प्रेरित 8 - चितवनिया थारु1 स्तिफनसके मन्सावाह मारइखुनि साउल फेनि सहमत रहलिय। उअ दिनसे यरुसलेमक मन्डलिया वपरा खुभे सतावट यलइ। प्रेरितवानिके छाडके याको जम्मे विस्वासिसभ यहुदिया हसे सामरिया छेतरमा छाहरछिता भके गेलइ। सतावटक कारन विस्वासिसभ छाहरछिता भेलइ 2 प्रभुक कतेक धरमि जन स्तिफनसक मरलि देहिया गडलइ हसे वकर तहिँया खाँ सोक करलइ। 3 बाकि साउल विस्वासिसभके खाँ दुःख देवे लगलिय। उअ घरवा-घरवामा जाके येसुजिमा विस्वास करलहरा जम्मे मरदाना हसे जनिनियानिके घिसियउते झ्यालखनवामा थुनदेलिय। फिलिपक परचार सुनके सामरियाक मन्सावाह विस्वास करलइ 4 बाकि छाहरछिता भेलि जम्मे विस्वासिसभ चारिवरि जाके खुसिक समाद परचार करे लगलइ। 5 तब फिलिप सामरिया छेतरक एगुडा सहरमा गेलिय हसे येसुजि मुक्ति देलाहर ख्रिस्ट हखसि कहके परचार करलिय। 6 फिलिपक बतवा सुनके हसे वकर करलि यचम्मक कमवा देखके भिडवाक जम्मे मन्सावाह वकर बतवामा ध्यान-पाट देलइ, केहकेकि 7 बहुत मन्सेसभसे भुतवाह जबड माहे चिलइते निकडलइ हसे धार-हइने चल्ना रोग लागल तके लङड-लुलसभ फेनि डउल भेलइ। 8 उअ हेरके सामरिया सहरवाक मन्सावाह खाँ खुसि भेलइ। जादु देखोलहर सिमोन 9 उहे सहरवामा सिमोन नाउँक जादु देखोलहर एक जन मन्से रहलिय। उअ जादु देखाके सामरियाक मन्सावानिके दङ पारले रहलिय हसे उअ “मोर नहिँया कुनहुँ हइने बडइ” कहके कहिय। 10 उअ मन्सावाके झिनमिनसे बडके मन्सेलइ जम्मे जन यसके कहके चिनइ कि “इअ मन्सावामा परमेस्वरक उअ सक्ति हखिय जकरेके महासक्ति कहसइ।” 11 हुनुका जम्मे जन वकरेके मानइ, केहकेकि उअ बहुत दिनसे मन्सावानिके जादु देखाके दङ पारले रहलिय। 12 बाकि जब हुनुका फिलिपसे परमेस्वरक राज हसे येसु ख्रिस्टक नाउँक सुसमाचार सुनलइ, तब जम्मे मरदनवा हसे जनियानिसभ वकर बतवामा विस्वास करके बप्तिस्मा लेलइ। 13 तब सिमोन फेनि विस्वास करके पानिक बप्तिस्मा लेलिय हसे फिलिपसाङे बुले लगलिय। उअ फिलिपक करलि यचम्मक काम हसे चिन्हा देखके छक परलिय। 14 जब सामरिया छेतरक मन्सावाह परमेस्वरक वचनमा विस्वास करलइ कहके यरुसलेममा रहलि प्रेरितवाह सुनलइ, हुनुका पतरुस हसे युहन्नाके हुनुकर लघिना पठोलइ। 15 हुनुका सामरियामा जाके प्रभुमा विस्वास करलहरा मन्सावाह पवितर-आत्मा पवइ कहके हुनुकर तहिँया परथाना करदेलइ, केहकेकि 16 हुनुकरमधे ककरोमा फेनि पवितर-आत्मा हइने याइल रहलसि। हुनुका प्रभु येसुजिक नाउँमा मतरे पानिक बप्तिस्मा लेले रहलइ। 17 जब पतरुस हसे युहन्ना हुनुकर वपरा हथवा राखके परथाना करदेलइ, हुनुका पवितर-आत्मा पउलइ। 18 याबे प्रेरितवाह मन्सावानि वपरा हथवा रखइखुनि, हुनुका पवितर-आत्मा पवइकि देखके सिमोन प्रेरितवानिके पइसा देते 19 यसके कहलिय, “मोरके फेनि इअ सक्ति देहुँ, ताकि मुइ जाकर वपरा हथवा रखबहिँ उअ पवितर-आत्मा पवइ।” 20 बाकि पतरुस जवाफ देते कहलिय, “तोर पइसावा तोरेसाङे नास हखइ, केहकेकि तुइ त परमेस्वरक वरदान पइसासे किने सकेसइ कहके विचार करलहि। 21 यकरमा तोर नत अधिकार बडइ न हिस्सा बडइ, केहकेकि परमेस्वरक लजरियामा तोर मनवा ठिक हइने बडइ। 22 यसनुक दुस्ट विचार करेके छडहि हसे प्रभुसाङे परथाना करहि। हखे सकतइ हुने तोर दुस्ट विचार छमा करदेबसि, 23 केहकेकि मुइ देखइ बडइ कि तुइ डाहसे भरल बडहि हसे पापक बन्धनमा परल बडहि।” 24 तब इअ बतवा सुनके सिमोन बिन्ति करते यसके कहलिय, “यपनहुँसभक कहलि इअ बतवा मोरमा झिन यवइ कहके मोर तहिँया प्रभुसाङे परथाना कर देहुँ।” 25 तब पतरुस हसे युहन्ना येसुजिक बारेमा गवाहि देते प्रभुक वचन परचार करसकलेपर सामरिया छेतरक बहुत गाउँमा सुसमाचार परचार करते यरुसलेममा फिरलइ। फिलिप हसे इथियोपिया देसक बडके हाकिम 26 वकरपाछा प्रभुक एगुडा स्वरगदुत फिलिपके कहलिय, “उठहि, हसे दखिनेवरि जाके यरुसलेमसे गाजा सहरवावरि जइनवा उराठ-ठउरियाक पइडावामा जाहि।” 27 तब फिलिप उठके गेलिय। तखनहिँ इथियोपिया देसवाक एक जन प्रमुख हाकिम उहे पइडावा माहे जाइ रहलिय। उअ इथियोपिया देसवाक महरानि कन्दाकिक रुपिया-पइसाक हिसाब-किताब करलाहर हाकिम रहलिय। उअ नपुंसक परमेस्वरक सेवा करेके तहिँया यरुसलेममा गेल रहलिय। 28 उअ यरुसलेमसे यापन घरवरि फिरइकि रथवामा बइठके यसइया अगमवक्तावाक लिखलि कितबवा पढइ रहलिय। 29 तब पवितर-आत्मा फिलिपके कहलसि, “उअ रथवाक सङहि-सङहि जाहि।” 30 जब फिलिप दगुरते रथवाक लजिके पुगलिय, उअ मन्सावा यसइया अगमवक्ताक लिखल कितबवा पढइकि सुनलिय। वकरपाछा फिलिप वकरेके पुछलिय, “यपनहुँ पढलि बतवा बुझइबडहुँ?” 31 उअ नपुंसकवा जवाफ देते कहलिय, “कुनहुँ यकर यरथ नाहिँ बुझोइलइ मुइ कस्के बुझबहिँ?” तब उअ फिलिपके रथवामा चढके यापनसाङे बइठेके तहिँया बिन्ति करलिय। 32 उअ नपुंसक धरमसास्तरवाक इअ खन्डसे पढइ रहलिय, “हुने काटे लिगाइल भेडा नहिँया रहलसि हसे रउ कटइकि भेडा चुपचाप रहइ नहिँया, हुनेक मुहवासे फदक हइने निकडलइ। 33 हुनेक बिजेत भेलइ, हुने ठिक न्याय हइने पउलसि। कुनहुँ फेनि हुनेक सन्तानसभक बारेमा कहे नाहिँ सकतइ, केहकेकि हुनेक जिवन इअ धरतियामा यन्त भेल बडइ।” 34 उअ नपुंसक फिलिपके पुछलिय, “मोरके दाया करके कहहुँ, अगमवक्तावाह इअ बतवा काकर बारेमा कहले हखइ? यपने बारेमा कि याको ककरो बारेमा?” 35 तब फिलिप धरमसास्तरवाक उहे खन्डसे सुरु करके येसुजिक बारेमा सुसमाचार सुनोलिय। 36 हुनुका पइडावामा जाइखुनि पानि भेलि ठउरियामा पुगलइ। तब उअ नपुंसकवा कहलिय, “हेरहुँ, यहवाँ पानि बडइ हसे याबे मोरके बप्तिस्मा लेवेके कथि बाधा देवे सकतइ?” 37 [तब फिलिप नपुंसकके कहलिय, “यगर यपनहुँ जम्मे हृदयसे विस्वास करबहुँ जउँ बप्तिस्मा लेहे सकबहुँ।” उअ नपुंसक जवाफ देते कहलिय, “येसु ख्रिस्ट परमेस्वरक बेटा हखसि कहके मुइ विस्वास करसहिँ।”] 38 उहेसे उअ नपुंसक रथवा ठडियावे लगोलिय। वकरपाछा दुन्हु जन पनियामा झरलइ हसे फिलिप वकरेके बप्तिस्मा देलिय। 39 हुनुका पनियासे निकडलेपर प्रभुक आत्मा फिलिपके लिगलसि हसे नपुंसक वकरेके हइने देखे सकलिय, बाकि खुसि भके यापन पइडा लगलिय। 40 तब फिलिप यपनेके अस्दोद सहरवामा पुगल थाह पउलिय। वहवाँसे कइसरिया सहरवामा हइने पुगइलइ पइडामा परना जम्मे सहरवामा सुसमाचार परचार करते गेलिय। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.