे कहदेले बडहिँ, उहेसे उअ तोहार लघिना यबिय जउँ वकरेके स्वागत करिह। 11 यहोसु, जकरेके युस्तस फेनि कहेसइ, उअ तोहराके अभिवादन पठोले बडिय। परमेस्वरक राजमा मोरसाङे काम करलाहर यहुदिसभ इहे तिन जन मतरे हखइ। हिनिका मोरके खाँ उत्साह देले बडइ। 12 तोहारमधे एक जन भाइ, येसु ख्रिस्टक दास इपाफ्रास फेनि तोहराके अभिवादन पठोले बडिय। तोहरा परमेस्वरक जम्मे इछा पुरा रुपसे माने सकह हसे पाका भके स्थिर हखे सकह कहके उअ तोहार तहिँया सबदिन खाँ परथाना करइ रहसिय। 13 उअ तोहार तहिँया हसे लाउडिकिया तके हिरापोलिस सहरवाक मन्सावानिक तहिँया खाँ मेहनत करले बडिय। मुइ इअ बतवाक साछि बडहिँ। 14 हमार सोगोलि बइध लुका हसे डेमास फेनि तोहराके अभिवादन पठोले बडइ। 15 लाउडिकिया सहरवामा भेलि विस्वासिसभके हसे नुम्फासके तके वकर घरवामा जामा भेलि मन्डलियाके मोर अभिवादन सुना दिह। 16 तोहरा इअ चिठिया पढसकलेपर लाउडिकिया सहरवामा भेलि मन्डलियानिके फेनि पढे दिह हसे लाउडिकियाक चिठिया फेनि तोहरा पढिह। 17 “प्रभुसे पउलि कमवा पुरा करे परतइ” कहके अरखिप्पसके कहदिह। 18 मुइ पावल इअ अभिवादन यपने हथवासे लिखइ बडहिँ। मुइ झ्यालखनवामा बडहिँ कहलि बतवा झिन बिसरोइह। परमेस्वरक अनुग्रह तोहारसाङे रहइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.