कल्लसि 2 - चितवनिया थारु1 मुइ कस्के तोहार तहिँया हसे लाउडिकिया सहरवाक विस्वासिसभक तहिँया तके मोरके हइने देखलहराह जम्मे जनक तहिँया खाँ परिसरम करले बडहिँ, इअ बतवा तोहरा जनह कहके मोर इछा बडइ। 2 हुनुका हृदयमा सहास पावे सकइ हसे प्रेमक बन्धनमा एक हखे सकइ कहके मुइ यसके करले हखहि। यसनुक हतइ जउँ हुनुका आत्मिकि रुपसे एकदम धनि भके परमेस्वरक रहस्यक ग्यान, जुने ख्रिस्ट हखसि हुनेके पुरा रुपसे बुझे सकतइ। 3 ख्रिस्टमाहिँ जम्मे ग्यान हसे बुद्धिक सम्पति लोकाइल बडइ। 4 उहेसे मुइ तोहराके इअ कहबहिँ कि, कुनहुँ फेनि तोहराके लोभोना झुठा बातसे झिन बहकोइ। 5 केहकेकि मुइ देहियामा तोहारसे तनाउ भेले ताफेनि आत्मामा तोहारसाङे भके तोहार यसल अनुसासन हसे ख्रिस्टमा तोहार विस्वासक स्थिरता देखके मुइ खाँ खुसि भेल बडहिँ। ख्रिस्टमा जिवन बडइ 6 जसने तोहरा ख्रिस्ट येसुके प्रभु कहके स्विकार करलह, वसने हुनेमा रहके जिवन बितोइह। 7 तोहरा यापन विस्वासमा हुनेमा गहिरलइ जरि गडिह हसे हुनेसाङे यापन सम्बन्ध बरियार बनोते जइह। तोहार पउलि सिछा यनुसार विस्वासमा स्थिर भके हुनेके धन्यवाद देइरहिह। 8 चेतले रहिह, कुनहुँ फेनि तोहराके दर्सनसास्तर कि छलि ग्यान-बुद्धिक बातसे फसावे झिन सकइ। यसनुक बात त ख्रिस्टसे हइने याइल हखइ, बाकि मन्सावानिक चलल रितिथिति हसे संसारक सिछासे याइल हखइ। 9 केहकेकि ख्रिस्टक देहियामा परमेस्वरक पुरा स्वरुप बास करसइ, 10 हसे हुनेमा तोहार जिवन आत्मिक रुपमा पुरा भेल बडइ। हुनेहिँ जम्मे सासन हसे अधिकारक मुड हखसि। 11 हुनेमा तोहार खतना भेल बडइ। इअ खतना मन्सेक हाथसे हइने भेल हखइ, बाकि ख्रिस्टसे तोहार पापि स्वभावसे छुटकारा पावल खतना हखइ। 12 जब तोहरा बप्तिस्मा लेलह, तोहरा ख्रिस्टसाङे गडेलह हसे ख्रिस्टके मरलिसे जिउते बनोलहर परमेस्वरक सक्तिमा विस्वास करलेसे तोहरा फेनि ख्रिस्टसाङे जियल बडह। 13 तोहरा पाप करलेसे हसे व्यवस्था यनुसार खतना हइने करल अयहुदि मन्से भेलेसे एक समयमा तोहरा आत्मिकि रुपमा मरल रहलह। बाकि यखनि परमेस्वर तोहराके ख्रिस्टसाङे जिउतोले बडसि तके हमार जम्मे पाप छमा करदेले बडसि। 14 हुने हमार विरोधमा लिखइलि तमसुक हसे वकर जम्मे कानुनि दाबि सहित क्रुसमा काँटि ठोकके रद्द करदेलसि। 15 यसने हुने आत्मिक दुस्ट सक्ति हसे अधिकारिके जितलसि। हुने क्रुसमा हुनुकर वपरा विजय पाके खुल्लमखुल्ला लजियामा पारलसि। 16 उहेसे खाए-पिएके कि, पबनिक दिन कि, अउसि कि विसराम दिन मानेके बिसयमा कुनहुँ फेनि तोहराके दोस झिन लगोइ। 17 इअ हखे यावेवाला घटनाक छाहर मतरे हखइ, बाकि सदि बात त ख्रिस्ट हखसि। 18 झुठा नम्रता देखोते, “हमरा दर्सन पउले बडहुँ” कहके स्वरगदुतवानिक पुजा करलाहर हसे यपनहिँके महान ठानलाहर मन्सेसभ बडइ। हुनुकर यसनुक छलि बातमा फसके तोहरा यापन पावे परना इनाम झिन गुमोइय। यसनुक मन्सेसभ बिना कारन देहियाक स्वभावक ग्यानसे फुलल रहसइ। 19 देहियाक मुड जुने ख्रिस्ट हखसि, हुनेसाङे हिनिकर किहो सम्बन्ध हइने बडइ। उहे ख्रिस्टक अदलमा रहके मतरे जम्मे देहिया पुस्ट हसइ हसे हुनुका ठिकठाकसे जोडाके परमेस्वरक चाहना यनुसार बढते-बढते जेतइ। 20 तोहरा ख्रिस्टसाङे मरके इअ संसारक आत्मिक सक्तिसभसे छुटकारा पउले बडह जउँ, केहके तोहरा इअ संसारक मन्सावानिक नहिँया जिवन बितोसह? 21 केहके “इअ चलावे नाहिँ बनतइ, इअ चिखे नाहिँ बनतइ, इअ छुय नाहिँ बनतइ” कहलि संसारक नियमसभ पालन करसह? 22 इअ जम्मे नियम पालन करते-करते नास भके जेतइ। इअ त मन्सावानिक बनावल नियम हसे सिछा मतरे हखइ। 23 धरम-करम करेके, देखावटि नम्र हखेके हसे देहियाके दुःख देवेके, इअ जम्मे बुद्धियार नहिँया देखेसइ, बाकि इअ यापन देहियाक अभिलासाके अदलमा राखेके काममा किहो मदत हइने करसइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.