कल्लसि 1 - चितवनिया थारु1 मुइ पावल, परमेस्वरक इछासे चुनल येसु ख्रिस्टक एगुडा प्रेरित, हमार भाइ तिमोथिसाङे, 2 कल्लसि सहरवामा रहलाहर ख्रिस्टमा भेलि पवितर जनसभके हसे विस्वासि भयवानिके इअ चिठिया लिखइ बडहिँ। हमार परमेस्वर पिता तोहराके अनुग्रह हसे सान्ति दिय। धन्यवाद हसे परथाना 3 हमरा तोहार तहिँया परथाना करइकि हमार प्रभु येसु ख्रिस्टक पिता, परमेस्वरके हमरा सबदिन धन्यवाद चढोसहुँ। 4 केहकेकि येसु ख्रिस्टमा तोहार विस्वास हसे जम्मे पवितर जनसभके तोहार करलि प्रेमक बारेमा फेनि हमरा सुनले बडहुँ। 5 तोहार तहिँया स्वरगमा रखाइल यासाक कारनसे तोहरा ख्रिस्टमा विस्वास हसे परमेस्वरक जनसभके प्रेम करले बडह। इअ बिसयमा पहिलाहिँ तोहरा सत्यक समाद, सुसमाचारमा सुनले बडह। 6 उअ सुसमाचार तोहार लघिना फेनि याइल बडइ हसे ख्रिस्टक उअ सुसमाचार संसारक बहुत ठउरिमा मन्सावाह सुनके विस्वास करइ बडइ तके हुनुकर जिवन बदलइ बडिय। तोहरा परमेस्वरक अनुग्रहक बारेमा सदि बतवा सुनलि हसे बुझलि दिनवासे सुसमाचार तोहारमा फेनि वसने काम करइ बडिय। 7 इहे बतवा तोहरा हमार प्रिय सहकरमि इपाफ्राससे सिखलह। उअ हमारसाङे काम करलाहर हमार प्रतिनिधिक रुपमा ख्रिस्टक सेवा करलाहर विस्वासयोग्य सेवक हखिय। 8 पवितर-आत्मा तोहराके कस्के परमेस्वरक जनसभके प्रेम करेके इछा देलसि कहके उअ हमराके सुनादेलिय। 9 उहेसे इअ बतवा सुनलि दिनवासे हमरा तोहार तहिँया परथाना करेके हइने छडलहुँ। परमेस्वर तोहराके यापन इछाक पुरा ग्यान दिय हसे आत्मिक ग्यान तके समझ दिय कहके हमरा सबदिन परमेस्वरमा बिन्ति करसहुँ, 10 ताकि तोहरा प्रभुक मन परना जिवन बितोते हुनेके खुसि बनावे सकबह हसे यसने तोहरा जम्मे यसल काममा फरफरोते परमेस्वरक ग्यानमा बढते जेबह। 11 परमेस्वरक गउरवमय सक्तिसे तोहरा बरियार हखते जाह कहके हमार परथाना बडइ, तब मतरे तोहरा स्थिर भके जम्मे चिजु आनन्दसे सहे सकबह। 12 यकर तहिँया परमेस्वर पिताके धन्यवाद दिह, जुने तोहराके ज्योतिक राजमा यापन पवितर जनसभसाङे हकवाला हखेके तहिँया योग्य बनोले बडसि। 13 हुने हमराके सइतानक यन्हारक सक्तिसे छुटकारा देके यापन प्रिय पुतरक राजमा यनले बडसि, 14 हसे हुनेक पुतरमा हमार छुटकारा तके पापक छमा बडइ। ख्रिस्टक रुप हसे काम 15 ख्रिस्ट हइने देखार परमेस्वरक देखार रुप हखसि। हुनेहिँ जम्मे चिजु सिरिस्टि करलिसे पहिलहिँसे रहलसि हसे जम्मे सिरिस्टि वपरा महान बडसि। 16 केहकेकि स्वरग हसे धरतियामा भेलि जम्मे चिजु हुनेसे सिरिस्टि भेलइ। देखार तके हइने देखार जम्मे चिजु, चाहे सिंहासनसभ, कि सक्तिसभ, चाहे सासकसभ, कि अधिकार चलोलहरासभ, इअ जम्मे चिजु ख्रिस्टसे हसे ख्रिस्टक तहिँया सिरिस्टि भेल हखइ। 17 हुने जम्मे चिजु सिरिस्टि हखलिसे पहिलहिँ रहलसि हसे हुनेहिँ जम्मे चिजु मिलाके रखले बडसि। 18 मन्डलि चाहिँ हुनेक देहि हखइ, हुने वकर मुड हखसि हसे हुनेहिँ सुरुवात हखसि तके हुनेहिँ जम्मे चिजुमा मुख्य हखसि कहके मरके जिउतलरामधे सबसे पहिला जिउते बनोले हखसि। 19 केहकेकि परमेस्वर ख्रिस्टमा यापन परिपुरनता बास करइ कहके चाहलसि, 20 हसे परमेस्वर यापन पुतर येसु ख्रिस्टक क्रुसवामा बहोलि रकतवासे स्वरग हसे धरतियामा भेलि जम्मे चिजुके यापनसाङे फेरि मिलापमा यनलसि। 21 एक समयमा तोहरा दुस्ट काम करलेसे परमेस्वरसे यलग रहलह हसे तोहरा यापन मनवामा सतरु रहलह। 22 बाकि यापन यागा तोहराके पवितर, सुद्ध हसे निरदोस बनावेके तहिँया परमेस्वर ख्रिस्टक देहियाक मृत्युसे तोहराके यापनसाङे मिलापमा यनलसि। 23 तोहरा यापन विस्वासमा डटके रहह हसे बरियार हखिह तके यापन सुनलि सुसमाचारसे पउलि यासाके झिन छडिह। इअ उहे सुसमाचार हखइ, जुन संसारक जम्मे मन्सावानिके परचार कराइल बडइ हसे मुइ पावल फेनि इहे सुसमाचार सुनावेके तहिँया परमेस्वरक एगुडा सेवक भेल बडहिँ। मन्डलिक तहिँया पावलक परिसरम 24 यखनि मुइ तोहार तहिँया कस्ट भोगइकि खुसि बडहिँ, केहकेकि ख्रिस्ट मन्डलिक तहिँया भोगलि कस्टसभके मुइ मोर देहियामा भोगके पुरा करबहिँ। 25 परमेस्वर मोरके तोहार भलाइक तहिँया मन्डलिक सेवक नियुक्त करले बडसि हसे हुनेक वचन पुरा रुपमा परचार करेके जिम्मा देले बडसि। 26 इअ बतवा जुग-जुग हसे पुस्तासे-पुस्तालइ लोकाइल बात रहलइ, बाकि याबे हुने ख्रिस्टक पवितर जनसभके परकट करदेलसि। 27 इअ यचम्मक हसे महान रहस्यक बात अयहुदि मन्सावाह फेनि बुझे सकइ कहके परमेस्वर यसके करलसि। उअ रहस्य इअ हखइ, ख्रिस्ट तोहारमा बास करससि, जुने गउरवक यासा हखसि। 28 उहेसे हमरा जम्मे ग्यानमा जम्मे मन्सावानिके चेतवनि हसे सिछा देते हुनुकाके ख्रिस्टक बारेमा परचार करसहुँ, ताकि हमरा जम्मे जनके ख्रिस्टमा पाका बनाके परमेस्वरक यागा याने सकुँ। 29 मुइ ख्रिस्टक महान सक्तिमा भर परके इअ कमवा खाँ मेहनतसे करइ बडहिँ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.