कल्लसि 3 - चितवनिया थारु1 उहेसे, यगर तोहरा ख्रिस्टसाङे जिउताइल बडह जउँ, स्वरगक चिजुसभक खोजि करिह, जहवाँ ख्रिस्ट परमेस्वरक दहिनिकलहरवा बेठल बडसि। 2 यापन मनवा धरतियामा भेलि चिजुमा हइने, बाकि स्वरगक चिजुमा लगोइह। 3 केहकेकि तोहार पुरान जिवन मरसकल बडइ हसे तोहार लउठा जिवन ख्रिस्टसाङे परमेस्वरमा लोकाइल बडइ। 4 ख्रिस्ट हमार जिवन हखसि। जब हुने परकट हखबसि, तब तोहरा फेनि हुनेक महिमामा परकट हखबह। 5 उहेसे तोहरा धुचुड, असुद्धता, छाडा इछा, खराब विचार जसने यापन देहियाक इछासभके मारिह। लोभ झिन करिह, केहकेकि लोभ मुरति पुजा हखइ। 6 इहे दुस्ट काम करलेसे परमेस्वरक खिस आग्या हइने मनलहरानिमा परसइ। 7 तोहरा फेनि एक समयमा यसने रहलह हसे यसनुक कामसभ करह। 8 बाकि याबे तोहरा फेनि खिस, क्रोध, डाहा, निना हसे यापन मुहवासे निकडाना फुहर बात करेके छाडदिह। 9 तोहरा एक-दोसरि जनके झिन ठगिह, केहकेकि तोहरा यापन पुरान स्वभाव हसे वकर चालचलन छाडसकले बडह। 10 याबे त तोहरा लउठा स्वभाव धारन करले बडह, जुने यापन सिरिस्टिकरताक स्वरुप यनुसार पुरा ग्यान पावेके तहिँया लउठा हखइ बडइ। 11 उहेसे यहवाँ ग्रिक कि यहुदि, देहियामा खतना करल हसे हइने करल, गवार, असिछित, बहरिया कि स्वतन्तर मन्से ककरो फेनि भेदभाव हइने बडइ, बाकि ख्रिस्ट जम्मे चिजु हखसि हसे हुने जम्मे जनमा बास करससि। 12 तोहरा त परमेस्वरक छानल सोगावल हसे पवितर जन हखह, उहेसे तोहरा माया, दाया, नम्रता, सोझपन हसे सहसानके लुगा नहिँया पेहरिह। 13 तोहरा एक-दोसरि जनके सहिह हसे यगर कुनहुँ तोहार चित दुखोले बडइ जउँ छमा करिह। प्रभु तोहराके छमा करले नहिँया तोहरा फेनि एक-दोसरि जनके छमा करे परतइ। 14 इअ जम्मेसे बढि तोहरा एक-दोसरि जनके प्रेम करिह, केहकेकि प्रेम तोहराके पुरा एकतामा यनसिय। 15 ख्रिस्टक सान्ति तोहार हृदयमा राज करे दिह, केहकेकि वास्तवमा इअ सान्तिक तहिँया परमेस्वर तोहराके एके देहिक यङ हखेके तहिँया बलोलसि। तोहरा सबदिन धन्यवादि हखिह। 16 ख्रिस्टक वचन तोहारमा प्रसस्त रुपमा बास करइ। बुद्धियार भके एक-दोसरि जनके सिखोइह हसे सल्लाह दिह। परमेस्वरके हृदयसे धन्यवाद देके भजन, स्तुति हसे आत्मिकि गितसभ गवइह। 17 तोहरा जथि फदकले फेनि, जथि करले फेनि जम्मे चिजु प्रभु येसुक नाउँमा करिह हसे हुनेहिँसे परमेस्वर पिताके धन्यवाद चढोइह। इसाइ परिवारक सम्बन्धमा सिछा 18 जनिनियाह, प्रभुक मन परना हिसाबसे तोहरा यापन मरदावानिक अदलमा रहिह। 19 मरदावाह, तोहरा यापन जनियावानिके माया करिह हसे हुनुकरसे नम्र व्यबहार करिह। 20 छोकनियाह, तोहरा यापन दाओ-बाबाक कहलि जम्मे बतवा मनिह, केहकेकि इअ करले प्रभु खुसि हखससि। 21 बाबासभ, तोहरा यापन छोकनियानिके खिस झिन उठइह, नत हुनुका निरास हतइ। 22 तोहरा बहरियावाह, तोहरा यापन संसारक मलिकावानिक कहलि जम्मे बतवाह मनिह। मलिकावानिके खुसि पारेके तहिँया हुनुकर यखियाक यागा मतरे हइने, बाकि प्रभुक डर मानके हुनुकर अदलमा रहिह। 23 तोहरा जथि करले फेनि, मन्सेक तहिँया हइने बाकि प्रभुक तहिँया करइ बडहुँ कहके सोचके हृदयसे करिह। 24 केहकेकि प्रभुक प्रतिग्या करलि उतराधिकार तोहरा इनामक रुपमा पउबह कहके सम्झिह। तोहरा प्रभु ख्रिस्टक सेवा करइबडह। 25 खराब काम करलाहर जुने भेले फेनि यापन करलि खराब कामक दन्ड पउतइ हसे परमेस्वर ककरहुँके फेनि पछपात नाहिँ करबसि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.