प्रेरित 4 - चितवनिया थारुपतरुस हसे युहन्ना महासभाक यागा 1 जब पतरुस हसे युहन्ना मन्सावानिसाङे फदकइ रहलइ, तखनहिँ पुजेरियाह, मन्दिरवाक वगरलहरा कप्तान हसे सदुकियाह हुनुकर लघिना यलइ। 2 हुनुका खाँ खिसियाइल रहलइ, केहकेकि पतरुस हसे युहन्ना येसुजि मरलिसे जिउतल बडसि हसे यसने याको मरलि मन्सावाह फेनि जिउततइ कहके मन्सावानिके सिखोइ रहलइ। 3 उहेसे हुनुका पतरुस हसे युहन्नाके पकडलइ हसे साँझ परलेसे हुनुकाके रातभर झ्यालखनवामा थुन देलइ। 4 बाकि वचनवा सुनलहरामधे बहुत जन विस्वास करलइ। यसने येसुजिके विस्वास करलाहर मरदाना मन्सेक संख्या बढके पाँच हजार जतुरा भेलइ। 5 दोसरि दिन सासकसभ, यगुवासभ हसे व्यवस्थाक-गुरुसभ यरुसलेममा बटियलइ। 6 उअ कचहेरियामा सिदुकि पुजेरिया हन्नास हसे वकरसाङे कइयाफा, युहन्ना, अलेक्जेन्डर हसे सिदुकि पुजेरियाक घरानाक याको मन्सेसभ फेनि रहलइ। 7 हुनुका पतरुस हसे युहन्नाके कचहेरियामा यानके पुछलइ, “तोहरा इअ लङडाके कथिक सक्तिसे हसे काकर नाउँसे डउल बनोले बडह?” 8 तब पतरुस पवितर-आत्मासे भराके हुनुकाके कहलिय, “यादरनिय सासकसभ हसे मन्सावानिक यगुवासभ, 9 इअ लङडा मन्सावाके दाया करके डउल बनोलेसे, यगर यपनहुँसभ हमराके यहवाँ यानके इअ लङडा मन्सावाके हमरा कस्के डउल बनोलहु कहके प्रस्न पुछइ बडहुँ जउँ, 10 मुइ यपनहुँसभके हसे जम्मे इस्राएलक मन्सावानिके डउलसे कहइ बडहिँ, जकरेके यपनहुँ क्रुसवामा झुन्ड्याके मारलहुँ हसे परमेस्वर जकरेके फेरि मरलिसे जिउतोले बडसि, उअ नासरतक येसु ख्रिस्टक नाउँमा इअ मन्सावा डउल भके यपनहुँसभक यागा ठडियाइल बडिय। 11 जसने ख्रिस्टक बारेमा धरमसास्तरवामा लिखाइल बडइ, ‘घरवा बनोलहरा मिस्तिरियाह जुन येसुजिके काम हइने लगना पत्थरा सोचके इन्कार करलह, याबे उअ पत्थरवा सबसे काम लगना सिरक-पत्थरा भेल बडसि।’ 12 “येसुजि मतरे मन्सावानिके मुक्ति देवे सकबसि, केहकेकि हमरा मुक्ति पावेके तहिँया इअ धरतियामा मन्सावानिक बिचा याको दोसरे नाउँ हइने देल बडइ।” 13 जब मन्सावाह पतरुस हसे युहन्नाक याट देखलइ हसे हुनुका दुन्हुँ जन पढल-लिखल हइने रहलइ तके साधरन मन्सेसभ मतरे रहलइ कहके थाह पउलइ, हुनुका जम्मे जन छक परलइ। हुनुका येसुजिसाङे रहइ कहके फेनि थाह पउलइ। 14 बाकि डउल भेलि लङडि मन्सावाके पतरुस हसे युहन्नासाङे ठडियाइल देखके हुनुका किहो फेनि हइने कहे सकलइ। 15 उहेसे हुनुका पतरुस हसे युहन्नाके महासभासे बाहरा जायके आग्या देलइ हसे हुनुका एक दोसरिसाङे यसके फदके लगलइ, 16 “याबे हमरा इअ मन्सावानिके कथि करेके? हुनुकर करलि यचम्मक कमवा जम्मे यरुसलेमक मन्सावाह थाह पासकले बडइ हसे हमरा फेनि इअ बतवा इन्कार करे नाहिँ सकबहुँ। 17 बाकि इअ बतवा याको मन्सावानिके थाह नाहिँ देवे परतइ हसे येसुजिक बारेमा याबेसे ककरहुँसाङे फेनि झिन कहिय कहके हुनुकाके चेतवनि देवे परतइ।” 18 वकरपाछा हुनुका पतरुस हसे युहन्नाके फेरि भितरा बलोलइ हसे “तोहरा याबेसे येसुजिक नाउँमा ककरहुँसाङे फेनि किहो बात झिन करिह हसे ककरहुँके फेनि झिन सिखोह” कहके चेतवनि देलइ। 19 बाकि पतरुस हसे युहन्ना हुनुकाके जवाफ देते यसके कहलइ, “यपनहुँसभक कहलि बतवा मानेके परमेस्वरक लजरियामा ठिक हखइ कि परमेस्वरक कहलि बतवा मानेके परमेस्वरक लजरियामा ठिक हखइ, यपनहिँ विचार करहुँ? 20 केहकेकि हमरा यपने देखलि हसे सुनलि बतवा नाहिँ फदकके रहे नाहिँ सकबहुँ।” 21 हुनुका पतरुस हसे युहन्नाके कस्के सजाय देवे कहके निरनय करे हइने सकलेसे हुनुकाके धम्कि देके छाडदेलइ, केहकेकि हुनुकर करलि यचम्मक कमवा देखके जम्मे मन्सावाह परमेस्वरक बखान करइ रहलइ। 22 यचम्मसे डउल भेलि उअ लङड मन्सावाक उमेर चालिस बरससे फेनि बहुत भेल रहलइ। याट पावेके तहिँया विस्वासिसभक परथाना 23 पतरुस हसे युहन्ना हुनुकरसे छुटकारा पाके विस्वासिसभक लघिना गेलइ। मुख्य पुजेरियाह हसे यगुवासभक कहलि जम्मे बतवा हुनुकाके कहदेलइ। 24 जब हुनुका इअ बतवा सुनलइ, तब जम्मे जन मिलके परमेस्वरसाङे एक मन भके यसके परथाना करे लगलइ, “हे सरवसक्तिमान प्रभु, यकास, धरति, समुनदर हसे वकरमा भेलि जम्मे चिजुवा यपनहुँ बनोलहुँ। 25 यपनहुँ पवितर-आत्मासे यपनेक सेवक हमार पुरखा दाउदक मुहवासे फदकलहुँ ‘अयहुदियाह केहके खिसियसइ? हसे मन्सावाह केहके व्यरथक योजना बनोसइ? 26 परमप्रभुक विरोधमा हसे हुनेक चुनल ख्रिस्टक विरोधमा धरतियाक रजवाह हसे सासकसभ एकसाङे बटियाइल बडइ।’ 27 “सदियो, हेरोद रजवा, पन्तियस पिलातस अयहुदियाह हसे इस्राएलिसभसाङे इहे सहरवामा यपनहुँक चुनल सेवक येसु ख्रिस्टक विरोधमा बटियलइ। 28 बाकि हुनुका त यपनहुँक यापन सक्ति हसे इछासे यगाहेसे करलि निरनय यनुसार मतरे काम करले बडहुँ। 29 याबे हे प्रभु, हुनुकर धम्कियावरि यपनहुँ ध्यान देहुँ हसे यपनहुँक वचनवा परचार करेके तहिँया यपनहुँक सेवकसभके याट देहुँ। 30 यपनहुँक पवितर सेवक येसुजिक नाउँमा मनियइलि मन्सावानिके डउल बनावेके, यचम्मक चिन्हा देखावेके हसे यचम्मक काम करेके तहिँया यापन सक्तिसालि हथवा बढोहुँ।” 31 हुनुका परथाना कहसकलेपर, हुनुकर बटियलि ठउरिया डिङलइ। तब हुनुका जम्मे जन पवितर-आत्मासे भरेलइ हसे याट करके परमेस्वरक वचन सुनावे लगलइ। विस्वासिसभक सझिया सम्पति 32 याबे येसुजिमा विस्वास करलहरा जम्मे जन एके मन हसे एके हृदयक रहलइ। हुनुकरसाङे भेलि जम्मे चिजुवा हुनुका यापन निजि सम्पति कहके हइने सम्झइ, बाकि हुनुका यापनसाङे भेलि जम्मे चिजुवा एक-दोसरि जनसाङे बाटचिट करइ। 33 प्रेरितवाह जबड सक्तिसे प्रभु येसुजि मरलिसे फेरि जिउतल बडसि कहके गवाहि देइ हसे परमेस्वरक बहुते आसिस हुनुकर वपरा रहलइ। 34 हुनुकरमधेमा ककरहुँके फेनि किहो चिजुक कमि हइने रहलइ, केहकेकि जाकरसाङे जागा कि घरबार रहलइ, हुनुका उअ बेचके यइलि पइसावा 35 प्रेरितवानिक लघिना यनइ हसे उअ पइसा मन्सावानिक चाहिँ यनुसार बाँट देइ। 36 उअ दिनवामा साइप्रसमा योसेफ नाउँक एक जन लेवि रहलिय। प्रेरितवाह वकरेके “बारनाबास” कहइ। जाकर यरथ “जुने उत्साह देसिय” 37 उअ फेनि यापन एगुडा जागा बेचलिय हसे जागा बेचलि पइसावा यानके प्रेरितवानिक यागा राखदेलिय। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.